અફઘાનિસ્તાનના ક્રિકેટર રાશિદ ખાન અને કેરેબિયન દિગ્ગજ ખેલાડી કીરોન પોલાર્ડને મુંબઈ ઈન્ડિયન્સ ફ્રેન્ચાઈઝીએ મોટી જવાબદારી સોંપી છે.
અફઘાનિસ્તાન ક્રિકેટર રાશિદ ખાનને MI એ સોપી જવાબદારી
સાઉથ આફ્રિકા T20 લીગની MI ટીમનો કેપ્ટન બનાવ્યો
કીરોન પોલાર્ડ UAEની આંતરરાષ્ટ્રીય T20 લીગમાં MI નું નેતૃત્વ કરશે
અફઘાનિસ્તાનના ક્રિકેટર રાશિદ ખાન અને કેરેબિયન દિગ્ગજ ખેલાડી કીરોન પોલાર્ડની ગણતરી વિશ્વના શ્રેષ્ઠ T20 ખેલાડીઓમાં થાય છે. બંને ખેલાડીઓ વિશ્વભરની T20 લીગમાં શાનદાર પ્રદર્શન કરી રહ્યા છે. હવે મુંબઈ ઈન્ડિયન્સ ફ્રેન્ચાઈઝીએ રાશિદ અને પોલાર્ડને મોટી જવાબદારી સોંપી છે. જ્યાં સાઉથ આફ્રિકા T20 લીગની પ્રથમ સિઝન માટે રાશિદ ખાનને મુંબઈ ઈન્ડિયન્સ કેપટાઉનનો કેપ્ટન બનાવવામાં આવ્યો છે. તે જ સમયે, કિરોન પોલાર્ડ UAEની આંતરરાષ્ટ્રીય T20 લીગ (ILT20)માં મુંબઈ ઈન્ડિયન્સ અમીરાતનું નેતૃત્વ કરશે.
આકાશ અંબાણીએ આ વિશે કહ્યું કે, 'MIને 2023ની ક્રિકેટ સીઝનથી વૈશ્વિક સ્તરે 'વન ફેમિલી' તરીકે વિકસાવવામાં આવી રહી છે. અમારા બંને કેપ્ટનમાં પ્રતિભા, અનુભવ અને જુસ્સોનો અદભૂત મિશ્રણ છે. મને વિશ્વાસ છે કે પોલાર્ડ અને રાશિદ બંને એમઆઈ પરિવારને આગળ લઈ જશે.
રાશિદ ખાન અને કિરોન પોલાર્ડ બંને આંતરરાષ્ટ્રીય ક્રિકેટનો અનુભવ ધરાવે છે તેમજ IPLમાં પણ આગેવાની કરે છે. રાશિદ ખાને બે ટેસ્ટ, સાત વનડે અને સાત ટી-20 મેચમાં અફઘાનિસ્તાનની કેપ્ટનશીપ કરી છે. રાશિદે IPL 2022 ની મેચમાં ગુજરાત ટાઇટન્સ (GT)નું નેતૃત્વ પણ કર્યું હતું. કીરોન પોલાર્ડની વાત કરીએ તો તે લાંબા સમય સુધી વ્હાઈટ ઓવરની ક્રિકેટમાં વેસ્ટ ઈન્ડિઝ ટીમનો કેપ્ટન હતો. તેની પાસે 24 ODI અને 34 T20 ઈન્ટરનેશનલ સિવાય છ આઈપીએલ મેચોમાં કેપ્ટનશિપ કરવાનો અનુભવ છે. પોલાર્ડે થોડા દિવસ પહેલા IPLને અલવિદા કહી દીધું હતું.
દક્ષિણ આફ્રિકા ટી20 લીગમાં ક્વિન્ટન ડિકોક, ફાફ ડુ પ્લેસિસ, કાગિસો રબાડા, ડેવિડ મિલર, રાશિદ ખાન, ઇઓન મોર્ગન, જોસ બટલર સહિત વિશ્વભરના જાણીતા ખેલાડીઓ ભાગ લેશે. જેમાં રાઉન્ડ રોબિન તબક્કામાં છ ટીમો ભાગ લેશે અને દરેક ટીમ બીજી ટીમ સામે બે વખત ટકરાશે. આ ટુર્નામેન્ટ 10 જાન્યુઆરી, 2023 થી ચાર અઠવાડિયા સુધી ચાલશે અને તેમાં 33 મેચો રમાશે.
બીજી તરફ UAEની ઇન્ટરનેશનલ લીગ T20 (ILT20) લીગ 13 જાન્યુઆરીથી શરૂ થઇ રહી છે. તેનું ફોર્મેટ પણ દક્ષિણ આફ્રિકાની T20 લીગ જેવું જ છે. આ લીગમાં પણ તમામ ટીમો એકબીજા સામે બે મેચ રમશે. આ પછી પ્લેઓફ મેચો રમાશે.