IPLના ઇતિહાસમાં સનરાઇઝર્સ હૈદરાબાદ (SRH)નો રાશિદ ખાન હિટ વિકેટ આઉટ થનારો ૧૨મો ખેલાડી બની ગયો છે. ચેન્નઈ સુપર કિંગ્સ સામે ગત મંગળવારે રમાયેલી મેચમાં તે હિટ વિકેટ આઉટ થયો.
આ પહેલાં વર્તમાન સિઝનમાં મુંબઈ ઇન્ડિયન્સનો ઓલરાઉન્ડર હાર્દિક પંડ્યા પણ હિટ વિકેટ આઉટ થઈ ચૂક્યો છે. હાર્દિક કોલકાતા સામેની મેચમાં આ રીતે આઉટ થયો હતો.
ચેન્નઈના ફાસ્ટ બોલર શાર્દૂલ ઠાકુરની ઓવરમાં બોલને બાઉન્ડરીની પાર પહોંચાડવાના ચક્કરમાં રાશિદ ખાન ક્રીઝમાં વધુ પડતો અંદર ચાલ્યો ગયો હતો અને પોતાનો પગ સ્ટમ્પને અથડાવી બેઠો હતો, જોકે એ શોટ પર બાઉન્ડરી લાઇન પર ઊભેલા દીપક ચાહરે રાશિદનો કેચ પણ પકડી લીધો હતો. કેચ પકડાય એ પહેલાં સ્ટમ્પમાં પગ લાગવાથી રાશિદને હિટ વિકેટ આઉટ જાહેર કરવામાં આવ્યો હતો.
ગત સિઝનમાં રાજસ્થાન રોયલ્સ (RR)નો રિયાન પરાગ કોલકાતા નાઇટ રાઇડર્સ સામે હિટ વિકેટ આઉટ થયો હતો. કેકેઆરના આન્દ્રે રસેલની બોલિંગમાં હૂક શોટ ફટકારવાના પ્રયાસમાં રિયાન હિટ વિકેટ આઉટ થયો હતો. આ પહેલાં ૨૦૧૭માં રાઇઝિંગ પુણે સુપરજાયન્ટ્સ (RPS)નો શેલ્ડન જેક્સન કેકેઆર સામેની મેચમાં હિટ વિકેટ આઉટ થયો હતો. IPL ઇતિહાસમાં સનરાઇઝર્સ હૈદરાબાદ (SRH)ના સૌથી વધુ ચાર ખેલાડી હિટ વિકેટ આઉટ થઈ ચૂક્યા છે.