આ દુર્લભ સાપની બેન્ડેડ કુકરી (કોમન કુકરી) તરીકે પણ ઓળખાણ
અમદાવાદ રિવરફ્રન્ટ ખાતે આવેલ સી-પ્લેનના પ્લેટફોર્મ ખાતે કોમન પ્લોટમાંથી અતિદુર્લભ જોવા મળતો સાપ મળી આવ્યો છે. બેન્ડેડ કુકરી એનિમલ લાઈફ કેરના વિજય ડાભી દ્વારા આ સાપનું રેસ્ક્યૂ કરવામાં આવ્યું હતું. રિવરફ્રન્ટ ખાતે સી-પ્લેન પ્લેટફોર્મના કોમન પ્લોટમાંથી ફરજ બજાવતા પોલીસ અઘિકારીએ એનીમલ લાઈફ કેરને જાણ કરવામાં આવી હતી. જ્યાં પ્લેટફોર્મ પર સમારકામ ચાલી રહ્યું હતું. તે દરમિયાન ઈંટોના ઢગલામાં એક સાપ છુપાઈને બેઠો હતો.
જેને જોઈ શ્રમિકો ડરી ગયા હતા. જે બાદ એનિમલ લાઇફકેરના વાઈલ્ડ લાઈફ એક્સપર્ટ વિજય ડાભીને જાણ થતાની સાથે તાત્કાલિક સ્થળ પર પહોંચી ગયા હતા. સ્થળ પર ઇંટોના ઢગલામાં ફસાયેલા સાપ જે અતિદુર્લભ પ્રજાતિનો ગણવામાં આવે છે. જે અમદાવાદ વિસ્તારમા છુટો છવાયો જોવા મળે છે. તેને બેન્ડેડ કુકરી સાપ (કોમન કુકરી) તરીકે પણ ઓળખવામાં આવે છે. વિજય ડાભીએ જણાવ્યું કે, અમદાવાદમાં ખૂબ જ ઓછો જોવા મળતો આ સાપ જે બિનઝેરી સાપની પ્રજાતિ છે. આ સાપના મુખ્ય શરીર ઉપર બ્લેક કલરના પટ્ટા હોય છે. મુખના ભાગે V આકારનો સેપ બનતો હોય છે. તેની પૂછડી અણીદાર હોય છે. ખાસ કરીને આ સાપનો મુખ્ય ખોરાક નાના દેડકા-ગરોડી અને પક્ષીઓના નાના ઈંડાનો શિકાર કરે છે. અલગ પ્રકારના સાપને જોઈ રિવરફ્રન્ટની આજુબાજુના લોકો જોવા ઊમટી પડ્યા હતા.
વિજય ડાભી દ્વારા જણાવવામાં આવ્યું કે, આ સાપ શ્રીલંકા, ભારત, બાંગ્લાદેશ, પાકિસ્તાન, ભૂતાન અને નેપાળમાં જેવા દેશમાં જોવા મળતો સાપ છે. ખાસ કરીને કુકરી સાપએ ખુબ જ ઓછો જોવા મળતો હોવાથી તેને સહિસલામત રેસ્કયૂ કરી જંગલ વિસ્તારમાં મુક્ત કરવા આવ્યો હતો.