ગુજરાતમાં મહિલા સુરક્ષાને લઇને અનેક સવાલો ઉઠી રહ્યા છે. મહિલા અને દિકરીઓ સુરક્ષિત ન હોવાના અનેક ચોંકાવનારા કિસ્સા સામે આવે છે ત્યારે આ તમામ વચ્ચે એક એવો કિસ્સો સામે આવ્યો જે જાણીને એમ થશે કે ના હોય, આવુ પણ હોય ? પુરુષો દ્વારા મહિલાને છેડતી અને દુષ્કર્મની ઘટનાઓ સામે આવે છે ત્યારે ખેડામાં કિશોરોએ એક સગીરને નિશાનો બનાવ્યો અને સૃષ્ટિવિરુદ્ધનું કૃત્ય આચર્યું.
સગીર સાથે સૃષ્ટિ વિરુદ્ધનું કૃત્ય
ખેડાના નડિયાદમાં 10 વર્ષીય સગીર સાથે કિશોરોએ સૃષ્ટિવિરુદ્ધ કૃત્ય કરતા ચકચાર મચી છે. નડિયાદના નરસંડા ગામની આ ઘટના છે. 16 અને 17 વર્ષના કિશોરોએ સગીર સાથે આવુ કૃત્ય કરતા હડકંપ મચ્યો છે. આ આખો મામલો ત્યારે સામે આવ્યો જ્યારે સગીરે કાકાને આ મામલાની જાણ કરી. કાકાએ ભોગબનનારના પિતાને આ અંગે જાણ કરતા ચકલાસી પોલીસ સ્ટેશનમાં ફરિયાદ નોંધાઇ હતી.
પોલીસે બંને આરોપીને ઝડપી પાડ્યા
આ મામલે ચકલાસી પોલીસ સ્ટેશનમાં ફરિયાદ કરતા પોલીસે બંને કિશોર આરોપીઓને ઝડપી પાડીને વધુ કાર્યવાહી હાથ ધરી છે. પરંતુ અહીં સવાલ એ થાય કે યુવાનીના ઉંમરે ઉભેલા કિશોરોની આવી માનસિકતા માટે જવાબદાર કોણ ? શું છૂટથી મળી રહેલુ ઇન્ટરનેટ એક્સેસ છે જવાબદાર ? સવાલો તો ઘણા છે પરંતુ આવી કુમળી વયમાં બાળકોનું ધ્યાન અભ્યાસ અને રમત ગમતમાં હોય ત્યારે આવી હરકતો કરવાની પ્રેરણા ક્યાંથી મળતી હશે. દરેક માતા પિતાએ ખ્યાલ રાખવો જરુરી છે કે તમારુ બાળક શું કરે છે. ટીવી અને મોબાઇલમાં શું જોવે છે. હાલમાં પોલીસે બંને કિશોર આરોપીઓને ઝડપી પા઼ડીને મેડિકલ ચેકઅપ માટે લઇ જવાશે ત્યારબાદ જુવેનાઈલ કોર્ટમાં રજૂ કરાશે.