અમદાવાદ / મંત્ર, તંત્રને નામે બહેનોને ફસાવી દુષ્કર્મની હારમાળા સર્જી, પડાવ્યા લાખો રૂપિયા

• જીવનભરની પૂંજીમાંથી પણ પાંચ લાખ રૂપિયા આ ઢોંગીને ધરી દીધા
• વિધિને બહાને લઈ ગયો ગેસ્ટહાઉસ
• દુષ્કર્મનો બનાવ્યો વીડિયો

અમદાવાદના વાડજમાં પોતાના પરિવાર સાથે રહેતી મહિલા લોકના ઘરના કામ કરીને પેટીયુ રડે છે. કામ કરતા કરતા જ તેની મુલાકાત દોલતરામ નામના શખ્સ સાથે થઈ હતી. આ શખ્સે તેને અંધશ્રધ્ધાની આંટીમાં એવી તો લપટાવી કે મહિલાએ પોતાનું સર્વસ્વ તો ગુમાવ્યુ પણ પોતાની નાની બહેનનું શિયળ પણ ન બચાવી શકી અને માત-પિતાની જીવનભરની પૂંજીમાંથી પણ પાંચ લાખ રૂપિયા આ ઢોંગીને ધરી દીધા. 

કેવી રીતે મહિલા ભોળવાઈ?
સંધ્યા (નામ બદલ્યુ છે) વાડજ વિસ્તારમાં રહે છે અને સુભાષબ્રિજ પાસે આવેલા એક ફ્લેટમાં કામ કરવા જાય છે. અહિં તેની મુલાકાત ઘાટલોડિયામાં રહેતા દોલતરામ સુથાર સાથે થઈ હતી. દોલતરામ અવારનવાર મહિલાને મળતો હતો. 

દોલતરામે ધીરે ધીરે મહિલા સાથે ઘરોબો કેળવીને તેના દુઃખ દર્દ વિશે જાણી લીધુ હતુ. ધીરે ધીરે તેણે મહિલાને ભૂત પ્રેત અને નડતર, જડતરની ભ્રામક વાતોમાં ફોસલાવવાનું શરૂ કરી દીધુ હતુ. સંધ્યાના ઘરમાં ભૂતપ્રેતનો વાસ છે અને જો તે સમયસર વિધિ નહી કરાવે તો તેનું સત્યાનાશ નીકળી જશે એવો પણ ડર બતાવ્યો હતો. પોતે આ વિષયનો જાણકાર હોવાનું કહીને મહિલાને નિવારણને નામે તાંત્રિક વિધિ કરાવવા માટે મનાવી લીધી હતી. મહિલા પણ આ માટે રાજી થઈ ગઈ હતી. 

વિધિને બહાને લઈ ગયો ગેસ્ટહાઉસ
સંધ્યાને દોલતરામ વિધિને બહાને પહેલા રિવરફ્રન્ટ લઈ ગયો અને પછી એકાંતમાં જવું પડશે એવું કહીને ગેસ્ટહાઉસ લઈ ગયો હતો. ગેસ્ટ હાઉસ જઈને મેલી વસ્તુ પકડવા માટે શરીર સંબંધ બાંધવો પડશે એમ કહી જબરદસ્તી કરી હતી. 

દુષ્કર્મનો બનાવ્યો વીડિયો
જુદા જુદા ગેસ્ટહાઉસમાં લઈ જઈને મહિલા સાથે દુષ્કર્મ આચરીને દોલતરામે અશ્લીલ ફોટા અને વીડિયો બનાવ્યા હતા. આ ફોટો અને વીડિયોને આધાર બનાવીને તેણે મહિલાને બ્લેકમેલ કરવાનુ શરૂ કરી દીધુ હતુ અને પછીથી મહિલાની બહેન સાથે પણ જબરજસ્તી શારીરિક સંબધો બનાવ્યા હતા. મહિલા તેની વાત ન માને તો  ફોટો વીડિયો ઈન્ટરનેટ પર નાખવાની ધમકી આપી અવારનવાર દુષ્કર્મ આચરતો હતો. 

પિતાના મોત પછી આવેલા રૂપિયા પણ પડાવી લીધા
મહિલાના પિતા મરી ગયા બાદ વીમાપોલીસી અને અન્ય યોજાનાઓના રૂા. 7 લાખ ઘરમાં આવ્યા હતા. આ માહિતી પણ દોલતરામને મળી હતી જેને પરિણામે દોલતરામે પૈસાની માંગ કરી હતી. મહિલાએ 5 લાખ આપી દીધા હતા. 

મકાન પણ વેચાવી દીધુ
અંધશ્રદ્ધાની હદ તો ત્યારે થઈ જ્યારે મહિલાના મકાનમાં આત્માઓની ચંડાળ ચોકડી છે એટલે જ તેનું અને તેના પરિવારનું અહિત થઈ રહ્યુ છે એવું કહીને મકાન પણ વેચાવી દીધુ હતુ.