શર્મસાર ઘટના / ગુજરાત કઇ દિશા તરફ? રાજકોટના ગોંડલમાં સગીરા સાથે દુષ્કર્મ, સીટી પોલીસે હાથધરી તપાસ

• વોરાકોટડા રોડ પર આવાસ યોજનામાં સગીરા સાથે દુષ્કર્મ
• ગોંડલ સીટી પોલીસે હાથ ધરી તપાસ 
• વડોદરામાં થયેલ દુષ્કર્મના આરોપીઓને રવિવારે પોલીસે ઝડપી પાડ્યા

ઉન્નાવ અને હૈદરાબાદની દુષ્કર્મની ઘટનાએ દેશને હચમચાવી દીધો છે. ત્યારે ગુજરાતમાં વડોદરા, મહેસાણા, પાલીતાણા, જૂનાગઢ, બનાસકાંઠા, દ્વારકા, સુરત, રાજકોટ બાદ હવે ગોંડલમાં દુષ્કર્મની ઘટના સામે આવી છે. જેમાં ગોંડલના વોરાકોટડા રોડ પર આવેલ આવાસ યોજનામાં સગીરા સાથે દુષ્કર્મ આચર્યું હતું. જેને લઇને ગોંડલ પોલીસ દોડતી થઇ છે. ફરિયાદ નોંધવાની તજવીજ શરૂ કરાઇ છે. 

મહત્વનું છે કે, વડોદરામાં સગીરા સાથે દુષ્કર્મના આરોપીઓની અમદાવાદ ક્રાઈમ બ્રાંચે ધરપકડ કરી છે. વડોદરાના તરસાલીથી ક્રાઈમબ્રાંચે બે આરોપીઓની ધરપકડ કરી છે. રાજકોટના 21 વર્ષીય જશા સોલંકી અન આણંદના 28 વર્ષીય કિશનની ધરપકડ થઈ છે. આ બન્ને આરોપીઓને પોલીસે મોબાઈલ લોકેશન અને સ્ક્રેચના આધારે ઝડપી પાડ્યા છે. અમદાવાદ ક્રાઈમ બ્રાંચે તરસાલી વિસ્તારમાં પુછપરછ કરતા આરોપીઓનું લોકેશન મળી આવ્યું હતું. 

બે દિવસ અગાઉ મહેસાણામાં કિશોરી સાથે દુષ્કર્મની ઘટના સામે આવી હતી. શાળાએ જવા નીકળેલી કિશોરી સાથે અજય નામના શખ્સે દુષ્કર્મ આચર્યું હતું. શખ્સે કિશોરીને મારી નાખવાની ધમકી આપી રીક્ષામાં બેસાડી અને વિસનગર નેચરલ પાર્ક પાસે લઇ જઇ દુષ્કર્મ આચર્યું હતું. હાલ પોલીસે ફરિયાદના આધારે તપાસ ચાલી રહી છે.