ઉત્તર પ્રદેશ / ઉન્નાવની ઘટનાની શ્યાહી હજી સુકાઈ નથી ત્યાં ભાજપના આ MLA સામે નોંધાઇ રેપની ફરિયાદ

• ઉત્તર પ્રદેશના ધારાસભ્ય સામે નોંધાઇ ફરિયાદ
• વિધવા મહિલા પર ધારાસભ્ય સહિત અનેક લોકોએ કર્યો બળાત્કાર
• મુંબઇની હોટલમાં એક મહિના સુધી ગોંધી રાખવામાં આવી 

ઉત્તર પ્રદેશના ભદોહીના ભાજપના ધારાસભ્ય રવિન્દ્ર નાથ ત્રિપાઠી સહિત સાત લોકો વિરુદ્ધ ગેંગરેપનો કેસ નોંધવામાં આવ્યો હતો. પોલીસ અધિક્ષક રામ બદનસિંહે કહ્યું કે, એક મહિલાએ 10 ફેબ્રુઆરીએ આરોપ લગાવ્યો હતો. 

7 લોકો સામે નોંધાઇ ફરિયાદ 

જેમાં ભાજપના ધારાસભ્યો રવીન્દ્રનાથ ત્રિપાઠી અને તેના સાથીઓ સંદીપ, સચિન, ચંદ્રભૂષણ, દીપક, પ્રકાશ અને નીતેશે એક હોટલમાં એક મહિના સુધી વારંવાર બળાત્કાર કર્યો હતો. આ ઉપરાંત,તેણી એકવાર તે ગર્ભવતી થતા તેને ફરજીયાત ગર્ભપાત કરવાની ફરજ પાડવામાં આવી હતી.

ધારાસભ્યના ભત્રીજાએ હોટલમાં બોલાવીને કર્યો બળાત્કાર 

વારાણસની રહેવાસી વિધવા મહિલાએ થોડા દિવસો પહેલા પોલીસ અધિક્ષકને મળીને ફરિયાદ કરી હતી કે, 2017 ની વિધાનસભાની ચૂંટણીઓ દરમિયાન ભાજપના ધારાસભ્ય રવીન્દ્રનાથ ત્રિપાઠીના ભત્રીજા સંદીપ ત્રિપાઠીએ તેને ભદોહી બોલાવી હતી અને ભદોહીની એક હોટલમાં ઘણા દિવસો સુધી રાખી હતી. હોટેલમાં ભાજપના ધારાસભ્યએ તેની સાથે બળાત્કાર ગુજાર્યો હતો. તે પછી ધારાસભ્યના ભત્રીજા અને પુત્રોએ પણ બળાત્કાર ગુજાર્યો હતો.

લગ્નની લાલચ આપી ધારાસભ્યના ભત્રીજાએ કર્યો બળાત્કાર 

મહિલાએ પોતાની અરજીમાં આરોપ લગાવ્યો હતો કે 2014 માં તેણી ટ્રેનમાં મુંબઇ મુસાફરી કરી રહી હતી ત્યારે ધારાસભ્ય રવીન્દ્રનાથ ત્રિપાઠીના ભત્રીજા સંદીપ ત્રિપાઠીને મળી હતી. બંને ટ્રેનમાં સારા મિત્રો બન્યા અને બંનેએ એક બીજાના મોબાઇલ નંબર શેર કર્યા. બાદમાં લગ્નના બહાને ધારાસભ્યના ભત્રીજા સંદીપે ઘણાં વર્ષોથી તેનું શારીરિક શોષણ કર્યું હતું.

મહિલાની ફરિયાદને પગલે પોલીસે હાથ ધરી કાર્યવાહી 

મહિલાની ફરિયાદના આધારે ભદોહી કોટવાલીમાં કલમ 376 D, 313, 504, 506 આઈપીસી હેઠળ ગુનો નોંધવામાં આવ્યો છે. ભદોહીના પોલીસ અધિક્ષક રામબદનસિંહે જણાવ્યું હતું કે, ધારાસભ્ય અને અન્ય લોકો વિરુદ્ધ કેસ નોંધીને પોલીસ તપાસમાં લાગી ગઈ છે. વિચાર-વિમર્શ પછી તે મુજબની આગળની કાર્યવાહી કરવામાં આવશે.