રણવીર યશ રાજ પ્રોડક્શનની ફિલ્મ ‘જયેશભાઇ જોરદાર’માં કામ કરશે. આ ફિલ્મના નામ પરથી જ ખબર પડી જાય છે કે ફિલ્મ ગુજરાતી કેરેક્ટર પર છે.
બોલિવુડના એનર્જી કિંગ રણવીર સિંહની આ વર્ષે ફિલ્મ 'ગલી બૉય' રિલીઝ થઇ, જે સુપરહિટ રહી અને તેના એક્ટિંગના ખૂબ જ વખાણ થયા. આ પહેલા રણવીરે 'સિમ્બા' અને 'પદ્માવત' જેવી બેક-ટૂ-બેક હિટ ફિલ્મો આપી. હાલમાં રણવીર કપિલ દેવની બાયોપિક ફિલ્મ '83'માં બિઝી છે. આ ફિલ્મ આગામી વર્ષમાં રિલીઝ થશે. આ સાથે જ રણવીર ફરી એક વખત યશરાજ ફિલ્મ્સમાં કામ કરશે.
તાજેતરમાં જ રણવીર સિંહ પોતાના સોશ્યલ મીડિયા એકાઉન્ટ પર આ વાાતની જાણકારી આપી અને ફોટો પોસ્ટ કરતા લખ્યુ, 'જાદુઇ સ્ક્રિપ્ટ', હું મારી અપકમિંગ ફિલ્મ 'જયેશભાઇ જોરદાર'ને લઇને ખૂબ જ એક્સાઇટેડ છું.આ ફિલ્મની જાહેરાતને લઇને રણવીરે એક વીડિયો પણ પોસ્ટ કર્યો છે જેમાં તે ડેબ્યૂ ડિરેક્ટર દિવ્યાંગ ઠક્કરની સાથે ગુજરાતીમાં વાતો કરી રહ્યો છે.
ઉલ્લેખનીય છે કે, આ ફિલ્મમાં રણવીર ગુજરાતી વ્યક્તિ જયેશભાઇના રોલમાં જ હશે. ફિલ્મ ગુજરાતમાં સેટ છે અને તેમાં હ્યુમર ભરપૂર માત્રામાં હશે. આ એન્ટરટેઇન્મેન્ટ ફિલ્મ બધા લોકો માટે છે. આ ફિલ્મને ડેબ્યુ રાઇટર અને ડિરેક્ટર દિવ્યાંગ ઠક્કર લખવાના અને ડિરેક્ટ કરવાના છે. આ ફિલ્મને મનીષ શર્મા પ્રોડ્યૂસ કરવાના છે.
રણવીર સિંહે અગાઉ સંજય લીલા ભણસાલીની ‘રામલીલા’ ફિલ્મમાં પણ એક ગુજરાતીનો રોલ પ્લે કર્યો હતો. ત્યારબાદ હવે ‘જયેશભાઇ જોરદાર’ ફિલ્મમાં બીજી વખત તે ગુજ્જુના રોલમાં જોવા મળશે. રણવીરને ફિલ્મની સ્ક્રિપ્ટ એટલી બધી પસંદ આવી કે, તે ‘83’ ફિલ્મના શૂટિંગમાં વ્યસ્ત હતો છતાં આ ફિલ્મ માટે તેને તરત ઓકે કહી દીધું હતું. ‘જયેશભાઇ જોરદાર’ ફિલ્મ ‘83’ ફિલ્મ રિલીઝ થયા બાદ રિલીઝ થશે.