ક્રિકેટ / જયદેવ ઉનડકટે રચ્યો ઈતિહાસ: સૌરાષ્ટ્ર માટે આવી કમાલ કરી બતાવનાર પહેલો ખેલાડી બન્યો

• જયદેવ ઉનડકટે બનાવ્યો ખાસ રેકોર્ડ
• રણજી ટ્રોફીમાં સૌરાષ્ટ્ર માટે 300 વિકેટ લેનારા પહેલા ખેલાડી બન્યાં
• બંગાળની આખી ટીમ માત્ર 174 રને ઓલઆઉટ થઇ

સૌરાષ્ટ્રના કેપ્ટન જયદેવ ઉનડકટે એક નવો કીર્તિમાન રચ્યો 

રણજી ટ્રોફી 2022-23ની ફાઈનલ મેચ 16 ફેબ્રુઆરી એટલેકે આજથી શરૂ થઇ છે. આ વખતે રણજી ટ્રોફીની ફાઈનલ મેચમાં બંગાળ અને સૌરાષ્ટ્રની ટીમ આમને-સામને છે. આ મેચના પહેલા દિવસે જ સૌરાષ્ટ્રના કેપ્ટન જયદેવ ઉનડકટે એક નવો કીર્તિમાન પોતાના નામે કર્યો. જયદેવ રણજી ટ્રોફીમાં પોતાની ટીમ સૌરાષ્ટ્ર માટે 300 વિકેટ લેનારા પહેલા ખેલાડી બની ગયા છે. 

જયદેવે બંગાળના ત્રણ બેટરોને પેવેલિયન પાછા મોકલ્યા

જયદેવ ઓસ્ટ્રેલિયા સામે ટેસ્ટ શ્રેણીની 4 મેચ માટે ભારતીય ટીમનો ભાગ હતા. પરંતુ તેમને રણજી ટ્રોફીની ફાઈનલ મેચ રમવા માટે મોકલવામાં આવ્યાં છે. તેમની ટીમ સૌરાષ્ટ્ર આ વખતે ફાઈનલ સુધી પહોંચી છે, જ્યાં ટીમનો સામનો બંગાળથી કોલકત્તાના ઈડન ગાર્ડન સ્ટેડિયમમાં થઇ રહ્યો છે. આ મેચમાં જયદેવ સૌરાષ્ટ્રની આગેવાની કરી રહ્યાં છે અને તેમણે ટૉસ જીતીને પહેલા બોલિંગ કરવાનો નિર્ણય કર્યો. પોતાના આ નિર્ણયને જયદેવે પોતાની પહેલી ઓવરમાં જ વિકેટ લઇને સાચો સાબિત કર્યો અને પછી સરેરાશ 2 રનના સ્કોરે બંગાળના ત્રણ બેટરોને પેવેલિયન પાછા મોકલ્યા. ત્યારબાદ બંગાળની આખી ટીમ માત્ર 174 રને ઓલઆઉટ થઇ ગઇ.

જયદેવે 44 રન આપીને ત્રણ વિકેટ પ્રાપ્ત કરી

આ ઈનિંગમાં જયદેવે 13.1 ઓવરમાં 44 રન આપીને ત્રણ વિકેટ પ્રાપ્ત કરી અને આ સાથે તેઓ સૌરાષ્ટ્ર માટે રણજી ટ્રોફીના ઈતિહાસમાં 300 વિકેટ લેનારા પ્રથમ બોલર બન્યા છે. ડાબોડી ફાસ્ટ બોલરે રણજી ટ્રોફીમાં ડેબ્યુ 2010માં કર્યુ હતુ અને પોતાની 77મી મેચમાં બંગાળના મુકેશ કુમારને આઉટ કર્યા બાદ તેમણે આ સિદ્ધીને પ્રાપ્ત કરી છે.