સાઉથના એક્ટર દગ્ગુબાતીએ 'બાહુબલી' ફિલ્મમાં ભલ્લાદેવની ભૂમિકા ભજવી પોતાની દમદાર એક્ટિંગથી એક મોટો ચાહક વર્ગ ઊભો કર્યો છે. ત્યારે હાલમાં જ દગ્ગુબાતીએ તેના ફેન્સને મોટા સમાચાર આપ્યા છે. તેણે સોશિયલ મીડિયા પર ગર્લફ્રેન્ડ મિહિકા બજાજ સાથે સગાઈ કરવાની જાહેરાત કરીને ફેન્સને ચોંકાવી દીધા છે. તેણે પોતે ટ્વિટ કરીને આ જાણકારી આપી છે.
'બાહુબલી' ફેમ ભલ્લાદેવ એટલે કે દગ્ગુબાતીએ સગાઈની કરી જાહેરાત
ગર્લફ્રેન્ડ મિહિકા સાથેના રિલેશન પર દગ્ગુબાતીએ લગાવી મહોર
દગ્ગુબાતીએ ગર્લફ્રેન્ડ મિહિકા સાથેની એક તસવીર શેર કરીને લખ્યું- અને તેણે હાં કહી દીધું. તસવીરમાં દગ્ગુબાતીની ખુશી તેના ચહેરા પર જોવા મળી રહી છે. તેણે ઈન્સ્ટાગ્રામ પર પણ આ જ તસવીર શેર કરીને ફેન્સને આ અંગે જાણકારી આપી છે.
દગ્ગુબાતીની આ પોસ્ટ પર શ્રુતિ હસન, શ્રિયા પિલગાંવકર, તમન્ના, કૃતિ ખરબંદા સહિતના સેલેબ્સે તેને શુભેચ્છા પાઠવી છે. જ્યારે બોલિવૂડના દિગ્ગજ સ્ટાર અનિલ કપૂરે પણ લખ્યું- 'અભિનંદન, મારા હૈદરાબાદી દીકરા. આ તમારા બંને માટે ખૂબ જ સારું થયું.
તમને જણાવી દઈએ કે, મિહિકા બજાજની એક ઈવેન્ટ મેનેજમેન્ટ કંપની ડ્યૂ ડ્રોપ્સ ડિઝાઈન સ્ટુડિયો નામની ડિઝાઈન ફર્મ છે. તે ઈન્સ્ટાગ્રામ પર તેની પ્રોફેશનલ લાઈફથી જોડાયેલી તસવીરો પણ શેર કરતી રહે છે. જ્યારે રાણા દગ્ગુબાતી પણ સાઉથનો સુપરસ્ટાર છે. તે હિન્દી ફિલ્મ દમ મારો દમ, ડિપાર્ટમેન્ટ, યે જવાની હૈ દિવાની, બેબી, ધ ગાઝી અટેક અને હાઉસફુલ 4 જેવી ફિલ્મોમાં પણ કામ કરી ચૂક્યો છે.
આમ તો સાઉથમાં દગ્ગુબાતી પહેલાંથી જ પોપ્યુલર હતો, પરંતુ બાહુબલી બાદ તેને હિન્દી ફિલ્મ ઈન્ડસ્ટ્રીના દર્શકોમાં ભરપૂર લોકપ્રિયતા મળી છે. આ ફિલ્મમાં ભલ્લાલદેવના નેગેટિવ કેરેક્ટરને લોકોએ ખૂબ પસંદ કર્યો હતો. દગ્ગુબાતીના વર્કફ્રંટની વાત કરીએ તો તે હવે ફિલ્મ હાથી મેરે સાથીમાં જોવા મળશે. આ ફિલ્મ હિન્દી સહિત તેલુગૂ અને તમિલમાં પણ બનાવાવમાં આવશે. ફિલ્મ 2 એપ્રિલે રિલીઝ થવાની હતી પરંતુ કોરોનાને કારણે ફિલ્મ પોસ્ટપોન કરવી પડી છે.