શહેરના તત્કાલીન રામોલ નગરપલિકાના પૂર્વ કાઉન્સિલર મહિલાના ઘરની પાસે ગઇ કાલે મોડી રાત્રે વોન્ટેડ બુલેટગર અને તેના ભાઇઓએ તલવારો લઇને એક કલાક આતંક મચાવતાં સમગ્ર વિસ્તારમાં ચકચાર મચી ગઇ છે.
પૂર્વ કાઉન્સિલરના દિવ્યાંગ ભત્રીજાને બે દિવસ પહેલાં બુટલેગર અને તેના સાગરીતોએ માર માર્યો હતો. ગત મોડી રાત્રે ઝહીર નામનો બુટલેગર પૂર્વ કાઉન્સિલરના ઘર પાસે બાઇક લઇને આવ્યો હતો. જ્યાં તેણે બીભસ્ત ગાળો બોલીને બબાલ શરૂ કરી હતી.
રામોલ વિસ્તારમાં આવેલ સુરતી સોસાયટીમાં રહેતા અનવરઅલી અમજદઅલી સૈયદ પત્ની અંજુમન સૈયદ અને પાંચ પુત્રો સાથે રહે છે. અનવરઅલી એએમટીએસમાં કર્મચારી છે જ્યારે તેમનાં પત્ની તત્કાલીન રામોલ નગરપાલિકાનાં પૂર્વ કાઉન્સિલર હતાં. અનવરઅલીની બાજુમાં તેમના ત્રણ ભાઇઓ પણ તેમના પરિવાર સાથે રહે છે. અનવરઅલીએ કરેલા આક્ષેપ પ્રમાણે આજે તેમના ઘરે સામાજિક પ્રસંગ છે અને નજીકમાં રહેતા કેટલાક માથાભારે બુટલેગરો આ પ્રસંગને ખરાબ કરવા માટેની તૈયારી કરી રહ્યા છે.
પોલીસ સૂત્રોના જણાવ્યા અનુસાર અનવરઅલીના દિવ્યાંગ ભત્રીજા શોએબ પર ૨૫મીની મોડી રાત્રે જુનેદ સહિત કેટલાક બુટલેગરોએ હુમલો કરીને માર માર્યો હતો. આ ઘટનામાં રામોલ પોલીસ બુટલેગર સહિત ચાર શખ્સો વિરુદ્ધમાં અટકાયતી પગલાં લીધાં હતાં જ્યારે બીજી તરફ અનવરઅલીના પુત્ર સહિત ત્રણ યુવકો વિરુદ્ધમાં અટકાયતી પગલાં ભર્યાં હતાં.
શોએબ ૨૫મીએ મોડી રાત્રે ઘરની સામે પોતાની ટ્રાઇસિકલ લઇને આવી રહ્યો હતો ત્યારે બાઇક પર બે યુવકો પુરઝડપે આવ્યા હતા અને શોએબ સાથે માથાકુટ કરતા હતા આ ઘટનાને લઇને મામલો બીચક્યો હતો અને બે ટોળાં સામસામે આવી ગયાં હતાં.
આજે અનવરઅલીના ઘરે સામાજિક પ્રસંગ હોવાથી ગઇ કાલે તેમના ઘરની બહાર મંડપ બાંધ્યો હતો. રાત્રે અનવરઅલીના ઘરે મહેમાનો હતા ત્યારે રાત્રે એક વાગ્યાની આસપાસ જુહાપુરામાં રહેતો અને દારૂનો ધંધો કરતો ઝહીર બાઇક લઇને આવ્યો હતો અને ૨૫મીએ બનેલી ઘટનાની અદાવત રાખીને બીભસ્ત ગાળો બોલતો હતો. ઝહીરની આ હરકતોનું મોબાઇલ રેકોર્ડિંગ અનવરઅલીના પુત્રએ કરી લીધું હતું.
ગુસ્સામાં ઝહીર બાઇક પર સ્ટંટ કરતો હતો ત્યારે તે જમીન પર પટકાયો હતો. ઝહીર બાઇક મૂકીને તેના ઘરે જતો રહ્યો હતો અને થોડાક સમય પછી ઝહીર તેના બુટલેગર ભાઇઓને લઇને આવ્યો હતો. અનવરઅલીના ઘર પાસે ઇરફાન, અકબર, ઇમરાન અનો મોહસીન પેઇન્ટરને અને ખોખરા પોલીસ સ્ટેશનમાં વોન્ટેડ જુનેદને તલવારો અને ધોકા લઇને આવ્યો હતો.
ધાતકી હથિયારો જોઇને અનવરઅલી તેમના પરિવારજનો અને સંબંધીઓ ઘરમાં ઘૂસી ગયા હતા. એક કલાક સુધી તમામ બુટલેગરોએ તેમના ઘર પાસે આતંક મચાવ્યો હતો અને મંડપને તલવારો મારી હતી. અનવરઅલીએ તરત જ પોલીસ કંટ્રોલ રૂમમાં જાણ કરી હતી પરંતુ રામોલ પોલીસ મોડી પહોંચતાં તેઓ ઘરમાં પુરાઇ રહ્યા હતા. પોલીસ આવી ત્યારે બુટલેગરો નાસી ગયા હતા અને અનવરઅલીએ તેમના વિરુદ્ધમાં ફરિયાદ કરી હતી.
આજે સવારે અનવરઅલીના ઘરે સામાજિક પ્રસંગ શરૂ થયો હતો ત્યારે ઝહીર એક સ્વીફ્ટ કાર લઇને આવ્યો હતો અને ખુલ્લા પ્લોટમાં સ્ટંટ કરતો હતો. કારમાં વોન્ટેડ જુનેદ સહિત બે યુવકો બેઠા હતા. કારનો સ્ટંટ કરીને ઝહીર ત્યાંથી જતો રહ્યો હતો. રામોલ પોલીસ સ્ટેશનના પોલીસ ઇન્સ્પેક્ટર કે.એસ.દવેએ જણાવ્યું કે મોડી રાત્રે સુરતી સોસાયટીમાં બબાલ હતી પરંતુ તે પડોશી પડોશીની બબાલ છે.
બે દિવસ પહેલાં પણ તેમની અંદોરઅંદર બબાલ થઇ હતી. જેમાં પોલીસ બન્ને પક્ષે અટકાયતી પગલાં ભર્યાં હતાં. મોડી રાત્રે ધમાલ મચાવનાર યુવક વોન્ટેડ છે તેની અમને જાણ નથી પરંતુ અમે તે મામલે તપાસ કરીશું. હાલ અનવરઅલીની ફરિયાદના આધારે અમે તપાસ શરૂ કરી છે.
ઉલ્લેખનીય છે કે પોલીસ ચોપડે વોન્ટેડ આરોપી બિન્દાસ જાહેરમાં આ રીતે ધમાલ મચાવીને રીતસરનો આતંક મચાવે છે પરંતુ પોલીસના પેટનું પાણી પણ હાલતું નથી. ગત મહિને રામોલ વિસ્તારમાં બે ગેંગ વચ્ચે થયેલા ઝઘડાને રામોલ પોલીસે હળવાશથી લેતાં બે યુવકોના મોત થયાં હતાં. ત્યારે પોલીસ આ ઘટનાને પણ હળવાશથી લઇ રહી છે.