અમદાવાદના રામોલ પોલીસ સ્ટેશનની હદમાં થયેલ દુષ્કર્મની ઘટનામાં ફરાર વધુ એક આરોપીની ધરપકડ રામોલ પોલીસે કરી છે. રામોલ પોલીસએ રાજેશ સુથાર નામના આરોપીની ધરપકડ કરી વધુ તપાસ હાથ ધરી છે.
પોલીસના જણાવ્યા મુજબ, આરોપી રાજેશે પીડિત યુવતી સાથે ગત જૂન મહિનામાં દુષ્કર્મ આચર્યુ હતુ. આરોપીએ પીડિતાને પોતાના ઘરે બોલાવીને દુષ્કર્મ આચર્યુ હતુ. ત્યારે પોલીસે આરોપી રાજેશના ડીએનએ ટેસ્ટ કરાવ્યા બાદ વધુ મૃતકના ડીએનએ સાથે સરખાવશે.
ઉલ્લેખનીય છે કે, આ દુષ્કર્મના ગુનામાં અગાઉ બે આરોપી અંકિત અને ચિરાગની પણ ધરપકડ થઈ ચૂકી છે. જોકે, હજુ એક આરોપી હાર્દિક શુક્લ ફરાર હોવાથી પોલીસે એ દિશામાં પણ તપાસ હાથ ધરી છે. આ આરોપીઓની ધરપકડ બાદ ચારેય આરોપીઓની એક બીજા સાથે કોઈ સાંઠ ગાંઠ છે કે નહીં તે તપાસ હાથ ધરાશે.
અમરાઇવાડીની ૨૦ વર્ષીય વિદ્યાર્થિનીને એટીકેટીમાં પાસ કરાવી આપવાની લાલચ આપી સામૂહિક દુષ્કર્મ આચર્યા બાદ ગર્ભવતી બનાવી હતી. છેવટે યુવતીનો ગર્ભપાત બાદ 40 દિવસ સુધી પોલીસે કોઈ કાર્યવાહી નહીં કરતા યુવતીનું મોત નિપજયુ હતુ. પોલીસે યુવતીના મોતના ગણતરીના કલાકોમાં બે આરોપીને પકડી પાડયા હતા. જ્યારે હજુ એક આરોપી પોલીસ પકડથી દૂર છે. ત્યાં પકડાયેલા આરોપીઓ પૈકીનો અંકીત પારેખ એબીવીપીનો કાર્યકર હોવા છતા ઉચ્ચ પોલીસ અધિકારીઓ તેને બચાવવા માટે ઘમપછાડા કરી રહ્યા છે.
ભોગ બનેલી યુવતી ગરીબ પરિવારની હોવાથી ઉચ્ચ પોલીસ અધિકારી દ્વારા તપાસ સ્થાનિક પોલીસને સોંપી છે. ખરેખર આવા ગંભીર કેસની તપાસ ક્રાઈમ બ્રાન્ચ અથવા મહિલા પોલીસને સોંપવી જોઈએ. બીજી તરફ પકડાયેલા બે આરોપીઓએ પીડીતા સાથે દુષ્કર્મ આચર્યુ હોવાની કબૂલાત કરી હોવાનું પોલીસ રટણ કરી રહી છે. જો કે, પોલીસ સમક્ષ આરોપી દ્વારા આપેલા નિવેદન કાયદામાં માન્ય નથી.