BIG BREAKING / પોલીસે ફરી પોપ્યુલર બિલ્ડર્સ ગ્રુપના રમણ પટેલની આ કેસમાં કરી ધરપકડ, રિમાન્ડ પણ મંજૂર, જાણો શું છે સમગ્ર ઘટના

• પોપ્યુલર બિલ્ડર્સ ગ્રુપના રમણ પટેલની ધરપકડ
• ટ્રાન્સફર વોરંટથી બોપલ પોલીસે કરી ધરપકડ
• જમીન કૌભાંડ કેસમાં કોર્ટે 1 દિવસના રિમાન્ડ મંજૂર કર્યા

પોપ્યુલર બિલ્ડર્સ ગ્રુપના રમણ પટેલ અને દશરથ પટેલ ફરીવાર વિવાદમાં આવ્યા છે. પોપ્યુલર બિલ્ડર્સના રમણ પટેલની ટ્રાન્સફર વોરંટથી બોપલ પોલીસે ધરપકડ કરી છે. ગોધાઈ ગામની જમીન કૌભાંડ કેસમાં મૃતક ખેડૂતના ડમી વારસાઈ બનાવીને છેતરપિંડી કરવામાં આવી હતી. રમણ પટેલ સહિત 3 વિરુદ્ધ ફરિયાદ થઈ હતી. હાલમાં આરોપીના 1 દિવસના રિમાન્ડ કોર્ટે મંજૂર કર્યા છે. જાણો શું હતો જમીન કૌભાંડ કેસ.

જમીન કૌભાંડમાં મૃતકના ડમી વારસાઈ ડોક્યુમેન્ટ બનાવીને કરી હતી છેતરપિંડી
સમગ્ર ઘટના એવી છે કે ગોધાવી ગામમાં આવેલી કરોડો રૂપિયાની જમીનના ડમી વારસાઈના ડોક્યુમેન્ટ બનાવીને પચાવી દીધી હોવાની ફરિયાદ બોપલ પોલીસ સ્ટેશનમાં નોંધાઇ હતી.જેમાં પોપ્યુલર બિલ્ડર્સ ગ્રુપના બે ભાઈ રમણ પટેલ અને દશરથ પટેલ તેમજ સરયુદાસ બાવા દ્વારા ડમી ડોક્યુમેન્ટ બનાવીને જમીન પચાવીને કૌભાંડ આચર્યું હોવાનો આક્ષેપ છે. આ ફરિયાદને લઈને બોપલ પોલીસે રમણ પટેલની જેલમાંથી ટ્રાન્સફર વોરંટથી ધરપકડ કરી.

આ કૌભાંડમાં રમણ પટેલના ભાઈ દશરથ પટેલનું નામ પણ સામેલ
પોપ્યુલર ગ્રુપના બિલ્ડર રમણ પટેલ વિરુદ્ધ અગાઉ થલતેજની 600 કરોડની જમીન કૌભાંડને લઈને ફરિયાદ થઈ હતી. ત્યારે ફરી બોપલના ગોધાવી ગામની જમીન પચાવી દીધી છે. આ કેસમાં આરોપીએ આ ગામમાં જમીનના ખેડૂત શત્રુઘ્નદાસજીનું ફેબ્રુઆરી 1991 મૃત્યુ પામ્યા હતા. આ જમીનના વારસદાર તરીકે તેમનો પુત્ર ગોરધનદાસજીના નામના બદલે આરોપીઓએ સરયુદાસ બાવા નામના વ્યક્તિનું ખોટા ડોક્યુમેન્ટનો ઉપયોગ કરીને વારસાઈ નોંધ કરાવી. આ જમીન ખોટા દસ્તાવેજ દ્વારા રમણ પટેલ અને દશરથ પટેલએ વેચાણ દસ્તાવેજ કરાવીને કૌભાંડ આચર્યું હતું. આ કૌભાંડમાં રમણ પટેલના ભાઈ દશરથ પટેલનું પણ નામ હોવાથી પોલીસે દશરથ પટેલની પણ ધરપકડની કાર્યવાહી શરૂ કરી છે.

રમણ પટેલની ધરપકડ બાદ કોર્ટે એક દિવસના રિમાન્ડ મંજૂર કર્યા
ગોધાવી ગામની જમીન કૌભાંડ માં ટ્રાન્સફર વોરંટથી રમણ પટેલની ધરપકડ બાદ કોર્ટે એક દિવસના રિમાન્ડ મંજૂર કર્યા છે. હાલમાં આ જમીન કૌભાંડ કેસની તપાસ LCB ને સોંપવામાં આવી છે. LCB એ આ કેસમાં વારસાઈ બનનાર સરયુદાસ બાવા કોણ છે અને આ કૌભાંડમાં અન્ય કોઈ સંડોવાયેલા છે કે નહીં તે મુદ્દે તપાસ શરૂ કરી છે.