રાજકોટની કોલેજના પ્રોફેસર પર વિદ્યાર્થિનીઓ દ્વારા ગંભીર આરોપ લગાવવામાં આવતા ખળભળાટ મચી ગયો છે. આ ઘટનાના સમગ્ર જિલ્લામાં ઘેરા પડઘા પડ્યા છે. શિક્ષણ જગતને કલંકિત કરતી આ ઘટનાને લઈને અનેક સવાલ ઉઠી રહ્યા છે.
વીરબાઈમા કોલેજમાં પ્રોફેસરે બે વિદ્યાર્થિની પાસે કરી અભદ્ર માંગ
45 દિવસ બાદ ઘટનાની તપાસ શરૂ કરવામાં આવી
કૉલેજના સંચાલકોએ તપાસ માટે બનાવી કમિટી
રાજકોટમાં શિક્ષણજગતને શર્મસાર કરતી ઘટના સામે આવી છે. શિક્ષણના ધામમાં પ્રોફેસરે વિદ્યાર્થિનીઓ પર નજર બગાડી વિદ્યાર્થિનીઓ પાસે અભદ્ર માંગ કરી હોવાના આક્ષેપો કરાતા શિક્ષણજગતમાં ખળભળાટ મચી ગયો છે. 2 વિદ્યાર્થિનીઓ દ્વારા સાયન્સના પ્રોફેસર પર ગંભીર આક્ષેપો લગાવવામાં આવતા કોલેજના સંચાલકોએ તપાસ માટે કમિટી બનાવી છે. સત્ય વિગતો તપાસ કમિટીના રિપોર્ટ બાદ જ બહાર આવશે.
સપ્ટેમ્બર મહિનામાં વિદ્યાર્થિનીઓએ કરી હતી અરજી
આ અંગે પ્રાપ્ત વિગતો અનુસાર, રાજકોટના કાલાવડ રોડ પર આવેલી માતૃશ્રી વીરબાઈમા મહિલા કોલેજમાં અભ્યાસ કરતી બે વિદ્યાર્થિનીએ પ્રોફેસર પર સણસણતા ગંભીર આક્ષેપો લગાવતા હડકંપ મચી ગયો હતો. વિદ્યાર્થિનીઓના આક્ષેપ મુજબ, સાયન્સના પ્રોફેસર સંજય તેરૈયાએ માર્કસ વધુ આપવાની લાલચ આપી અભદ્ર માંગ કરી હતી. જેથી બંને વિદ્યાર્થિનીએ સપ્ટેમ્બર મહિનામાં એન્ટિ સેક્સ્યુઅલ હેરેસમેન્ટ સેલને અરજી કરી હતી.
દોઢ મહિના બાદ કરાઈ તપાસ કમિટીની રચના
જોકે, અરજી થયાના દોઢ મહિના સુધી કોઈ કાર્યવાહી કરવામાં ન આવતા બંને વિદ્યાર્થિનીઓએ ફરીથી કોલેજના સંચાલકોને રજૂઆત કરી હતી. વિદ્યાર્થિનીઓની અરજીના દોઢ મહિના બાદ તપાસ કમિટીની રચના કરવામાં આવી હતી. એવું ચર્ચાઈ રહ્યું છે કે, પ્રિન્સિપાલએ અરજી 45 દિવસ દબાવી રાખી હતી. ત્રણ મહિના પહેલાના બનાવની મોડેમોડે તપાસ શરૂ કરાઈ હતી.
કમિટીના રિપોર્ટ પછી કાર્યવાહી કરાશેઃ પ્રિન્સિપાલ
આ અંગે પ્રિન્સિપાલ કલ્પેશ ગણાત્રાએ જણાવ્યું હતું કે, ઓગસ્ટ અથવા સપ્ટેમ્બરમાં બે અલગ-અલગ વિદ્યાર્થિનીએ અરજી કરી છે. બંનેએ સાયન્સના પ્રોફેસર સંજય તેરૈયા સામે ગંભીર આક્ષેપો કર્યા છે. સાયન્સની બંને વિદ્યાર્થિનીઓને એક્સટર્નલ માર્કસ પૂરે પૂરા આપવાની લાલચ આપીને તાબે થવાની માંગ પ્રોફેસરે કરી હોય તેવી ચર્ચા છે. આ મામલે હાલના તબક્કે કંઈ પણ જણાવવું યોગ્ય નથી. આ અંગે કમિટી તપાસ ચલાવી રહી છે. જેનો રિપોર્ટ આવ્યા બાદ કાર્યવાહી કરવામાં આવશે.