રાજકોટ / ગુજરાતી ગીત પર ટિકટોક બનાવવા યુવકે સરબતના બદલે ધુળેટીના કલરનું પાણી પીધું અને થયું આવું...

• રાજકોટમાં ટીકટોકની ઘેલછા યુવકને પડી ભારે 
• વીડિયો બનાવવા યુવકે હોળીના કલરનુ પીધુ પાણી 
• હોળીના કલરવાળુ પાણી સરબત તરીકે પીતા તબીયત લથડી 

ટિકટોકમાં વીડિયો બનાવવા યુવકે જીવ જોખમમાં નાખ્યો હોવાનું સામે આવ્યું છે. રાજકોટના સાંગધ્રામાં ખેતી કામ કરતા પરિવારને મદદરૂપ થતો કાનજી ડાભી નામનો 21 વર્ષીય યુવકે ઘરે ધુળેટીનો કલર પી જતાં તેની ઝેરી અસર થઇ હતી. યુવકને ઉલ્ટીઓ થવા લાગતા તેને સ્થાનિક સારવાર લીધા બાદ તાત્કાલિક મોરબી હોસ્પિટલમાં ખસેડાયો હતો. ત્યાંથી વધુ સારવાર માટે રાજકોટ સિવિલ હોસ્પિટલમાં ખસેડવામાં આવ્યો હતો.

ઘરમાં સરબત ન હતું તો તે ધુળેટીનો રંગ પી ગ્યોઃ કાનજીનો ભાઇ

હોસ્પિટલ ચોકીના સ્ટાફે જરૂરી કાર્યવાહી કરી હતી અને મુળી પોલીસને જાણ કરી હતી. કાનજીના ભાઇ હીરાએ જણાવ્યું હતું કે અમે લોકો પ્રસંગમાં બહાર ગામ ગયા હતાં. આ દરમિયાન કાનજી ઘરે એકલો હતો અને તેણે ટિકટોકમાં કોઇ ગુજરાતી ગીત પર પોતાનો વિડીયો બનાવવો હતો. એ ગીતમાં સરબત પીવાનું હતું. પરંતુ ઘરમાં સરબત ન હોવાથી કાનજીએ ધુળેટી વખતનો લીલો રંગ પડ્યો હતો તેને પાણીમાં ભેળવ્યો અને તેનું સરબત બનાવ્યું હતું. ત્યારબાદ વીડિયો બનાવતી વખતે આ પાણી પીવાનો દેખાવ કરવાને બદલે તે સાચે પી ગયો હતો. ત્યારબાદ તેને ઝેરી અસર થઇ હતી. તેની હાલત બગડતા હોસ્પિટલ ખસેડાયો હતો.

કાનજીએ શું કહ્યું?

કાનજીએ કહ્યું કે, કોઇ ગુજરાતી ગીત હતું તેના પર મારે ટિકટોક વિડીયો બનાવવો હતો. મેં વિડીયો બનાવી પણ લીધો હતો, જોકે બાદમાં ડિલીટ કરી નાંખ્યો હતો. કયુ ગીત હતું એ મને યાદ નથી. ગીતમાં સરબત પીવાનું હતું. પણ સરબત ન હતું તો મેં કલરવાળુ પાણી બનાવ્યું હતું અને એ પીવાઇ ગયું હતું. જોકે હવે તેની તબિયતમાં સુધારો થયો છે.