બેજવાબદાર / રાજકોટનાં આ ગામની મહિલા તલાટીએ આખરે એવી શું ભૂલ કરી કે પંચાયતનાં તમામ રેકર્ડ કર્યા સ્વાહા!

આ ઘટનામાં એક યુવાને પોતાની તલાટી મહિલા મિત્રને મદદ કરવાને બહાને પોતાના જૂના વેરને એવો તો અંજામ આપ્યો છે કે આજે તેને પોલીસ કસ્ટડીમાં અનેક સવાલોનો સામનો કરવો પડી રહ્યો છે. આ યુવાનનું નામ છે બ્રિજરાજ સિંહ સરવૈયા ઉરફે બિટુભા અને તે યુવતી કે જેનાં પર ગ્રામ વિકાસનાં કામની જવાબદારી હતી. સરકારે તેને તલાટી કમ મંત્રીનાં હોદ્દા પર બેસાડી હતી. પરંતુ તેની કરણીએ આજે તેને સમાજમાં પોતાનો ચહેરો ઢાંકી રાખવા મજબૂર કરી દીધી છે. એ યુવતીનું નામ છે કાજલ પરમાર.

કાજલ પરમાર કે જે રાજકોટ જિલ્લાના ખીરસરા ગામમાં તલાટી તરીકે ફરજ બજાવતી હતી. એક તલાટી તરીકે ગામમાંથી વેરાની વસૂલાત અને બીજા અનેક કામો કરવાના હોય છે. પરંતુ તલાટી કાજલ પરમાર સમયસર પોતાની કામગીરી પૂર્ણ કરી શકી નહીં. આથી પોતાની ફરજમાં થયેલી નિષ્ફળતા છૂપાવવા તેણે પોતાના મિત્ર બ્રિજરાજસિંહની મદદ લઈને ખિરસર ગ્રામપંચાયતનાં રેકર્ડ ચાંપી દીધી.

ખીરસરા ગામનાં અગત્યનાં રેકર્ડ અને વેરા પહોંચ બુક કે હાલમાં જે આગમાં સ્વાહા થઇ ગયા છે. તેનો પ્લાન કાજલે અગાઉ ઘડી કાઢયો હતો અને પંચાયતનાં રેકર્ડને આગ ચાંપવાના પ્લાનને કાજલનાં મિત્ર બ્રિજરાજસિંહે દિવાસળી ચાંપીને અંજામ આપ્યો હતો. હાલમાં આ બન્ને આરોપીઓ પોલીસની અટકાયતમાં છે. આ ઘટનાને કાજલ અને બ્રિજરાજસિંહે ખૂબ ખતરનાક રીતે અંજામ આપ્યો હતો.

ગ્રામ પંચાયતનાં તમામ રેકર્ડ જે હવે રાખ થઇ ગયા છે. આ પાછળ જવાબદાર છે માત્ર એક સરકારી મહિલાકર્મીની આળસ અને ગ્રામપંચાયતનાં એક પૂર્વ કર્મચારીની બદલાની આગનું પરિણામ. લાગે છે કે આવા તત્વોનાં કારણે જ સરકારે નહીં પરંતુ ગામનાં નાગરિકોને પણ વટીવટી કામનાં નિરાકરણમાં વિક્ષેપ પડે છે. હાલમાં તો બન્ને આરોપીઓ પોલીસ કસ્ટડીમાં છે. જો કે, તે પછી ટીડીઓ દ્વારા પણ આ મામલે વધુ તપાસ કરવાની તૈયારી થઈ રહી છે.  

આ ઘટના આંખ ખોલનારી છે.  સરકારી કર્મચારી જ્યારે અસામાજિક તત્વોનો સાથ લઈને સરકારની અને સમાજની મિલકતને નુકસાન પહોંચાડે છે સામાન્ય નાગરિકોના કામ ખોરંભે ચડે છે. અને આવા આરોપી પછીથી સરળતાથી છૂટી જાય છે.. વહીવટી તંત્ર, અને પોલીસે આવા આરોપી વિરુદ્ધ દાખલારૂપ પગલાં લેવાની જરૂર છે.