એક્શન / ઉદય શિવાનંદ કોવિડ હોસ્પિટલમાં અગ્નિકાંડ મામલે પોલીસે ડૉક્ટર્સની પૂછપરછ બાદ કરી આ પ્રથમ કાર્યવાહી

• ઉદય શિવાનંદ કોવિડ હોસ્પિટલ અગ્નિકાંડ મામલો
• ડો.પ્રકાશ મોઢા સહિત 3 ડોક્ટર્સની ધરપકડ
• તાલુકા પોલીસે આરોપીઓની કરી ધરપકડ

ઉદય શિવાનંદ કોવીડ હોસ્પિટલમાં લાગેલ આગ મામલે પોલીસ નામાંકિત 5 તબીબી વિરૂદ્ધ ગુનો નોંધાયો હતો. ત્યારે હવે તાલુકા પોલીસ દ્વારા 3 ડૉક્ટર્સની ધરપકડ કરવામાં આવી છે. જેમાં ડો.પ્રકાશ મોઢા, ડો.વિશાલ મોઢા અને ડો.તેજસ કરમટાની ધરપકડ કરાઇ છે. આ તમામ આરોપીના કોરોના ટેસ્ટ નેગેટિવ આવતા ધરપકડ કરવામાં આવી છે. મહત્વનું છે કે આ કોવિડ હોસ્પિટલમાં આગ લાગતા 5 લોકોના મૃત્યુ થયા હતા. જેની તપાસ ચાલી રહી છે.

જેનો રોલ સામે આવશે તેની ધડપકડ થશેઃ રાજકોટ પોલીસ

રાજકોટની ઉદય શિવાનંદ કોવિડ હોસ્પિટલમાં લાગેલી આગ મામલે ગઇકાલે રાજકોટ પોલીસે પત્રકાર પરિષદ યોજી હતી. જેમાં DCP મનોહરસિંહ જાડેજાએ જણાવ્યું હતું કે, ઘટનામાં જેનો રોલ સામે આવશે તેની ધરપકડ થશે. અગ્નિકાંડ મુદ્દે 304-A મુજબ પોલીસે ગુનો દાખલ કર્યો છે. અત્યારે 5 આરોપીની પૂછપરછ ચાલે છે. જેમાં ગોકુલ હેલ્થકેરના પ્રકાશ મોઢા, વિશાલ મોઢા, તેજસ મોતીવારસ, તેજસ કરમટા અને દિગ્વિજયસિંહ જાડેજા સામે ફરિયાદ નોંધાઇ છે. ડૉ. વિશાલ મોઢાએ કોવિડ હોસ્પિટલની મંજૂરી માંગી હતી.

રાજ્ય સરકારે રાજકોટ કાંડમાં પંચની સત્તાવાર કરી જાહેરાત 

રાજકોટ શિવાનંદ હોસ્પિટલમાં આગનો મામલે રાજ્ય સરકાર દ્વારા હાઇકોર્ટના નિવૃત જજ ડી. એ મહેતાની અધ્યક્ષતામાં પંચની રચના કરવામાં આવી છે. અગાઉ જસ્ટીસ કે. એ. પુંજની અધ્યક્ષતામાં પંચની જાહેરાત થઇ હતી. જસ્ટીસ પુંજ અન્ય મામલા વ્યસ્ત હોવાથી જસ્ટીસ મહેતાને જવાબદારી છે.