રાજકોટઃ શહેરની ભક્તિનગર પોલીસે બાતમીને આધારે તુક્કલનો મોટો જથ્થો ઝડપી પાડ્યો છે. ભક્તિનગર પોલીસને બાતમી મળી હતી કે તેમનાં વિસ્તારમાં ગેરકાયદેસર તુક્કલનું વેચાણ કરવામાં આવે છે.
પોલીસે ડમી ગ્રાહક મોકલીને 390 નંગ જેટલી ચાઈનીઝ તુક્કલો ઝડપી પાડી છે. તુક્કલ સાથે પોલીસે ધર્મેશ રાણપરીયા નામનાં વેપારીની પણ ધરપકડ કરી છે. પોલીસે કુલ 7800 રૂપિયાનો મુદ્દામાલ કબ્જે કરીને આગળની કાર્યવાહી હાથ ધરી છે.
તો બીજી બાજુ શહેરમાંથી પણ ચાઈનીઝ દોરી ઝડપાઈ છે. ક્રાઈમ બ્રાંચે જંક્શન વિસ્તારમાંથી ચાઈનીઝની 21 જેટલી ફિરકીઓ ઝડપી પાડી. ક્રાઈમ બ્રાંચે ચાઈનીઝ દોરી સાથે જયકિશન આહુજા નામનાં શખ્સની પણ અટકાયત કરી છે. ક્રાઈમ બ્રાંચે મુદ્દામાલ કબ્જે કરીને આ મામલે આગળની કાર્યવાહી હાથ ધરી છે.
મહત્વનું છે કે રાજકોટ જિલ્લા કલેકટરે ગઇ કાલનાં સાંજથી જ જિલ્લામાં ચાઇનીઝ દોરી-તુક્કલ વેચતાં વેપારીઓ ઉપર દરોડાનો દોર શરૂ કર્યો છે. ત્યારે કલેકટરે પણ તમામ વિસ્તારને પોતાનાં તાલુકામાં દરોડાં પાડીને આવાં વેપારીઓને લપેટી તેઓની ઉપર સખ્ત કાર્યવાહી કરવાનો આદેશ કર્યો હતો.
ત્યાર બાદ શહેરની ઘણી બધી દુકાનોમાં દરોડાં પાડવામાં આવ્યાં હતાં. ત્યારે શહેરનાં ભક્તિનગર વિસ્તારમાંથી ગેરકાયદેસર તુક્કલોનું વેચાણ કરનાર વેપારીની ધરપકડ કરીને 390 નંગ જેટલી ચાઇનીઝ તુક્કલો ઝડપવામાં આવી હતી.