રાજકોટમાં ટ્રાફિક પોલીસે છેલ્લા પાંચ વર્ષમાં 180 કરોડનો ફટકાર્યો દંડ, ઠેર ઠેર સીસીટીવી હોવાને કારણે શહેરીજનોને આવી રહ્યા છે ઇમેમો, વાહનચાલકોએ ટ્રાફિક પોલીસ સામે કર્યા આક્ષેપ
રાજકોટને સુરક્ષિત રાખવા માટે આઇવે પ્રોજેક્ટ શરૂ કરવામાં આવ્યો. શહેરમાં ચોરી, લૂંટફાટ જેવી પ્રવૃત્તિઓ રોકવા માટે થર્ડ આઇનું પ્રોટેક્શન આપવામાં આવ્યું. જેની પાછળ 70 કરોડનો ખર્ચ કરવામાં આવ્યો પરંતુ આ કરોડોના ખર્ચે વસાવેલા સીસીટીવી ઇમેમોમાં બહુ ચર્ચાસ્પદ બન્યા છે. કારણ કે રાજકોટ વાસીઓને છેલ્લા પાંચ વર્ષમાં ટ્રાફિક પોલીસે 180 કરોડનો દંડ ફટકાર્યો છે.
છેલ્લા પાંચ વર્ષમાં ટ્રાફિક પોલીસે 180 કરોડનો દંડ ફટકાર્યો
જી, હા રાજકોટમાં થર્ડ આઇ પ્રોટેક્શનની સુવિધા આપવામાં આવી છે. ઠેર ઠેર સીસીટીવીની નિગરાની છે. પરંતુ આ સીસીટીવીનો ખરો ઉપયોગ તો ટ્રાફિક પોલીસે જ કર્યો હોય તેમ લાગી રહ્યું છે કારણ કે રાજકોટમાં છેલ્લા પાંચ વર્ષમાં ટ્રાફિક પોલીસે 180 કરોડનો દંડ ફટકાર્યો. વળી તે કુલ વાહનોની સંખ્યા કરતા બમણાથી પણ વધારે. અત્યાર સુધીમાં રાજકોટ ટ્રાફિક પોલીસે 24.30 લાખ નાગરિકોને ઇ-મેમો ફટકાર્યો. જો કે 150 કરોડનો દંડ ભરવાનો બાકી છે. પરંતુ રાજકોટ વાસીઓ ટ્રાફિક પોલીસના આ વર્તનથી હેરાન પરેશાન થઇ ગયાછે, રાજકોટ માટે આઇવે સીસીટીવી પ્રોજેક્ટ દંડાત્મક બની રહ્યો હોય તેમ લાગી રહ્યું છે. સીસીટીવી કેમેરાનો ઉપયોગ ગુનાહિત પ્રવૃત્તિ અટકાવવા ઉપયોગ થાય તે સારી વાત છે પરંતુ ટ્રાફિક પોલીસે તેનો મિસયુઝ કર્યો હોવાનો વાહનચાલકો આરોપ લગાવી રહ્યા છે.
પહેલા ટ્રાફિકના નિયમોની સાચી સમજ આપો પછી દંડ ફટકારો-શહેરીજન
આ અંગે રાજકોટવાસીઓએ આક્ષેપ કરતા જણાવ્યું કે કોઇપણ ટ્રાફિક સિગ્નલ પર પોલીસ ક્યારેય કાર્યરત હોતા નથી. મોટા ભાગે સાઇડમાં જ ઉભેલી હોય છે. શહેરીજનોને ટ્રાફિકના સામાન્ય નિયમો બરાબર સમજાવવાની જરૂર છે.
તેમણે એમ પણ જણાવ્યુ કે ઘણા નાગરિકોને ખબર નથી હોતી કે વન વે કોને કહેવાય, ઝિબ્રા ક્રોસિંગનો ઉપયોગશા માટે છે. પોલીસે મસમોટા દંડ ફટકારવાને બદલે પબ્લિકને પહેલા નિયમોની સાચી સમજ આપે તેમ જણાવ્યું હતું.