નિવેદન / છેલ્લા 6 મહિનાના ઇ-મેમો બાકી હોય તો ભરી દેજો નહીં તો કોર્ટમાં કેસ થશે દાખલ, રાજકોટ ટ્રાફિક ACPએ શું કહ્યું જુઓ

• રાજકોટમાં કરોડોના ઈ-મેમો વસૂલાત બાકીનો મામલો
• રાજકોટમાં બાકી ઈ-મેમોને લઈને ટ્રાફિક પોલીસનું નિવેદન
• છેલ્લા 6 મહિનાના મેમો નહિ ભરાય તો કોર્ટમાં NC કેસ દાખલ થશેઃ ACP

રાજકોટમાં કરોડોના ઈ-મેમો વસૂલાત બાકી હોવા મામલે ટ્રાફિક પોલીસનું મહત્વનું નિવેદન સામે આવ્યું છે. રાજકોટ ટ્રાફિક પોલીસ ACP વી.આર.મલ્હોત્રાએ જણાવ્યું કે, 'રાજકોટમાં આશરે 23 લાખ ઇ-મેમો પેન્ડિંગ છે. 147 કરોડ રૂપિયાના ઇ-મેમો દંડ વસુલવાના બાકી છે. છેલ્લા 6 મહિનામાં 1.25 લાખ જેટલા ઇ-મેમો ઈશ્યુ થયા છે. 63,000 કેસ લોક અદાલતમાં રજૂ કરાશે. છેલ્લા 6 મહિનાના મેમો નહીં ભરાય તો કોર્ટમાં NC કેસ દાખલ થશે. 6 મહિના પહેલાના મેમો નહીં વસૂલવાનો હાઇકોર્ટનો કોઈ જ હુકમ નથી. હાલમાં પોલીસ 6 મહિના પહેલાના ઇ મેમો વસૂલતા નથી.'

રાજકોટમાં ઇ-મેમોને લઇ લોકો પીસાઈ રહ્યાં છે: MLA ગોવિંદ પટેલ

જો કે, બીજી બાજુ રાજકોટ પોલીસની ઇ-મેમોની કાર્યવાહીને લઇને MLA ગોવિંદ પટેલે આજે ગૃહ રાજ્યમંત્રીને રજૂઆત કરતા જણાવ્યું કે,  'રાજકોટમાં ઈ-મેમો ભરવાને લઈને લોકોમાં રોષ જોવા મળી રહ્યો છે. રાજકોટમાં 5 વર્ષમાં રૂપિયા 180 કરોડનો દંડ ફટકારવામાં આવ્યો છે. જેથી લોકો પીસાઈ રહ્યાં છે.' વધુમાં તેમણે રજૂઆત કરી કે, 'રાજકોટમાં અત્યાર સુધી 24.30 લાખ નાગરિકોને ઈ-મેમો ફટકારવામાં આવ્યા છે. જેમાંથી 75 ટકા વાહન ચાલકોએ 150 કરોડ રૂપિયાનો દંડ ભરવાનો હજુ બાકી છે.'

રાજકોટમાં થર્ડ આઇવે પ્રોજેક્ટ પાછળ રૂ. 70 કરોડનો ખર્ચ કરવામાં આવ્યો

તમને જણાવી દઇએ કે, રાજકોટને સુરક્ષિત રાખવા માટે આઇવે પ્રોજેક્ટ શરૂ કરવામાં આવ્યો છે. શહેરમાં ચોરી, લૂંટફાટ જેવી પ્રવૃત્તિઓ રોકવા માટે થર્ડ આઇનું પ્રોટેક્શન આપવામાં આવ્યું. જેની પાછળ 70 કરોડનો ખર્ચ કરવામાં આવ્યો પરંતુ આ કરોડોના ખર્ચે વસાવેલા સીસીટીવી ઇમેમોમાં બહુ ચર્ચાસ્પદ બન્યા છે. કારણ કે રાજકોટ વાસીઓને છેલ્લા પાંચ વર્ષમાં ટ્રાફિક પોલીસે 180 કરોડનો દંડ ફટકાર્યો છે.

છેલ્લા પાંચ વર્ષમાં ટ્રાફિક પોલીસે 180 કરોડનો દંડ ફટકાર્યો

રાજકોટમાં થર્ડ આઇ પ્રોટેક્શનની સુવિધા આપવામાં આવી છે. ઠેર ઠેર સીસીટીવીની નિગરાની છે. પરંતુ આ સીસીટીવીનો ખરો ઉપયોગ તો ટ્રાફિક પોલીસે જ કર્યો હોય તેમ લાગી રહ્યું છે કારણ કે  રાજકોટમાં છેલ્લા પાંચ વર્ષમાં ટ્રાફિક પોલીસે 180 કરોડનો દંડ ફટકાર્યો. વળી તે કુલ વાહનોની સંખ્યા કરતા બમણાથી પણ વધારે. અત્યાર સુધીમાં રાજકોટ ટ્રાફિક પોલીસે 24.30 લાખ નાગરિકોને ઇ-મેમો ફટકાર્યો. જો કે 150 કરોડનો દંડ ભરવાનો બાકી છે. પરંતુ રાજકોટ વાસીઓ ટ્રાફિક પોલીસના આ વર્તનથી હેરાન પરેશાન થઇ ગયાછે,  રાજકોટ માટે આઇવે સીસીટીવી પ્રોજેક્ટ દંડાત્મક બની રહ્યો હોય તેમ લાગી રહ્યું છે. સીસીટીવી કેમેરાનો ઉપયોગ ગુનાહિત પ્રવૃત્તિ અટકાવવા ઉપયોગ થાય તે સારી વાત છે પરંતુ ટ્રાફિક પોલીસે તેનો મિસયુઝ કર્યો હોવાનો વાહનચાલકો આરોપ લગાવી રહ્યાં છે.

પહેલા ટ્રાફિકના નિયમોની સાચી સમજ આપો પછી દંડ ફટકારો: શહેરીજન

આ અંગે રાજકોટવાસીઓએ આક્ષેપ કરતા જણાવ્યું કે, કોઇ પણ ટ્રાફિક સિગ્નલ પર પોલીસ ક્યારેય કાર્યરત હોતા નથી. મોટા ભાગે સાઇડમાં જ ઉભેલી હોય છે. શહેરીજનોને ટ્રાફિકના સામાન્ય નિયમો બરાબર સમજાવવાની જરૂર છે. તેઓએ એમ પણ જણાવ્યું કે ઘણા નાગરિકોને ખબર નથી હોતી કે વન વે કોને કહેવાય, ઝિબ્રા ક્રોસિંગનો ઉપયોગશા માટે છે.  પોલીસે મસમોટા દંડ ફટકારવાને બદલે પબ્લિકને પહેલા નિયમોની સાચી સમજ આપે તેમ જણાવ્યું હતું.