રાજકોટની હોમિયોપેથી કોલેજમાં બોગસ ડીગ્રી કૌભાંડ મામલે રાજકોટ SOG પોલીસે જિલ્લા ભાજપના મહામંત્રીના ભાઈ સહીત 3 આરોપીઓની ધરપકડ કરી છે.
સૌરાષ્ટ્ર યુનિવર્સિટીની કમિટી દ્વારા કરવામાં આવેલ તપાસમાં યુનીવર્સીટીના હોમિયોપેથી ડીપાર્ટમેન્ટના ડીન સહીત 43 લોકોની ભૂમિકા હોવાનું સામે આવ્યું હતું. જે તમામ સામે યુનિવર્સિટી દ્વારા પોલીસ ફરિયાદ કરાઈ હતી.
SOGએ ડાંગર કોલેજના પ્રિન્સીપાલ અમિતાભ જોશી રાજકોટ જિલ્લા ભાજપના મહામંત્રીના ભાઈ જનક મહેતા કોલેજના અન્ય ટ્રસ્ટી દીપક ડાંગરની ધરપકડ કરી છે અને ખંભાળીયાના ફરાર આરોપી ડોકટર કાદરીને પકડી પાડવા તપાસ હાથ ધરી છે.
ઉલ્લેખનીય છે કે સૌરાષ્ટ્ર યુનિવર્સિટી સંલગ્ન હોમિયોપેથી કોલેજમાં પ્રવેશ મેળવવા અન્ય યુનિવર્સિટીની માર્કશીટનો ઉપયોગ કરવામાં આવતો હતો. આરોપીઓ દ્વારા અન્ય યુનિવર્સિટીની ડુપ્લીકેટ માર્કશીટ રજૂ કરી પ્રવેશ મેળવવામાં આવતો હતો. અત્યાર સુધીમાં બોગસ માર્કશીટના આધારે 43 વિધાર્થીઓને પ્રવેશ આપ્યો હતો.
જેમાં રાજકોટની BA ડાંગર કોલેજમાં 33 વિધાર્થી બીજી ગરૈયા કોલેજમાં 7 અને અમરેલી વ્યાસ કોલેજમાં બે વિધાર્થીઓને પ્રવેશ આપ્યો હતો.
બોગસ ડીગ્રી મામલે આરોપીઓ દ્વારા વિધાર્થીઓ પાસેથી રૂપિયા 3 લાખથી 7 લાખ સુધી વસુલવામાં આવતા હતા. બીજી ગરૈયા કોલેજ અને અમરેલીની વ્યાસ કોલેજના સંચાલકોની પૂછપરછ કરવામાં આવશે. અને તપાસ દરમિયાન કોઈ પુરાવા મળી આવશે તો તેના વિરુદ્વ કાર્યવાહી કરાશે.