પ્રથમ તબક્કાનું મતદાન પૂર્ણ થયા બાદ રાજકોટ ભાજપમાં ભડકો થયો છે. રાજકોટ શહેરની એક બેઠકના ઉમેદવારે ગંભીર આક્ષેપ લગાવ્યો છે. સૂત્રોના જણાવ્યા અનુસાર, આ ઉમેદવાર કહ્યું કે, ભાજપના જ કેટલાક નેતાઓએ તેમને હરાવવા માટેનું ષડયંત્ર ઘડ્યું અને આ નેતાઓએ ભાજપના ખેસ પહેરીને અન્ય પક્ષ માટે મતદાન પણ કરાવ્યું.
મતદાન પૂર્ણ થયા બાદ રાજકોટ ભાજપમાં ભડકો
મંથન બેઠકમાં એક ઉમેદવારે લગાવ્યા ગંભીર આક્ષેપ
પાર્ટીના ખેસ પહેરી અન્ય પક્ષો માટે મતદાન કરાવ્યાના આક્ષેપ
રાજકોટ શહેરમાં ગઈકાલે સવારના 8 વાગ્યાથી જ ચુસ્ત બંદોબસ્ત વચ્ચે મતદાનનો પ્રારંભ થયો હતો. દિવસના અંતે શહેરની ચારેય બેઠકનું સરેરાશ મતદાન 59.91 ટકા થયું હતું. શહેરની પૂર્વ બેઠક પર 62.22, પશ્ચિમ બેઠક પર 57.03, દક્ષિણ બેઠક પર 58.60 અને રાજકોટ ગ્રામ્ય બેઠક પર 61.74 ટકા મતદાન થયું હતું. સૌરાષ્ટ્ર-કચ્છ અને દક્ષિણ ગુજરાતમાં મતદાન પૂર્ણ થયા બાદ રાજકોટમાં ભાજપની મંથન બેઠક યોજાઈ હતી. આ દરમિયાન શહેરની એક બેઠકના ઉમેદવારે ખૂબ મોટા આક્ષેપો લગાવતા રાજકોટમાં રાજકારણ ગરમાયું છે.
બેઠકમાં એક ઉમેદવારે ભાજપના કાર્યકરો પર આરોપ લગાવ્યોઃ સૂત્રો
સૂત્રોના જણાવ્યા પ્રમાણે, શહેરની એક બેઠકના ઉમેદવારે એવા આક્ષેપ લગાવ્યા છે કે ભાજપના જ કેટલાક નેતાઓએ તેમને હરાવવા માટેનું ષડયંત્ર ઘડ્યું હતું અને કેટલાક નેતાઓએ ભાજપના ખેસ પહેરીને અન્ય પક્ષ માટે મતદાન પણ કરાવ્યું હતું, જેના મારી પાસે પુરાવા પણ છે.
ઉમેદવારના આક્ષેપથી મંથન બેઠક બની ચર્ચાનો મદ્દો
સૂત્રોના જણાવ્યા પ્રમાણે, આ ઉમેદવારે કોઈપણ નેતાનું નામ જાહેર કર્યું નથી. તેમણે પક્ષ વિરોધીઓ સામે કાર્યવાહીની માગ કરી છે. ભાજપ ઉમેદવાર દ્વારા આ પ્રકારના આક્ષેપો લગાવતા હાલ ચર્ચા શરૂ થઈ છે. તો ભાજપે પણ ઉમેદવારના આક્ષેપોની ગંભીરતાથી નોંધ લીધી હોવાની ચર્ચા શરૂ થઈ છે. ઉમેદવારની વાતથી મંથન બેઠકમાં સોંપો પડી ગયો હતો.