રાજકોટ SOG દ્વારા ડ્રગ્સ પેડલર પિતા પુત્રની કરવામાં આવી ધરપકડ, શાળા-કોલેજના યુવાનોને કરતા હતા ટાર્ગેટ
રાજકોટમાં ડ્રગ્સ પેડલર પિતા-પુત્રની ધરપકડ
SOGએ 76.45 ગ્રામ ડ્રગ્સનો જથ્થો જપ્ત કર્યો
શાળા-કોલેજના યુવાનોને નશાના રવાડે ચડાવવાનું કામ કરતા
છેલ્લા બે મહિનાની અંદર ગુજરાત ડ્રગ્સ મામલે ચર્ચાનું કેન્દ્ર બન્યું છે. ગુજરાતમાં અનેક જગ્યાએથી ડ્રગ્સના સરનામા મળી આવે છે. દારૂની જેમ ડ્રગ્સ ઝડપાયાની ઘટનાઓ સતત સામે આવી રહી છે. ગુજરાતના ખૂણે ખૂણે ડ્રગ્સનો વેપાર અને સેવન થઇ રહ્યું હોય તેવું લાગી રહ્યું છે ત્યારે ગુજરાતના યુવાધનને નશાના રવાડે ચઢાવનારા બાપ દિકરાની ધરપકડ કરવામાં આવી.
ડ્રગ્સ પેડલર બાપ-દિકરો સકંજામાં
જી, હા રાજકોટમાં ડ્રગ્સ પેડલર પિતા-પુત્રની ધરપકડ કરવામાં આવી છે. એસઓજીએ 76.45 ગ્રામ ડ્રગ્સનો જથ્થો જપ્ત કર્યો છે. બાપ દિકરા યુવાનોને નશાના રવાડે ચઢાવવાનું કામ કરતા હતા. ઇરફાન નામના શખ્સ અને તેના પુત્રની ધરપકડ કરવામાં આવી છે. તેઓ મુંબઇથી ડ્રગ્સ લાવીને કોલેજના યુવાનોને ટાર્ગેટ કરતા હતા. પડીકી બનાવીને 4 હજારમાં વેચતા હોવાનું સામે આવ્યું છે. મહત્વનું છે કે ગુજરાતના યુવાધનને બરબાદ કરવા ડ્રગ્સ નામનુ દૂષણ હવે વધી રહ્યુ છે.. તેમાં પણ હવે તો ઓનલાઇન માર્કેટનુ ચલણ વધતા ડ્રગ્સનો ગોરખધંધો ઓનલાઇન પણ ધમધમી રહ્યો છે.
'અજમેર-બોમ્બેથી લાવતા હતા ડ્રગ્સ'
આ અંગે ડીસીપી ક્રાઇમબ્રાંચ પાર્થરાજસિંહ ગોહિલે જણાવ્યું હતું કે સાડા સાત લાખ રૂપિયાનો ડ્રગ્સનો જથ્થો ઝડપી પાડવામાં આવ્યો છે. મુખ્ય આરોપી ઇરફાન અગાઉ પણ એનડીપીએસના ગુનામાં પકડાઇ ચૂક્યો છે. આ બંને લોકો અજમેર અને બોમ્બેથી ડ્રગ્સ લાવતા હતા. આમ ડ્રગ્સ સાથે કુલ 8 લાખ 24 હજારનો મુદ્દામાલ ઝડપી પાડવામાં આવ્યો છે. ત્યારે હાલમાં SOG પોલીસ દ્વારા બંનેની ધરપકડ કરીને તપાસનો ધમધમાટ શરૂ કરાયો છે. કેટલા સમયથી ડ્રગ્સનું વેચાણ કરતા હતા. મુંબઇમાં કોણ આ બાપ દિકરાને ડ્રગ્સ પહોંચાડી રહ્યું હતું. ગુજરાતમાં ક્યાં ક્યાં તેઓ ડ્રગ્સ સપ્લાય કરતા હતા કઇ કોલેજ અને શાળાને ટાર્ગેટ બનાવી હતી તે તમામ સવાલોને લઇને પોલીસે વધુ તપાસ હાથ ધરી.