ભારત અને દક્ષિણ આફ્રિકા વચ્ચે રાજકોટમાં યોજાનારી મેચ માટે ટીમના ખેલાડીઓ રાજકોટની બે અલગ અલગ હોટેલમાં રોકાણ કરશે, ત્યારે હોટેલે પણ પુરજોશમાં સ્વાગતની તૈયારીઓ કરી રાખી.
રાજકોટમાં યોજાનારી મેચની તૈયારીઓ ચાલુ
હોટેલ કરશે ટીમનું ભવ્ય સ્વાગત
કોરોના ગાઈડલાઈન્સનું રાખશે ખાસ ધ્યાન
બન્ને ટીમનું સ્વાગત
ભારત અને દક્ષિણ આફ્રિકા વચ્ચે યોજાનારી આગામી મેચ રાજકોટમાં રમાવાની છે ત્યારે ટીમના સ્વાગત માટે રાજકોટની બે પ્રખ્યાત હોટલોએ તૈયારીઓ ચાલુ કરી દીધી છે. જેમાં ભારતીય ટીમ માટે કાલાવડ રોડ પર આવેલી સયાજી હોટેલ અને ટીમ દક્ષિણ આફ્રિકા માટે 150 ફૂટ રીંગ રોડ પર આવેલી ફોર્ચ્યુન હોટેલ રહેશે. આ પહેલા 2015માં ટીમ આફ્રિકા આ હોટેલમાં રોકાઈ ચૂકી છે ત્યારે પણ હોટેલે ટીમની ખાતેદારી ખુબ સારી રીતે કરી હતી. હાલ પણ ટીમના આગમન માટે હોટેલે વેલકમ બેકના પોસ્ટર લગાવ્યા છે.
તૈયારીઓ ચાલુ
ભારત અને દક્ષિણ આફ્રિકા વચ્ચેની આ ચોથી મેચ રાજકોટમાં 17 જૂનના યોજાનારી છે, ત્યારે સૌરાષ્ટ્રના લોકોમાં ખુશીનો માહોલ જોવા મળી રહ્યો છે. ત્યારે હોટેલ મેનેજમેન્ટ પણ ટીમનું ઉષ્માભર્યા સ્વાગત માટે તડામાર તૈયારીઓ ચાલુ કરી દીધી છે. ભારતીય ટીમનું સયાજી હોટેલ ખાતે રેડ કાર્પેટમાં ગરબા સાથે સ્વાગત કરવામાં આવશે. આ માટે ખેલાડીઓએ તૈયારીઓ ચાલુ કરી દીધી છે. ભારતીય ટીમના ખેલાડીઓ રાજકોટના પ્રખ્યાત ઘૂઘરા, ગાંઠિયા-જલેબી, વઘારેલ રોટલો અને ઢોકળીના શાકનો આનંદ માણસે.
ખાસ વાનગીઓ સાથેનું જમવાનું મેનુ
હોટેલ સયાજીમાં ભારતીય ટીમના પોસ્ટર પણ લગાવી દેવામાં આવ્યા છે. ભારતીય ટીમનું ગરબાથી સ્વાગત કરવામાં આવશે ત્યારે ટીમ દક્ષિણ આફ્રિકાનું ફૂલોની માળા પહેરાવીને સ્વાગત કરવામાં આવશે. ભારતીય ટીમ સવારે નાસ્તામાં ગાંઠિયા-જલેબી અને સાંજે ઘૂઘરાનો સ્વાદ માણશે. બપોરના જમવામાં ઢોકળીનું શાક, વઘારેલો રોટલો અને રાત્રે ડીનરમાં રાજસ્થાની ફૂડ ઘેવર રબડી, કૈર સાંગરી, દાલબાટી અને ઇન્દોરી ચાટનો સ્વાદ માણશે.
ટીમ ઇન્ડિયાનું સ્વાગત
આવતી કાલે એટલે કે 15 જૂનના બન્ને ટીમ રાજકોટ પહોચશે ત્યારે ભારતીય ટીમનું રેડ કાર્પેટ પર સ્વાગત કરવામાં આવશે. સાથે જ ગરબાની રમઝટ પણ જોવા મળશે. આ ઉપરાંત પુષ્પવર્ષા અને વેલકમ ડ્રીન્કથી ટીમનું સ્વાગત કરવામાં આવશે. જે માટે ખેલૈયાઓ દ્વારા હાલ પ્રેક્ટિસ ચાલુ છે. ભારતીય ટીમના કેપ્ટન રિષભ પંત માટે 8માં માળે રાજસ્થાની રોયલ થીમ પરનો સ્યુટ રૂમ સજાવાયો છે. તે રૂમ નં.806માં રોકાશે તો તેના રૂમમાં કટઆઉટ લગાવવામાં આવ્યા છે. ઉપરાંત હાર્દિક પંડ્યા અને યુઝવેન્દ્ર ચહલના ફોટાવાળા ખાસ પિલો પણ બનાવવામાં આવ્યા છે. ભારતની ટીમનું વેલકમ લેટરથી સ્વાગત થશે.
ટીમ દક્ષિણ આફ્રિકાનું સ્વાગત
ટીમ દક્ષિણ આફ્રિકા ફોર્ચુન હોટેલમાં રોકવાની છે. આ અગાઉ પણ ટીમ અહી રોકી ચૂકી છે એટલા માટે ત્યાં વેલકમ બેકના પોસ્ટર પણ લગાવી દેવામાં આવ્યા છે. કોરોના ની ગાઈડલાઈન્સ ધ્યાનમાં રાખતા હોટેલ આગામી 15થી 18 જૂન ચાર દિવસ સુધી અન્ય પબ્લિક માટે રૂમ, બેંકવેટ હોલ અને રેસ્ટોરન્ટ બંધ રાખવામાં આવશે.
કોરોના ગાઈડલાઈન્સ
જે મુજબ થોડા દિવસોથી કોરોના કેસોમાં ઉછાળો જોવા મળી રહ્યો છે ત્યારે હોટેલ મેનેજમેન્ટ પણ આ વિશે વધુ સાવચેતી જાળવશે. ટીમના આગમન પહેલા હોટેલના બધા સ્ટાફનો બે વાર કોરોના ટેસ્ટ કરવામાં આવશે.