દિવાળીની ભેટ / રાજકોટવાસીઓ જાણી લો આ નવી પાર્કિંગ પોલિસી, શહેરમાં લાગૂ થશે પાયલોટ પ્રોજેક્ટ

• રાજકોટ શહેરમાં લાગૂ કરાશે પાર્કિંગ પોલીસી 
• નવી પાર્કિંગ પોલીસી અંગે બુધવારે થશે ચર્ચા 
• મ્યુનિ.કમિશનરે મૂકી હતી સ્ટેન્ડિંગમાં દરખાસ્ત 

રાજ્યમાં જુદી-જુદી મહાનગર પાલિકા પોતાની નવી પાર્કિંગ પોલીસી બનાવી રહી છે.તે પ્રમાણે રાજકોટ મહાનગર પાલિકાએ પણ નવી પાર્કિંગ પોલીસીને લઈને તૈયારીઓ શરુ કરી દીધી છે. બુધવારે સ્ટેન્ડિંગ કમિટીની બેઠકમાં રાજકોટ શહેરની નવી પાર્કિંગ પોલીસી પર વિગતે ચર્ચા થશે. અત્યાર સુધીમાં સુરતમાં નવી પાર્કિંગ પોલીસી બની છે અને અમદાવાદમાં પણ આ પોલીસી માટે પ્રક્રિયા ચાલું છે. એક સમજ પ્રમાણે,ઘર કે દુકાન બહાર વાહન પાર્ક કરવા માટે પૈસા ભરવા પડશે. રાજકોટમાં તો હાલ પોલીસી બનવા પુરતી ચર્ચા છે.

શું કહ્યું સ્ટેન્ડિંગ કમિટી ચેરમેન પુષ્કર પટેલે ?

રાજકોટ મહાનગર પાલિકાના સ્ટેન્ડિંગ કમિટીના ચેરમેન પુષ્કર પટેલે VTV સાથે ખાસ વાતચીતમાં કહ્યું કે, પોલીસી અંગે ચર્ચા થયા પછી રાજ્ય સરકારને મંજૂરી માટે મોકલાશે. રાજકોટમાં ટ્રાફિક સમસ્યા અને વાહન પાર્કિંગ માટે અન્ય મહાનગરોની જેમ માથાના દુખાવારૂપ સમસ્યા બની છે.આ સમસ્યાના નિવારણ માટે નવી પોલીસી જરૂરી છે. રાજકોટ મહાનગર પાલિકાના કમિશ્નરે પાર્કિંગ પોલીસી મુદ્દે સ્ટેન્ડિંગ કમિટીમાં દરખાસ્ત મૂકી છે.પાર્કિંગ પોલીસી માટે નિર્ણય લેવાનો છે.કોઈ ચાર્જ કે ઘર પાસે વ્હીકલ  રાખવાના ચાર્જની વાત નથી. રાજકોટમાં જે પાર્કિંગ પોલીસી બનશે તે રાજ્ય સરકારમાં મંજૂરી માટે મોકલવામાં આવશે.48 જેટલા રાજમાર્ગ પર પાયલટ પ્રોજેક્ટનો અમલ કરવામાં  આવશે. સ્ટેન્ડિંગ કમિટીના ચેરમેન પુષ્કર પટેલે જણાવ્યું કે, ટ્રાફિક અને પાર્કિંગની સમસ્યાને નિવારવા નવી પાર્કિંગ પોલીસી અમલમાં મુકાશે. બુધવારે સ્ટેન્ડિંગ કમિટીની બેઠકમાં ચર્ચા કરીને નિર્ણય લેવાશે. સ્ટેન્ડિંગ કમિટીમાં દરખાસ્ત મોકલતા પહેલા કમિશનરે વાંધા /સૂચનો પણ મંગાવ્યા હતા જેમાં દસે'ક લોકોએ વાંધા -સુચન મોકલ્યા હતા જેનું હિયરીંગ પણ કમિશનરે કરી લીધું છે.

વિસ્તાર અને વ્યાપ વધ્યાં-પોલીસી જરૂરી 

ટાઉન પ્લાનિંગ શાખામાં કોઈ પણ રહેણાક કે કોમર્શીયલનો પ્લાન મુકે ત્યારે ટાઉન પ્લાનીગ શાખા પાર્કિંગ સુવિધા  ચેક કરીને તેનો પ્લાન મંજૂર કરતી હોય છે.અને જ્યાં પાર્કિંગ દર્શાવ્યું છે ત્યાં હોવું જ જોઈએ, અને ખુલ્લા પ્લોટમાં જગ્યા ખુલ્લી જ રહેવી જોઈએ.આ તમામ ધારા-ધોરણોનું પાલન થાય છે કે કેમ.એની પણ ચાસની થવી જોઈએ અને શહેરના વિસ્તારો વધતા જાય છે.શહેરો આધુનિકીકરણ તરફ વળ્યા છે ત્યારે, સુવિધાઓ વધે છે સાથે નવી પોલીસી પણ જરૂરી છે. રાજકોટમાં અત્યારે 41 જાહેર જગ્યાઓ પાર્કિંગ માટે છે.શક્ય છે નવી પોલીસી આવતા આ જાહેર પાર્કિંગ સુવિધામાં વધારો પણ થાય. છેલ્લા લગભગ  20 વર્ષોમાં રાજકોટનો વ્યાપ ખૂબ વધ્યો છે. ગ્રામીણ કહી શકાય તેવા વિસ્તારો આજે શહેરની હદમાં આવી ગયા છે.આવા સંજોગોમાં નવી પાર્કિંગ પોલીસી કેવી હશે અને નાગરિકોને કેવો ફાયદો આપશે તે જોવું રહ્યું.