રેલમછેલ / રાજકોટમાં અડધો કલાકમાં 2 ઈંચ વરસાદ ખાબક્યો, શહેરના અનેક વિસ્તારોમાં ઢીંચણ સમા પાણી ભરાયા

• રાજકોટ શહેરમાં સાંજ બાદ વાતાવરણ પલટ્યુ
• અડધો કલાકમાં 2 ઈંચ વરસાદ ખાબક્યો
• રાજકોટના અનેક વિસ્તારોમાં ભરાયા પાણી

ગુજરાતમાં 5 દિવસ વરસાદની આગાહી વચ્ચે રાજકોટમાં વરસાદે મોડી સાંજ બાદ રમઝટ બોલાવી છે. શહેરમાં સાંજ બાદ વાતાવરણ પલટાયું હતું. અને ગાજવીજ સાથે ધોધમાર વરસાદ વરસી પડ્યો હતો. અડધો કલાકમાં 2 ઈંચ વરસાદ ખાબકતા શહેરના નીચાણવાળા વિસ્તારો પાણીમાં ગરકાવ થઈ ગયા હતા.કાલાવડ રોડ, મવડી રોડ, 150 ફૂટ રીંગ રોડ પર પાણી ભરાયા  હતા. મહિલા કોલેજ અન્ડરબ્રિજ, કિસાનપરા ચોક, કાલાવડ રોડ, ગોંડલ રોડ પર પાણી જમા થતાં તંત્રની પ્રિ મોન્સુન કામગીરી ધોવાઈ ગઈ હતી. સાથે જ રાજકોટના ગ્રામ્ય વિસ્તારમાં પણ પહેલો વરસાદ વાવણી લાયક પડતાં ભારે ખુશી જોવા મળી હતી. તો રાજકોટ વાસીઓને ભારે બફારામાંથી મુક્તિ મળી હતી. શહેરના અનેક વિસ્તારમાં પાણી દોઢ ફૂટ જેટલા પાણી ભરાઈ ગયા હતા.

પ્રિ મોન્સૂનની નબળી કામગીરી દર વર્ષની જેમ ખુલી પડી 
રાજકોટમાં ચોમાસાનો પ્રથમ વરસાદ વરસ્યો છે. જેમાં મનપાની પ્રિ-મોન્સૂન કામગીરીના દાવા પોકડ સાબિત થયા છે. શહેરમાં આવેલા 2 ઈંચ જેટલા વરસાદમાં જ વેસ્ટઝોનમાં રસ્તાઓ પર પાણી ભરાયા છે. વેસ્ટઝોનના અન્ડરબ્રિજ અને વોકળામાં પ્રથમ વરસાજમાં જ પાણી ભરાયા છે. જેથી શહેરીજનોને મુશ્કેલી સહન કરવાનો વારો આવ્યો છે.

એક વરસાદી સિસ્ટમ ગુજરાતમાં સક્રિય
રાજ્યમાં ચોમાસાના પ્રારંભ બાદ મેઘમહેર જોવા મળી રહી છે.આગામી દિવસોમાં ચોમાસું સમગ્ર રાજ્યમાં પહોંચશે તેવી આગાહી હવામાન વિભાગ દ્વારા કરવામાં આવી છે.સૌરાષ્ટ્રમાં 2 દિવસ વરસાદની આગાહી કરવામાં આવી છે.હાલ એક વરસાદી સિસ્ટમ રાજ્યમાં સક્રિય છે. 16 અને 17 તારીખે વરસાદની આગાહી કરાઇ છે.અમદાવાદમાં પણ રહેશે વાદળછાયુ વાતાવરણ જોવા મળશે. અમદાવાદમાં ઠંડરસ્ટોર્મ એક્ટિવિટી જોવા મળશે. રાહતની વાત એ છે કે નિયત સમય મુજબ ગુજરાતમાં વરસાદની પધરામણી થઈ ચૂકી છે. જો આગાહી મુજબ ગુજરાતમાં સારો વરસાદ વરસે તો પ્રથમ વરસાદે જ ખેડૂતો વાવણી કરી શકશે.

વેધર વોચ ગૃપની સમીક્ષા બેઠક યોજાઈ
ગાંધીનગર ખાતે રાહત નિયામક  સી. સી. પટેલના અધ્યક્ષ સ્થાને વેધર વોચ ગૃપની સમીક્ષા બેઠક યોજાઈ હતી, જેમાં IMDના અઘિકારી એમ. મોહન્તીએ ચોમાસાનું ગુજરાતમાં આગમન થઇ ગયું છે તેમ જણાવતા કહ્યું કે, આગામી પાંચ દિવસમાં સમગ્ર ગુજરાતમાં હળવાથી મધ્યમ વરસાદ ૫ડવાની સંભાવના છે. જ્યારે સમગ્ર ચોમાસા દરમિયાન ૯૬ થી ૧૦૪ ટકા વરસાદ ૫ડવાની શક્યતા રહેલી છે. 

રાજ્યમાં સરેરાશ ૧૪.૪૫ મીમી વરસાદ થયો
છેલ્લા ૨૪ કલાક રાજ્યમાં થયેલ વરસાદની માહિતી આપતાં રાહત નિયામકએ જણાવ્યું હતું કે, સવારના ૬.૦૦ થી બપોરના ૨.૦૦ સુઘી રાજ્યમાં બે જિલ્લાઓના બે તાલુકાઓમાં વરસાદ નોંધાયો છે, જેમાં સૌથી વધારે ખેડા જિલ્લાના નડીયાદ તાલુકામાં ૦૭ મીમી. વરસાદ નોંધાયો છે. રાજ્યમાં અત્યાર સુઘી તા. ૧૪/૦૬/૨૦૨૨ અંતિત ૧૪.૪૫ મીમી વરસાદ થયો છે, જે છેલ્લાં ત્રીસ વર્ષની રાજ્યની સરેરાશ ૮૫૦ મીમી.ની સરખામણીએ ૧.૭૦ ટકા છે.

ખરીફ પાકોનું કેટલું વાવેતર થયું?
કૃષિ વિભાગના અધિકારીએ જણાવ્યું હતું કે, ચાલું વર્ષે અંદાજીત ૨,૫૩,૦૨૯ લાખ હેક્ટર ખરીફ પાકોનું વાવેતર તા. ૧૩/૦૬/૨૦૨૨ સુધીમાં થયું છે. ગત વર્ષે સમાન સમયગાળા દરમિયાન ૨,૧૮,૫૫૪ લાખ હેક્ટર વાવેતર થયું હતું. આ વર્ષે છેલ્લા ત્રણ વર્ષની સરેરાશ વાવેતર વિસ્તારની સામે ૨.૯૩% વઘુ વાવેતર થયું છે.

હાલ ગુજરાતમાં કેટલો પાણીનો ડેમમાં સંગ્રહ?
સિંચાઇ વિભાગના અધિકારીએ જણાવ્યું હતું કે, સરદાર સરોવર જળાશયમાં ૧૫૪૯૧૫ એમ.સી.એફ.ટી પાણીનો સંગ્રહ છે, જે કુલ સંગ્રહશક્તિના ૪૬.૩૭ ટકા છે. રાજ્યનાં ૨૦૬ જળાશયોમાં ૧,૯૪,૯૫૪ એમ.સી.એફ.ટી પાણીનો સંગ્રહ છે જે કુલ સંગ્રહશક્તિના ૩૪.૯૩ ટકા છે. હાલમાં રાજ્યમાં બે જળાશયો વોર્નીંગ પર છે. આ બેઠકમાં એન.ડી.આર.એફ, એસ.ડી.આર.એફ., ઉર્જા, માર્ગ અને મકાન, આરોગ્ય, વન વિભાગ, સી.ડબલ્યુ.સી, ઇસરો સહિત વિવિધ વિભાગોના ઉચ્ચ અધિકારીઓએ ઉપસ્થિત રહી જરૂરી વિગતો પૂરી પાડી હતી