તોડકાંડ મામલે વધુ એક વખત રાજકોટ પોલીસ સામે આરોપ ઉઠતા ચકચાર જાગી છે. કુવાડવા પોલીસ મથકના પીઆઇ અને રાઈટરે લાખો રૂપિયા પડાવી લીધા હોવાની રાવ ઉઠી છે.
રાજકોટ પોલીસનો વધારે એક તોડકાંડ
રાજકોટના વેપારીને વ્યાજખોરીના ફીટ કરી દેવાની ધમકી આપી તોડ કર્યો
કુવાડવાના તત્કાલિન પીઆઇ એમસી વાળા પર ગંભીર આરોપ
રાજકોટ પોલીસના તોડકાંડ અંગેના આરોપ લાગતા ખળભળાટ મચી ગયો છે. જેમાં પોલીસે એક વેપારીને ખોટી ધમકી આપી લાખો રૂપિયા પડાવી લીધા હોવાના ધગધગતા આરોપ ઉઠતા પોલીસ આલમમાં ખળભળાટ મચી જવા પામ્યો છે. પોલીસે સોની વેપારી પિતા-પુત્રને વ્યાજખોરીમાં ફિટ કરી દેવાની ધમકી આપી બને પાસેથી પોલીસે 7.5 લાખનો તોડ કર્યો હતો. આ અંગે વેપારીઓએ કુવાડવા પોલીસ મથકના તત્કાલિન PI એમ.સી.વાળા અને કુવાડવા પોલીસ મથકના રાઇટર હિતેશ ગઢવી પર આરોપ લગાવ્યા છે. આ અંગે વેપારીઓએ કુવાડવા પોલીસ મથકના તત્કાલિન PI એમ.સી.વાળા અને કુવાડવા પોલીસ મથકના રાઇટર હિતેશ ગઢવી પર આરોપ લગાવ્યા છે.
CCTV ફૂટેજ પણ બહાર આવ્યા
આ મામલે તોડકાંડના CCTV ફૂટેજ પણ બહાર આવ્યા છે. જે CCTV ફૂટેજમાં પોલીસ કર્મી લાખો રૂપિયાની ઉઘરાણી કરતો દેખાતા પોલીસના ઉચ્ચ અધિકારીઓના પણ પગ નીચેથી જમીન સરકી ગઈ છે. વેપારીઓએ જણાવ્યું કે 4 કરોડની જમીન મળતિયાઓને અપાવવા પોલીસે આ પ્રકારનું કૃત્ય આચર્યું છે. હદ તો ત્યારે થઈ ગઈ જ્યારે વેપારીએ સીસીટીવી સાથે ACBમાં ફરિયાદ કરી હોવા છતાં કોઈ કાર્યવાહી કરવામાં આવી ન હોવાનો પણ આક્ષેપ થઈ રહ્યો છે.
પીઆઇ અને રાઇટરે 7.50 લાખ પડાવી લીધાના આક્ષેપ
વેપારીએ કરેલ રાવ મુજબ રાજકોટના વેપારીએ ચાર કરોડની જમીનના રજીસ્ટર દસ્તાવેજ કર્યા હતા. બાદમાં જમીન પર પોલીસના મળતીયાઓની નજર લાગતા પોલીસે રજીસ્ટર દસ્તાવેજ રદ કરાવી નાખ્યો હતો અને આ મામલે પોલીસે વ્યાજખોરીમાં ફીટ કરવાની ધમકી આપી હતી. જેને પગલે ડરી ગયેલા વેપારી પાસેથી પીઆઇ અને રાઇટરે 7.50 લાખ પડાવી લીધા હોવાનું જણાય રહ્યું છે. મહત્વનું છે કે આ અગાઉ પણ રાજકોટ પોલીસ પર લાખો રુપિયાની તોડ કર્યાના આરોપ થયા હતા. ત્યારે વધુ એક વખત આક્ષેપ થતા પોલીસ આલમમાં સોંપો પડી ગયો છે.