VIDEO / રાજકોટમાં પત્નીએ માસ્ક ન પહેરતા પોલીસે દંપત્તિને રોક્યું, પતિએ પત્નીને લાફો ઝીંક્યો, બાદમાં પોલીસે કર્યું આ કામ

• રાજકોટમાં રાત્રિ કર્ફ્યુનો વીડિયો થયો વાયરલ
• માસ્ક બાબતે પોલીસે રોકતા પતિ-પત્ની વચ્ચે થયો ઝઘડો
• પત્નીને સમજાવવા છતાં માસ્ક ન પહેરતા થયો ઝઘડો

રાજ્યમાં રાજકોટ, અમદાવાદ, સુરત અને વડોદરામાં રાત્રિ કર્ફ્યુ લગાવાયેલું છે. ત્યારે રાજકોટ શહેરમાં કર્ફ્યુ ભંગના અનેક ગુનાઓ નોંધાઇ ચૂક્યા છે. તેવામાં રાજકોટ શહેરમાં માસ્ક ન પહેરવા બાબતે પોલીસની સામે જ ખુદ પતિએ પત્નીને લાફો ઝીંકી દીધો હતો. ત્યારબાદ પોલીસે વચ્ચે પડી પતિ-પત્નીને જવા દીધા હતા. જેનો વીડિયો હાલ સોશિયલ મીડિયામાં વાયરલ થઇ રહ્યો છે.

રાજકોટમાં શુક્રવારે રાત્રે A ડિવિઝન પોલીસ સ્ટેશન વિસ્તારમાં આવેલા ત્રિકોણબાગ નજીક રાત્રિ કર્ફ્યુ દરમિયાન એક દંપત્તિ ટુ વ્હીલર લઇને નીકળ્યું હતું. જ્યારે પોલીસે બાઇક રોક્યું ત્યારે બાઇકચાલક પતિએ પોતાના મોઢા પર રૂમાલ બાંધ્યો હતો જોકે તેમની પત્નીએ માસ્ક પહેર્યું નથી. જેને લઇને પોલીસે દંડ ભરવાનું કહ્યું હતું. જે દરમિયાન પત્ની પોલીસને બહાના બતાવે છે. ત્યારે પતિ ઉશ્કેરાઇ ગયો અને તેણે તેની પત્નીને પોલીસની હાજરીમાં જ લાફો ઝીંકી દીધો હતો. જેનો વીડિયો હાલ સોશિયલ મીડિયામાં વાયરલ થઇ રહ્યો છે. જોકે આ અંગે પોલીસે જણાવ્યું હતું કે, આ મામલે કોઇ ફરિયાદ થઇ નથી પરંતુ પત્ની તેના પતિ વિરૂદ્ધ ફરિયાદ કરી શકે છે.