રાતો-રાત લાખો પતિ બની જવાના સપના જોનારી ચોર ટોળકીની રાજકોટ પોલીસે ધરપકડ કરી હતી. રાજકોટ ક્રાઇમ બ્રાન્ચે બેંક અને ફાઇનાન્સ કંપનીમાં ચોરીના પ્રયાસનાં ગુનામાં ચાર શખ્સોની ધરપકડ કરી છે. જોકે પોલીસ તપાસમાં આરોપીઓને લગ્ન માટે રૂપિયાની જરૂર હોવાથી ચોરી કરવાનો પ્લાન ઘડ્યો હોવાનું સામે આવ્યું હતું.
રાતો-રાત થવું હતું માલામાલ
એક જ વખત ચોરી કરવી પણ મોટી ચોરી કરવીઃ ચોર ગેંગ
લગ્ન કરવા રૂપિયાની જરૂર હોવાથી કરવી હતી ચોરી
રાજકોટ ક્રાઇમ બ્રાન્ચે રવિ ચૌહાણ, અનિલ તાવીયા, વિશાલ ધલવાણિયા અને રાહુલ તાવીયાની ધરપકડ કરી છે. આ તમામ શખ્સો એકબીજાનાં અંગત મિત્રો છે. જેમને આર્થિક ખેંચ આવતા મોટી ચોરી કરવાનો માસ્ટર પ્લાન બનાવ્યો હતો. તેઓ બેંક અને ફાઇનાન્સ કંપનીમાં ચોરી પણ કરવા ગયા હતા. જોકે નિષ્ફળતા હાથ આવતા હાલ પોલીસે દબોચી લીધા છે.
સમગ્ર મામલા પર નજર કરીએ તો, સોરઠીયાવાડી સર્કલ નજીક બેંક ઓફ ઇન્ડીયાની બ્રાંચમાં 8 સપ્ટેમ્બરનાં ચોરીનો પ્રયાસ અને મવડી રોડ પર મણીપુરમ ફાઇનાન્સ કંપનીમાં 12 સપ્ટેમ્બરનાં ચોરીનો પ્રયાસ થયો હતો. જેમાં આરોપીઓની સંડોવણી ખુલતા પોલીસે ચારેય આરોપીઓને દબોચી જેલનાં સળીયા ગણતા કરી દીધા છે.
શા માટે કરતા કરવી હતી ચોરી ?
પોલીસનાં જણાવ્યા મુજબ, આરોપીઓની ચોર ગેંગના તમામ સભ્યોએ નક્કી કર્યું હતું કે એક જ વખત ચોરી કરવી પણ મોટી ચોરી કરવી. જેથી તેમણે કોઈ બેન્ક કે મોટી પેઢીમાં ચોરી કરવાનું નક્કી કર્યું હતું. બેન્ક ઓફ ઇન્ડિયા, મણીપુરમ ફાઇનાન્સ કે જ્યા સોના પર લોન આપતા હોવાથી મોટી સંખ્યામાં રોકડ કે સોનુ મળી શકે અને સરખા ભાગે વહેંચી આર્થિક ખેંચ પૂરી કરી શકે.
પોલીસનાં જણાવ્યા મુજબ, આરોપી રવિ ચૌહાણને ઘુઘરાની લારી છે. જોકે લગ્ન કરવા હોવાથી રૂપિયાની જરૂર હતી. જ્યારે તેનાં મિત્ર અનિલે પ્રેમ લગ્ન કર્યા હોવાથી ઘર ખર્ચ કાઢવા માટે રૂપિયાની જરૂર હોવાનું સામે આવ્યું હતું. બાકીનાં આરોપીઓએ પોતાનાં મોજશોખ પૂરા કરવા રૂપિયાની જરૂર હોવાનું પોલીસ તપાસમાં ખુલ્યું હતું.
પોલીસ તપાસમાં આરોપીઓ બેંકનાં પાછળના ભાગેથી ગ્રીલ તોડીને અંદર પ્રવેશ કર્યો હતો અને CCTV DVR અને સાઇરનનાં કનેક્શન કાપી નાખ્યા હતા. જેથી CCTVમાં કે પોલીસને જાણ ન થાય. પરંતુ રૂપીયાની લાલચમાં ચોરીનો નિષ્ફળ પ્રયાસે પણ આરોપીઓને જેલનાં સળીયા ગણતા કરી દીધા હતા. આરોપીઓ અગાઉ આ પ્રકારનાં ગુનાઓને અંજામ આપ્યો છે કે નહીં તેની પોલીસે તપાસ શરૂ કરી છે.