રાજકોટ / જે.એમ.બિશ્નોઈ આપઘાત કેસ: પાડોશીની ગેલેરીમાં 50 લાખ ભરેલું રૂપિયાનું પોટલું નાખ્યું, ધરપકડના દિવસને લઈ પણ થયો મોટો ઘટસ્ફોટ

• જે.એમ.બિશ્નોઈ આપઘાત અને લાંચ કેસ
• 1 કરોડ રોકડ અને 900 ગ્રામ ચાંદી રિકવર
• CBI જે.એમ.બિશ્નોઈની આજે 27 માર્ચના રોજ ધરપકડ કરવાનું આયોજન હતું

રાજકોટમાં DGFTના અધિકારી જવરીમલ બિશ્નોઈના લાંચ અને આપઘાત મામલે રોજે રોજ નવા ખુલાસા થઈ રહ્યા છે. ગઈકાલે ફ્લેટમાંથી રૂપિયા ભરેલી બેગો ફેંકતા સીસીટીવી સામે આવ્યા બાદ આજે વધુ એક વીડિયો બહાર આવ્યો છે જેમાં પડોશીના ફ્લેટની ગેલેરીમાં રૂપિયાનું પોટલું ફેકવામાં આવ્યું હતું. જે બાદ જેમની ગેલેરીમાં રૂપિયાનું પોટલું નાખ્યું હતું તેમના ઘરે ચૂંદડી પડી ગઈ છે કહી જતાં પડોશીને આશંકા ગઈ હતી અને તેમણે CBIને જાણ કરી હતી. તાત્કાલિકના ધોરણે CBIએ 50 લાખ રૂપિયાનું પોટલું રિકવર કર્યું છે. આ લાંચ કેસની તપાસમાં કુલ મળીને અત્યાર સુધી કુલ 1 કરોડ રોકડ અને 900 ગ્રામ ચાંદી પણ રિકવર કરવામાં આવી છે.

પાડોશીની ગેલેરીમાં 50 લાખ ભરેલું રૂપિયાનું પોટલું નાખ્યું, જે.એમ.બિશ્નોઈ આપઘાત અને લાંચ કેસનો બીજો વીડિયો#rajkot #VtvGujarati pic.twitter.com/u0sVnNpehi

— VTV Gujarati News and Beyond (@VtvGujarati) March 27, 2023

CBI જે.એમ.બિશ્નોઈની આજે ધરપકડ કરવાની હતી પણ..
તો બીજી  તરફ ફોરેન ટ્રેડના જોઈન્ટ ડાયરેક્ટર જે.એમ.બિશ્નોઈના આપઘાત મામલે વધુ એક ખુલાસો થયો છે. CBI જે.એમ.બિશ્નોઈની આજે 27 માર્ચના રોજ ધરપકડ કરવાનું આયોજન હતું, પણ ફરિયાદી તરફથી દબાણ આવતા ગત શુક્રવારે જ CBIએ કાર્યવાહીકરી હતી. આપને એ પણ જણાવી દઈએ કે ફોરેન ટ્રેડની કચેરીમાં લાંચની ફરિયાદ ઉપર સુધી પહોંચી હતી. કારણ કે સૌરાષ્ટ્રમાંથી કૃષિ પેદાશ અને ઓટો મોબાઈલની કરોડોની પ્રોડક્ટની વિશ્વમાં નિકાસ કરવામાં આવે છે.  ફરિયાદો થતાની સાથે CBI એલર્ટ મોડમાં આવી ગઈ હતી અને રાજકોટમાં ત્રાટકી કાર્યવાહી પણ કરી હતી.

સીબીઆઇને કુલ બે બેગ મળ્યા
DGFTના અધિકારી જવરીમલ બિશ્નોઈના ઘરેથી સીબીઆઇને કુલ બે બેગ મળ્યા છે એક બેગ તેના પત્નીએ તેમના પાડોશીને ત્યાં ફેંકી દીધો હતો જ્યારે બીજો થેલો સીસીટીવી વીડિયો વાળો છે. જોઈન્ટ ડાયરેક્ટરનો ભત્રીજો બંડલ નીચે લેતા નજરે પડે છે જો કે, થેલો ખુલી જતાં બંડલ નીચે પડતા તસવીરમાં દેખાય છે.

કસ્ટોડિયલ ડેથ થયાનો પરિવારે આક્ષેપ કર્યો
ઉચ્ચ ઓફિસરનો આપઘાત નહીં કસ્ટોડિયલ ડેથ થયાનો પરિવારે આક્ષેપ કર્યો છે. મેજિસ્ટ્રેટ ઈન્કવાયરી અને CBIના અધિકારી પર FIRની માંગ કરાઇ છે. CBIએ મૃતક DGFTના જોઈન્ટ ડાયરેક્ટર જ્વરીમલ બિશ્નોઈના ઘરેથી પોટલું કબજે કર્યું છે. પોટલામાં રોકડ રૂપિયા અને ચાંદીના સિક્કા હોવાનું બહાર આવ્યું છે. ઘરે જયારે CBI ની ટીમ પહોંચી ત્યારે પોટલું ઘરની પાસે ફેકેલુ હતું.

શું છે સમગ્ર મામલો?
રાજકોટના ફોરેન ટ્રેડના જોઈન્ટ DGFT જાવરીમલ બિશ્નોઇને રૂપિયા 5 લાખની લાંચ લેતા CBI દ્વારા રંગેહાથે ઝડપી પાડવામાં આવ્યા હતા. ફરિયાદી શહેરની ગિરનાર ટોકીઝની બાજુમાં આવેલી ફોરેન ટ્રેડની ઓફિસના ચોથા માળે જવરીમલ બિશ્નોઈને રૂપિયા પાંચ લાખ આપવા ગયા હતા અને જવરીમલ બિશ્નોઇએ આ રકમ સ્વીકારી હતી. એ જ સમયે CBIની ટીમ ઓફિસમાં પહોંચી ગઈ હતી અને રૂપિયા 5 લાખની લાંચ લેતા જાવરીમલ બિશ્નોઇને રંગે હાથ ઝડપ્યા હતા. ફોરેન ટ્રેડના જવરીમલ બિશ્નોઇ દ્વારા NOC આપવા માટે રૂપિયા 9 લાખની લાંચ માંગવામાં આવી હતી. આ લાંચના પ્રથમ હપ્તા પેટે રૂ.5 લાખ આપવાનું પણ વેપારીને કહેવાયું હતું. વેપારી લાંચ આપવા માગતા ન હોવાથી તેમણે સીબીઆઈમાં અરજી કરી હતી. જેથી સીબીઆઈએ ગુનો દાખલ કરી લાંચનું છટકું ગોઠવ્યું હતું. જેમાંથી પ્રથમ હપ્તા પેટે ફરિયાદી 5 લાખ રૂપિયા આપવા પહોંચ્યા હતા. જવરીમલ બિશ્નોઇએ આ રકમ સ્વીકારતા જ CBIની ટીમ પહોંચી ગઈ હતી અને તેમને ઝડપી લેવામાં આવ્યા હતા. જે બાદ તેઓએ ઓફિસના ચોથામાળેથી કૂદીને જીવન ટૂંકાવ્યું હતું.