રાજકોટ: શહેરમાં હાઈપ્રોફાઈલ કુટણખાનાનો પર્દાફાશ થયો છે. શહેરના જ્યુબિલી ગાર્ડન પાસે આવેલી BSNLની ઓફિસના ગેસ્ટહાઉસમાં આ કુટણખાનું ધમધમી રહ્યું હતું.
પોલીસે ગેસ્ટહાઉસનું સંચાલન કરનાર કર્મચારી અને તેની પત્ની તેમજ પુત્ર તેમજ BSNLના ક્લાસ-2 અધિકારી અને મોજ કરવા આવેલા એક યુવાન સહિત કુલ 5ની ધરપકડ કરી છે.
આ મામલે મળતી માહિતી પ્રમાણે IBને આ અંગે માહિતી મળી હતી અને ત્યાર બાદ IBએ રાજકોટની પ્રદ્યુમનનગર પોલીસને તપાસ કરવા આદેશ કર્યો હતો અને ત્યારબાદ પોલીસે BSNLની ઓફિસ પર દરોડા પાડ્યા હતા. પોલીસ દરોડા દરમિયાન 5 યુવતી પણ મળી આવી હતી.
ઉલ્લેખનીય છે કે આ કિસ્સામાં પોલીસનું માનીએ તો અહીં પ્રેમી યુગલને રૂમની સુવિધા પુરી પાડવામાં આવતી હતી. આ સાથે જ મોજ કરવા આવતા યુવાનોને યુવતી પુરી પડાતી હતી.
છેલ્લા છ મહિનાથી આ ગોરખધંધો ચાલતો હતો. પોલીસે ગેસ્ટહાઉસનું સંચાલન કરતા કર્મચારી હરેશ ભડિયાદરા અને તેની પત્ની મીના ઉર્ફે મીનાક્ષી અને પુત્ર ગૌરવ સહિત ક્લાસ -2 અધિકારી પગાર મહેન્દ્ર ઠાકરની ધરપકડ કરી છે.
આપને જણાવી દઇએ કે દરોડા સમયે ગેસ્ટહાઉસમાંથી કોન્ડમ અને દવા સહિતની સામગ્રી પણ પોલીસે કબજે કરી છે. પોલીસ તપાસમાં સામે આવ્યું કે પ્રેમી યુગલને 200થી 500 રૂપિયામાં રૂમ આપવામાં આવતી હતી અને મોજ કરવા આવતા યુવાનોને યુવતી ઉપલબ્ધ કરાવાતી હતી અને યુવાનો પાસેથી 1 હજાર રૂપિયા લેવામાં આવતા હતા. હાલ આ મામલે પોલીસે આરોપીઓની ધરપકડ કરીને વધુ તપાસ હાથ ધરી છે.