રાજકોટ / લોકમેળાના નિયમોમાં અપાઇ છૂટછાટ, હોનારત સર્જાય તો જવાબદારી કોની ?

જ્યાં એક તરફ રાઈડ સંચાલકોને રાઈડ ફિટનેસના નિયમો ખૂંચી  રહ્યા છે તો બીજી તરફ સરકારી તંત્રને લોકોની સુરક્ષા અને મહેસૂલી લાભ બન્ને વચ્ચેનો રસ્તો  કાઢવા કવાયત હાથ ધરવી પડી છે. 

22 તારીખથી યોજાશે સૌરાષ્ટ્રનો સૌથી મોટો લોકમેળો

ઉલ્લેખનીય છે કે, જન્માષ્ટમીના તહેવારો દરમિયાન આગામી 22 તારીખથી રાજકોટમાં સૌરાષ્ટ્રનો સૌથી મોટો લોકમેળો યોજાઈ રહ્યો છે. એ લોક મેળાને મલ્હાર લોકમેળો એવું નામ આપવામાં આવ્યું છે. જ્યાં ફક્ત રાજકોટ કે સૌરાષ્ટ્રમાંથી નહીં પણ સમગ્ર ગુજરાત માંથી લોકો લોકમેળાને માણવા ઉમટી પડે છે. 

રાઇડ્સના સ્ટ્રક્ચર ગોઠવવાનું કામ થયું શરૂ

હવે રાજકોટના લોકમેળાને  ગણતરીના દિવસો જ બાકી રહ્યા છે ત્યારે રાજકોટ ખાતે મેળો જે મેદાનમાં યોજાય છે ત્યાં મનોરંજનની વિવિધ રાઈડ અને ચકડોળ તેમજ મોતના કૂવા જેવા તમાશાના સ્ટ્રક્ચર ગોઠવવાનું હાલ શરૂ થઈ ગયું છે. રાઈડના સંચાલકો અને  અને સ્ટોલધારકોએ અત્યારથી માળખાઓ ગોઠવાની તૈયારી શરૂ કરી દીધી છે.  

પરંતુ થોડા દિવસ પહેલા અમદાવાદના કાંકરિયામાં રાઈડ પડવાની ઘટના બની હતી તે ઘટના હજુ જનમાનસમાંથી વિસરાઈ નથી. આથી લોકોની સુરક્ષાને ધ્યાનમાં રાખીને રાજકોટના લોકમેળામાં પણ રાઈડની ફિટનેસની ચકાસણી હાથ ધરવામાં આવી રહી છે. સાથે જ સરકારે બનાવેલા નિયમોના પાલનમાં કોઈ ચૂક ન કરે તેની પણ આગોતરી ચકાસણી થઈ રહી છે. 

તંત્રએ નક્કી કર્યા નિયમો

આપને જણાવી દઈએ કે,  અમદાવાદમાં  કાંકરિયા પાર્કમાં રાઈડ તૂટી પડયા બાદ લોકોમાં આવી રાઈડમાં બેસવામાં દહેશત પ્રવર્તી રહી છે અને તંત્ર આવી રાઈડ સામે  સેફ્ટી નિયમો લાદવા માટે ઘણા નિયમો બનાવી ચૂક્યું છે.
જે મુજબ .  
1. રાઈડનુ નામ / પ્રકાર  
2. ઉત્પાદક કંપનીનુ નામ  
3. મોડેલ (મેન્યુફેકચરીંગ વર્ષ)  
4. રાઈડની આયુષ્ય મર્યાદા  
5. અત્યાર સુધીમા રાઈડનો થયેલ વપરાશ  
6. અધિકૃત કરેલ રાઈડની ઈન્સટોલેશન અંગેનુ અઘિકૃત કરેલ ડ્રોઈંગની વિગતો  
7. સક્ષમ અધિકૃત સંસ્થા દ્વારા પ્રમાણિત કરેલ ડિઝાઈનની વિગતો  
8. છેલ્લે કરેલ મરામતની વિગતો  
9. રાઈડમા કરેલ ફેરફારની વિગતો  
10. મૂળ OEM દ્વારા સૂચિત રાઈડ ઓપરેટરની લાયકાત અને  અનુભવ  
11. રાઈડની માલિકી / ભાડા કરાર / લીઝ અંગેના આધાર પુરાવા  

અમુક નિયમોમાં છૂટાછટ મળી હોવાની આવી ગંધ

આવા અનેક નિયમો રાઈડ સંચાલકો પર  લાદવા સરકાર તરફથી આયોજન કરાયું હતું. પરંતુ તેનો અનેક રાઈડ માલિકો અને સંચાલકોએ વિરોધ કર્યો હતો. કેટલાક રાઈડ માલિકોએ ફિટનેસ સર્ટીના નિયમોના વિરોધ સ્વરૂપે  મેળામાં જગ્યાની હરાજીમાં ભાગ લીધો ના હતો.  જોકે તે પછી આજે જ્યારે મેળાની તૈયારી થઈ રહી છે.  ત્યારે  અનેક રાઈડો ગોઠવના તૈયારી થઈ રહી છે. 
અચાનક રાઈડ સંચાલકોને જાગેલા રસનું કારણ જાણવાનો પ્રયાસ કર્યો તો રાઈડ સંચાલકો પાસેથી જાણવા મળ્યું કે  તેમને અમુક નિયમોમા છૂટાછટ મળી છે. તેમનું કહેવું છે કે, સરકારે રહેમ નજર રાખીને અમને ઘણા નિયમોમાં છૂટછાટ આપી છે. તો આ તરફ સરકારી અધિકારીઓ એમ કહી રહ્યા છે કે, કોઈ નિયમોમાં બાંધછોડ કરવામાં આવી  નથી.બધુ નિયમ પ્રમાણે જ થશે.

એક તરફ  રાઈડ સંચાલકો એમ કહી રહ્યા છે કે, રાઈડ ચલાવવાના નિયમોમાં છૂટછાટ મળી છે. તો બીજી તરફ તંત્ર જાણે લોકોની સુરક્ષા માટે ચિંતિતી હોય તેમ  એડવાઈઝરી બહાર પાડીને તે પ્રમાણે  પગલાં માટે જિલ્લા કક્ષાએ જવાબદારીઓ સોંપી છે. 

જેમાં રાજકોટમાં  કલેકટર દ્વારા 10 સભ્યોની ટીમ બનાવવામાં આવી છે જે રાઈડ ની ફિટનેસ સહિતના મુદ્દાઓ પર ધ્યાન આપશે. પરંતુ સવાલ એ છે કે રાઈડ સંચાલકોને નિયમમાં છૂટછાટ આપવા માટે તંત્ર કેમ મજબૂર બન્યું  છે?