વાહ નેતાજી / સરકારે સ્કૂલો બંધ રાખી પરંતુ સન્માન કાર્યક્રમો તો યોજાયા, ભાજપ સાંસદ પાછા તેમાં ચીફ ગેસ્ટ

• રાજકોટના ધોરાજીમાં યોજાયો  સાંસ્કૃતિક કાર્યક્રમ
• કાર્યક્રમમાં કોરોના ગાઈડલાઈનના ધજાગરા ઉડ્યા
• ભૂતવડમાં સરસ્વતી વિદ્યાપીઠમાં યોજાયો હતો કાર્યક્રમ

રાજકોટમાં કોરોનાના કહેર વચ્ચે ધોરાજીમાં સાંસ્કૃતિક કાર્યક્રમ યોજાયો. અને કાર્યક્રમમાં કોરોના ગાઈડલાઈનના ધજાગરા ઉડ્યા હતા. ભૂતવડમાં સરસ્વતી વિદ્યાપીઠમાં કાર્યક્રમ યોજાયો હતો. ત્યારે આ કાર્યક્રમમાં ભાજપના સાંસદ રમેશ ધડુક પણ હાજર હતા. હાલ કોરોનાના કારણે કાર્યક્રમો યોજવાની મનાઇ છે છતાં પણ કોણે કાર્યક્રમ યોજવાની મંજૂરી આપી. સૌથી મોટો સવાલ એ જ છે કે, નેતા નિયમો તોડે, તંત્ર જોતું રહે અને પ્રજા સહન કરતી રહે?. સાંસદ રમેશ ધડુકને નિયમોનો ખ્યાલ નથી. શું પોલીસમાં નેતાઓ સામે કાર્યવાહી કરવાની હિંમત નથી. સાંસદ આવા સમયે નિયમો પાળવાની સલાહ ન આપી શકે. સરસ્વતી વિદ્યાપીઠના જવાબદારોને કોવિડના નિયમો ખ્યાલ નથી?, કોરોનાની આ લહેર કેટલી ઘાતક છે તેનો અંદાજ નથી?.

હકિકતે નેતાની ક્યાં જરૂર છે?

હાલના સમયમાં સાંસદ અને ધારાસભ્યોની લોકોના કાર્યક્રમમાં નહીં. પરંતુ સારવાર કેન્દ્ર પર જરૂર છે. જ્યાં લોકો સારવાર માટે વ્યવસ્થાઓ શોધી રહ્યા છે. અને નેતાઓ આવા કાર્યક્રમમાં ફોટો પડાવવા પહોંચી જાય છે. લોકો પોતાના મતવિસ્તારના સાંસદ અને ધારાસભ્યોને રેમડેસિવિર માટે દિવસભર ફોન પર ફોન લગાવે છે. પરંતુ કોઈ નેતા ન તો ફોન ઉપાડે છે. ન જનતાની વચ્ચે જઈ તેની વાત સાંભળે છે.

અગાઉ સાંસદ રમેશ ધડૂકની હાજરીમાં જૂનાગઢમાં થયો હતો કાર્યક્રમ

જૂનાગઢમાં કોરોના મહામારી વચ્ચે લોકડાયરો યોજાયો હતો. આ લોકડાયરામા હજારોની સંખ્યામાં લોકો એકઠા થયા હતાં. તેમજ પોરબંદરના સાંસદ રમેશ ધડુક પણ ડાયરામાં હાજર રહ્યાં હતાં. કેબિનેટ મંત્રીના પૂત્ર રાજ ચાવડા પણ ઉપસ્થિત રહ્યાં હતાં. કેબિનેટ મંત્રીનો મત વિસ્તારમાં આ લોકડાયરો યોજાયો હતો. ભાલેચડા ગામે 30 માર્ચે લોક ડાયરો યોજાયો હતો. ગીતા રબારી, અર્જુન આહીર, દેવરાજ ગઢવી આ સમયે હાજર રહ્યાં હતાં.