રાજકોટમાં દુષ્કર્મની એક ઘટનામાં ૧૯ વર્ષની પિતા વિહોણી યુવતીને ચાર સંતાનના પિતા એવા ૪૦ વર્ષના શખ્સે 'પ્રેમજાળ'માં ફસાવી પાણીના ટેન્કરની કેબિનમાં દસ-દસ દિવસના અંતરે ત્રણ વખત બળજબરી આચરતાં આ યુવતીને ચાર માસનો ગર્ભ રહી જતાં મામલો પોલીસ સુધી પહોંચતાં યુનિવર્સિટી પોલીસે ગુનો દાખલ કરી હવસખોરને સકંજામાં લઇ કાર્યવાહી હાથ ધરી છે.
ઘટનાની જાણવા મળેલી વિગત મુજબ શહેરમાં રહેતી ૧૯ વર્ષની એક યુવતીના પિતા હયાત નથી. માતા અને ભાઇ સાથે રહી આ યુવતી નાની એવી કેિબનમાં છુટક કરિયાણું, તમાકુ, પાન-મસાલા વેચી ગુજરાન ચલાવવા ઉપરાંત પારકા ઘરનાં કામ પણ કરે છે. છ મહિના પહેલાં તે પાટીદાર ચોકમાં એક લગ્ન પ્રસંગમાં ગઇ હતી ત્યારે તેની મુલાકાત ગંગોત્રીપાર્ક પાસે રહેતા જીવરાજ નામના આશરે ચાલીસેક વર્ષના શખ્સ સાથે થઇ હતી. એ પછી જીવરાજની અંદર હવસનો કીડો સળવળ્યો હોય તેમ તે યુવતીની કેિબને પહોંચ્યો હતો અને મિરાજ તમાકુની પડીકીની ખરીદી કરી હતી. એ બહાને પછી તે અવારનવાર અહીં આવવા માંડ્યો હતો અને તમાકુની પડીકી લેવાના બહાને યુવતી સાથે વાતચીતનો દોર આગળ વધાર્યો હતો અને પ્રેમજાળમાં ફસાવી લીધી હતી.
વોટર સપ્લાયરને ત્યાં પાણીના ટેન્કરના ફેરા કરવાનું કામ કરતા જીવરાજે આજથી ચારેક મહિના પહેલાં એક દિવસ યુવતીને ટેન્કરમાં જ બેસાડી દીધી હતી અને સાધુ વાસવાણી રોડ, ગાર્ડન સિદ્ધિ ફલેટની બાજુમાં ટેન્કર ઊભું રાખી દરવાજા બંધ કરી ટેન્કરની કેિબનમાં જ તેની સાથે બળજબરી આચરી લીધી હતી. યુવતીએ ના પાડવા છતાં તે સમજ્યો નહોતો. આ જ રીતે દસ-દસ દિવસના અંતરે ફરીથી બે વખત ટેન્કરમાં જ તેની સાથે બળજબરી કરી લીધી હતી.
દરમિયાન ગઇ કાલે યુવતીને પેટમાં દુખાવો ઉપડતાં અને પોતાને ચારેક મહિનાથી માસિક પણ ન આવ્યાનું તેણે માતાને કહેતાં તેને ઝનાના હોસ્પિટલમાં દાખલ કરાવમાં આવી હતી. અહીં તબીબની તપાસમાં પેટમાં ચાર માસનો ગર્ભ હોવાનું ખૂલતાં માતા સહિતનાં સ્વજનોએ પૂછતાછ કરતાં યુવતીએ પોતાની સાથે જીવરાજે પાણીના ટેન્કરમાં બળજબરી કર્યાનું કહેતાં યુનિવર્સિટી પોલીસને જાણ કરવામાં આવતાં પી.આઇ. એ.એલ. આચાર્યની રાહબરીમાં પીએસઆઇ જે.એ. ચાવડા, એએસઆઇ અજયસિંહ ચૂડાસમા, વિપુલભાઇ સહિતનાએ આઇપીસી ૩૭૬ મુજબ ગુનો નોંધી જીવરાજને સકંજામાં લીધો છે. આ શખ્સને સંતાનમાં બે પુત્રી અને બે પુત્ર છે. તે ગંગોત્રીપાર્ક પાછળ મફતીયાપરામાં રહે છે. પોલીસે તેની પૂછતાછ કરવા તજવીજ હાથ ધરી છે.