રાજકોટ સહકારી ડેરીએ વર્ષ દરમિયાન ચોથી વખત દૂધના ભાવમાં વધારો કરતાં પશુપાલકોમાં આનંદ છવાયો છે.
રાજકોટ સહકારી ડેરીએ ચોથી વખત ભાવવધારો જાહેર કર્યો
પશુપાલકોને ચૂકવાશે 740 રૂપિયા
દૂધ ઉત્પાદક સંઘના ચેરમેને કરી જાહેરાત
અમૂલ, બનાસડેરી બાદ રાજકોટ સહકારી ડેરીના પશુપાલકો માટે આનંદના સમાચાર સામે આવી રહ્યા છે. રાજકોટ ડેરીએ પશુપાલકો પાસેથી લેવાતા દૂધના ખરીદ ભાવમાં 10 રૂપિયાનો વધારો કરીને પશુપાલકોને મોટી રાહત આપી છે. આ નાવા ભાવ 11 જૂનથી લાગુ કરી પશુપાલકોને ચુકવવામાં આવશે. વર્ષ દરમિયાન સહકારી ડેરીએ ચોથી વખત ભાવવધારો જાહેર કર્યો હોવાથી પશુપાલકોમાં આનંદની લાગણી જોવા મળી રહી છે.
દૂધના ખરીદ ભાવમાં ફરી 10 રૂપિયાનો ભાવવધારો કરાયો
રાજકોટ સહકારી ડેરી દ્વારા દૂધના ખરીદ ભાવમાં ફરી 10 રૂપિયાનો ભાવવધારો જાહેર કરવામાં આવ્યો છે. રાજકોટ સહકારી ડેરીના દૂધ ઉત્પાદન સંઘના ચેરમેને ભાવવધારાની જાહેરાત કરી છે. મહત્વનું છે કે, તાજેતરમાં પશુ દાણા અને ચારામાં થઇ રહેલા ભાવ વધારાને લીધે પશુપાલકોને પશુઓ રાખવા પરવડે તેમ નથી. ભાવ વધારા સામે દુધના ભાવ ઓછા હોવાથી પશુપાલકોનો મોહભંગ થઇ રહ્યો છે. જેને લઈને ડેરી દ્વારા આ રાહતરૂપ નિર્ણય કરવામાં આવ્યો છે. 11 જૂનથી લાગુ કરવામાં આવનાર આ નવા ભાવ પ્રમાણે પશુપાલકોને કિલો ફેટ દીઠ 740 રૂપિયા ચુકવામાં આવશે. દૂધ ઉત્પાદક સંઘના ચેરમેનની આ જાહેરાતની અમલવારીની સાથે જ રાજકોટ જિલ્લાના લાખો પશુપાલકોને સીધો ફાયદો થશે.
ચાલુ વર્ષમાં સહકારી ડેરીએ ચોથી વખત કર્યો ભાવ વધારો
નોંધનિય છે કે, દૈનિક 3.5 લાખ લિટર આવક અને 4.5 લાખ લિટર ખપતને પગલે રાજકોટ દૂધ ઉત્પાદન સંઘનો વિકાસ ઉતરોતર વધી રહ્યો છે ત્યારે દૂધની આવક દૈનિક 3.૫ લાખ લીટર આસપાસ છે ત્યારે વેચાણ ૪.૫ લાખ લીટર થઇ રહ્યું છે જેનો મતલબ દૈનિક ૧ લાખ લીટરની દુધની અછત સર્જાય છે. જેના કારણો સર સંઘ દ્વારા અન્ય ડેરીમાંથી પણ દૂધ ખરીદવામાં આવી રહ્યું છે.ઉલ્લેખનીય છે કે ચાલુ વર્ષમાં આ ચોથી વખત ભાવમાં વધારો કરવામાં આવ્યો છે.
તાજેતરમાં બનાસડેરી, અમૂલ ડેરીએ કર્યો હતો ભાવવધારો
તાજેતરમાં બનાસડેરી તરફથી પશુપાલકો અને ખેડૂતોને મોટી ભેટ આપવામાં આવી હતી. બનાસડેરીએ પશુપાલકોને દુધના ભાવમાં પ્રતિ કિલોના ફેટ પર રૂપિયા 20નો વધારો આપવાની જાહેરાત કરી હતી. બનાસડેરીના આ નિર્ણયથી બનાસકાંઠા જિલ્નાના સાડા ચાર લાખ પશુપાલકોને સીધો લાભ પહોંચશે. ભાવ વધારાની જાહેરાત બાદ પશુપાલકોને પ્રતિકિલો ફેટે રૂ.715ને સ્થાને રૂ.735 રૂપિયા આપવામાં આવી રહ્યા છે. આ અગાઉ અમૂલ ડેરીએ દૂધના ખરીદ ભાવમાં 10 રૂપિયાનો વધારો કર્યો હતો. અગાઉ ભેંસના દૂધના ભાવ પ્રતિ કિલો 730 રૂપિયા મળતો હતો જે હવે 740 કરવામાં આવ્યો છે. તો ગાયના દૂધના પ્રિત કિલો ફેટના ભાવ 331.80 રૂપિયા મળતા હતા જે હવે 336.40 રૂપિયા મળશે. જેના કારણે પશુપાલક સાથે જોડાયેલા આણંદ, ખેડા અને મહિસાગર જિલ્લાના 6 લાખથી વધુ પશુપાલકોને લાભ મળી રહ્યો છે.