રાજકોટમાં કાયદો વ્યવસ્થા કથળતી સ્થિતિમાં જોવા મળી રહી છે. રાજકોટ શહેરમાં અસામાજિક તત્વો બેફામ ફરી રહ્યા છે. દરરોજ હેરાનગતિની ઘટનાઓ સામે આવી રહી છે.
રાજકોટમાં કાયદો-વ્યવસ્થા સામે સવાલ
શક્તિનગરમાં ખુલ્લી તલવાર સાથે રોફ જમાવતા હતા શખ્સો
રેલનગરમાં દુકાન સામે કાર પાર્ક કરવા મુદ્દે હુમલો કરાયો
રાજકોટ પોલીસ કમિશનર કચેરી છેલ્લા કેટલાક સમયથી સમાચારોમાં છે. અનેક તોડકાંડના આરોપોના કારણે આખા પોલીસ બેડામાં ખળભળાટ મચી ગયો. રાજકોટ પોલીસ કમિશનર પર લાગેલા આરોપ મામલે હજુ તો તપાસ સમિતિનો રિપોર્ટ આવ્યો નથી, ત્યારે વધુ એક વ્યક્તિએ ક્રાઈમ બ્રાન્ચ પર વસૂલીના આરોપ લગાવીને કમિશનરની ઓફિસમાં જ ફિનાઈલ પીવાનો પ્રયાસ કર્યો છે. પોલીસની ગરિમાને લજવે તેવા આરોપનું એપી સેન્ટર બનેલી રાજકોટ પોલીસ કમિશનરની કચેરીએ આ હોબાળા સાથે જ વધુ એક વસૂલીકાંડનો પણ ખુલાસો થયો.
આ વચ્ચે રાજકોટ શહેરમાં અનેક ગુનાખોરીના કિસ્સાઓ સામે આવી રહ્યા છે. છેલ્લા કેટલાક સમયથી અસામાજિક તત્વો પોતાને ડોન સમજી રહ્યા હોય તેમ શહેરમાં ફરી રહ્યા છે. મનફાવે ત્યાં દાદાગીરી કરે છે, સામાન્ય પ્રજા પર પોતાનો રોફ જમાવે છે, મહિલાઓ કેટલાક વિસ્તારોમાં અને રાત્રે નિકળતા ડરી રહી છે. ખુદ પોલીસ સવાલોના ઘેરામાં છે ત્યારે પ્રજા કોની મદદ લે તે એક મોટો સવાલ બન્યો છે. હાલ રાજકોટની પ્રજા અરજ કરી રહી છે કે આવા અસામાજિક તત્વો પર પોલીસ સંપૂર્ણ રીતે કાબૂ મેળવે. ગુનાખોરી અટકે અને કાયદાનું યોગ્ય જગ્યાએ પાલન કરવામાં આવે. લૂંટ, ચોરી, હપ્તાખોરી, તોડ, મારામારી, હત્યા, દારુની હેરાફેરી, ચોરી, ચેઇન સ્નેચિંગ જેવી ઘટનાઓ ન બને તે માટે પોલીસ એક્શનમાં આવે.
શક્તિનગર સોસાયટીમાં ખુલ્લી તલવાર સાથે રોફ જમાવતા શખ્સો
રાધા-કૃષ્ણ સોસાયટી બાદ શક્તિનગરમાં અસામાજિક તત્વોનો ત્રાસ વધ્યો છે. વાવડી વોર્ડ નં. 12માં ડોન બનીને ફરતા લુખ્ખાઓનો એક વીડિયો વાયરલ થયો હતો. જેમાં તેઓ ખુલ્લી તરવાર અને બેઝબોલના ધોકા સાથે રોફ જમાવતા નજરે પડે છે. તો મહિલાઓ સાથે ગાળાગાળી પણ કરે છે. જોકે આ વીડિયો પોલીસને મળતા કાર્યવાહી કરાઈ છે. તાલુકા પોલીસે 2 શખ્સોની ધરપકડ કરીને કાર્યવાહી હાથ ધરી છે. રહીમ ઉર્ફે જામનગની અને રાજુ મકવાણાની ધરપકડ કરવામાં આવી છે. પોલીસે ઘાતક હથિયારો કબ્જે લીધા છે.
રેલનગર વિસ્તારમાં દુકાન સામે કાર પાર્ક કરવા મામલે કરાયો હુમલો
રાજકોટના રેલનગરમાં વિસ્તારમાં દુકાન સામે કાર પાર્ક કરવા મુદ્દે અસામાજિક તત્વોએ વેપારી પર હુમલો કર્યો હતો. આ હુમલાની ઘટના CCTVમાં કેદ થઇ છે. આ મામલે પ્રદ્યુમ્નનગર પોલીસ સ્ટેશનમાં ફરિયાદ થઇ છે.