સાવધાન / તમારું સંતાન રાત્રે મોડું આવે છે તો ચેતી જાઓ, રાજકોટમાં જુઓ કેવા કાંડ થયા

• ધનાઢય પરિવારના સંતાનો ચોરીના રવાડે ચઢી ગયા
• કાયદાના સંઘર્ષમાં આવેલ 2 સગીર અને એક આરોપીની ધરપકડ 
• લોખંડની ચોરી કરી યુવાનો ફરાર થયા હતા

સંતાન સૌ કોઈને વ્હાલા હોય છે. પણ સંતાનને એટલી પણ છૂટ ન આપવી જોઈએ કે ભવિષ્યમાં મોટું નુક્સાન ભોગવવું પડે. રાજકોટમાં ધનાઢ્ય પરિવારના કેટલાક સંતાનોએ એવો કાંડ કર્યો કે માતા-પિતાનું શિશ શરમથી ઝુકી ગયું હતું. નબીરાઓના આ કાંડનું કારણ જાણીને ખુદ પોલીસ પણ ચોંકી ઉઠી હતી.

 
ચોરી કરી આનંદ મેળવતા નબીરા 
પોતાના સંતાન કેવા મિત્રો સાથે ઉઠે બેસે છે. અને કેવા લોકોની સંગતમાં છે તે જાણવું તમામ માતા-પિતા માટે જરૂરી બની ગયું છે. કારણ કે, ધનાઢય પરિવારના ગેરમાર્ગે દોરાયેલા સંતાનોનો એક કિસ્સો રાજકોટમાં સામે આવ્યો છે. યુવાનોને ડ્રગ્સ કે નશાની લતે ચડયા હોય તેવા અનેક કિસ્સાઓ સામે આવતા હોય છે પણ રાજકોટથી એક એવી ઘટના સામે આવી છે જેમાં ધનાઢય પરિવારના સંતાનો ચોરીના રવાડે ચઢી ગયા છે. છેલ્લા એક સપ્તાહમાં પોલીસે એન્જિનિયરિંગનો અભ્યાસ કરતા 2 વિદ્યાર્થીને નકલી નોટ સાથે ઝડપી લીધા હતા. પોલીસે વિદ્યાર્થીઓને ચોરી કરતા ઝડપાયા છે. કાયદાના સંઘર્ષમાં 2 સગીર અને એક આરોપીની પોલીસે ધરપકડ કરી છે.   
 
બર્થ-ડે પાર્ટી માટે કરી ચોરી 
પૈસા માટે ચોરી કરવાનો 3 મિત્રએ પ્લાન બનાવ્યો હતો. જેમાં યુવાનોએ બે કાર ભાડે કરી બાદમાં અલગ અલગ બાંધકામ સાઈટ પર રેકી કરી અને 27 જૂનની રાત્રીએ પોણા ત્રણ વાગે ચોરી કરવા પહોંચ્યા હતા. બાંધકામ સાઈટ પરથી 150 કિલો લોખંડની ચોરી કરી મોંઘીદાટ કારમાં લોખંડનો ભંગાર ભરીને યુવાનો ફરાર થઈ ગયા હતા. પણ CCTV કેમેરામાં બાંધકામ સાઈટ માલિકને ચોરી કરતા યુવાનો દેખાતા પોલીસને જાણ કરી હતી. જેના આધારે પોલીસે ગણતરીના કલાકમાં જ કાયદાના સંઘર્ષમાં આવેલા 2 અને અન્ય એક યુવક મળીને 3ની ધરપકડ કરી છે. પોલીસની તપાસમાં  બર્થ-ડે પાર્ટી ઉજવવા માટે આ ચોરીને અંજામ આપ્યો હોવાનું ખૂલ્યું હતું. 

ત્રણેય સુખી-સંપન્ન પરિવારમાંથી આવે છે
ઝડપાયેલા 3 આરોપીમાં એક આરોપી કૃષ્ણ પાલ છે. જે તેના પિતા જમીન મકાન લે-વેચનું કામ કરે છે. જ્યારે એક સગીરના માતા ગીતા મેડિકલ સ્ટોર્સ ચલાવે છે. જ્યારે અન્ય એક સગીરના પિતા મેડીકલ ફિલ્ડ સાથે જ સંકળાયેલ છે. ત્રણેય સુખી-સંપન્ન પરિવારમાંથી આવે છે. મોંઘા મોબાઈલ વાપરે છે. અને મોજશોખ પુરા કરવા માટે ચોરીને અંજામ આપે છે. અગાઉ પણ આ યુવાનોએ ચોરી કરી હોવાનું તપાસમાં ખુલ્યું છે.