કેદીઓ રોજ 40થી 50 કિલો બનાવી કરે છે વેચાણ, બે મહિનામાં 1600 કિલો અડદિયાનું ઉત્પાદન, કિલોના ભાવ 300 રૂપિયા
સેન્ટ્રલ જેલમાં બને છે શુદ્ધ ઘીના ડ્રાયફ્રૂટ્સ અડદિયા
જેલમાં બનતા અડદિયા સૌરાષ્ટ્ર ભરમાં પ્રખ્યાત
કુલ 1752 કેદીઓ છે રાજકોટ મધ્યસ્થ જેલમાં
અડદિયા શબ્દ સાંભળતા જ લોકોના મોઢામાં પાણી આવી જાય છે.તેમાં પણ હાલમાં શિયાળો ચાલી રહ્યો છે. એટલે કે, અડદિયાની સીઝન ચાલી રહી છે. અને આ સિઝનમાં પ્રખ્યાત જેલમાં શુદ્ધ ઘી અને ડ્રાયફ્રૂટ્સથી બનતા અડદિયા મળી જાય તો..? મજા જ પડી જાય.પરંતુ જેલમાં અડદિયા.? આવો પણ સવાલ થતો હશે.તો નવાઈ ત્યારે લાગશે જ્યારે એ જાણવા મળશે કે, આપણા ગુજરાતની એક જેલમાં બનતા અડદિયા ખુબ પ્રખ્યાત છે. અને દર વર્ષે લાખો રૂપિયાના અડદિયા કેદીઓ બનાવીને વેચાણ કરે છે.
ચોખ્ખા ઘીની જ વાનગી બનાવાય છે
આ છે રાજકોટની મધ્યસ્થ પોપટપરા જેલ ..સામાન્ય રીતે જેલનું નામ પડે એટલે લોકોને આરોપી, પોલીસ અને ગુનેગારોના જ વિચારો આવતા હોય છે . પરંતુ રાજકોટની મધ્યસ્થ જેલમાં કેદીઓ પોતે કરેલા ગુનાની સજા ભોગવવાની સાથે સાથે જિંદગીના પાઠ પણ શીખી રહ્યા છે. રાજકોટ સહિત સમગ્ર ગુજરાતની પ્રજાને ખાવા પીવાની શોખીન માનવમાં આવે છે . ત્યારે દરેક તહેવાર સીઝનમાં રાજકોટમાં ખાવા પીવાની ખાસ વસ્તુઓનું વેચાણ થાય છે. આ જ રીતે શિયાળામાં અહીં અડદિયાનું પણ ખૂબ ખવાય છે. ત્યારે રાજકોટ જેલના કેદીઓ પણ સ્વાદિષ્ટ અને સ્વાસ્થ્ય વર્ધક અડદિયા બનાવી રહ્યા છે. રાજકોટ જેલમાં કેદીઓ સંચાલિત ગૌ શાળા છે અને તેના ચોખ્ખા ઘીનો ઉપયોગ કરીને જ વાનગીઓ બનાવવામાં આવે છે . આ સાથે જ કેદીઓ અહીંયા અન્ય ઘણી વસ્તુઓ બનાવે છે. જેલમાં કુલ 5 જેટલા વિભાગો બનાવવામાં આવ્યા છે. જેમાં સુથારી વિભાગમાં જુના લાકડામાંથી નવી વસ્તુઓ બનાવવવામાં આવે છે. જેમાં ટેબલ બેંચીસ, ખુરશી, બાજોટ, શોપીસ, જુલો જેવી વસ્તુઓનો સમાવેશ થાય છે. જયારે જૂની સરકારી કચેરીઓમાં આવેલા લાકડાઓમાંથી વેસ્ટમાંથી બેસ્ટ વસ્તુઓ બનાવી માર્કેટમાં વહેંચણી કરવામાં આવે છે..
300 રૂપિયા કિલો અડદિયો
હાલ શિયાળાની સીઝન ચાલુ હોવાથી જેલમાં કેદીઓ દ્વારા ચોખા ઘીના અડદિયા બનાવવામાં આવે છે. જેની કિંમત 300 રૂપિયા કિલોએ રાખવામાં આવી છે. જે કિમત હાલ ડેરીમાં મળતા અડદિયાથી સસ્તી છે . કેદીઓ ભાઈઓ દ્વારા દરરોજ 150 થી 200 કિલો અડદિયા બનાવવામાં આવે છે જેનું વહેંચાણ જેલની કેન્ટીનમાં કેદી ભાઈઓ માટે તેમજ જાહેર જનતા માટે જેલના બહાર ગેટ પાસે આવેલ સેલ રૂમમાં કરવામાં આવે છે આની સાથે જ જેલમાં દરજી વિભાગમાં માસ્ક બનાવવાનું કામ કરવામાં આવે છે. તેની કિંમત 8 રૂપિયા રાખવામાં આવી છે અને અત્યાર સુધીમાં કેદીઓ દ્વારા કુલ 1 લાખથી વધુ માસ્ક જેલના દરજી વિભાગમાં બનાવવામાં આવ્યા છે. તેવી જ રીતે જેલમાં વણાટ વિભાગમાં પોલીસ કાર્પેટ, આસાન પટ્ટા, ગાલીચા સહિતની વસ્તુઓ તૈયાર કરવામાં આવે છે. જે માર્કેટની કિંમત કરતા ઓછી કિંમતમાં વેંચાણ કરવામાં આવે છે. .
કુલ 1752 કેદીઓ છે જેલમાં ભોગવી રહ્યા છે સજા
રાજકોટ મધ્યસ્થ જેલમાં કાચા અને પાકા કામના હાલ કુલ 1752 કેદીઓ ગુનાઓની સજા કાપી રહ્યા છે જેમાં 1671 પુરુષ કેદીઓ છે અને 81 મહિલા કેદીઓ અને તેની સાથે રહેલ 4 બાળકો છે. ત્યારે કહી શકાય કે રાજકોટની મધ્યસ્થ જેલના કેદીઓ પોતે કરેલા ગુનાની સજા ભોગવવાની સાથો સાથ જિંદગીના પાઠ પણ શીખી રહ્યા છે.