જસદણ પેટાચૂંટણી : મતદાનની તૈયારીઓને લઇને સ્થાનિક તંત્ર-ચૂંટણી પંચ સજ્જ

જસદણમાં ગુરૂવારે પેટાચૂંટણી યોજાવવાની છે. જસદણમાં 159 સ્થળો પર 262 બુથ પર EVM અને VVPATથી મતદાન યોજાવા જઇ રહ્યું છે ત્યારે સ્થાનિક વ્યવસ્થાતંત્ર અને ચૂંટણી પંચ પણ સક્રિય થયું છે. જિલ્લામાં 72 સ્થળના 126 બુથ પર વિશેષ તાકેદારી રાખવામાં આવી છે.

પેટાચૂંટણીને લઈને પોલીસ પણ સજ્જ થઈ છે. ટાચૂંટણીમાં 1100 પોલીસ જવાનો ગોઠવવામાં આવ્યા છે. જેમાં પોલીસના 306 ગૃહરક્ષક દળના 311 જવાનો તહેનાત કરવામાં આવ્યા છે. લશ્કરી દળની 6 કંપની અને પેરા મિલિટરીની 6 કંપનીના 540 જવાનો પણ તહેનાત કરવામાં આવ્યા છે.

મહત્વનું છે કે જસદણમાં ગુરૂવારે 2 લાખ 24 હજાર મતદારો મતદાન કરશે. 1 લાખ 5 હજાર મહિલાઓ અને 1 લાખ 18 હજાર પુરૂષો પેટાચૂંટણીમાં મતદાન કરશે.

ઉલ્લેખનીય છે કે કોંગ્રેસના પીઢ નેતા કુંવરજી બાવળિયાએ પક્ષ સાથે છેડો ફાડ્યા બાદ ભાજપમાં જોડાયા હતા. જેના પગલે જસદણ બેઠક ખાલી પડતા વિધાનસભાની ચૂંટણી યોજવામાં આવી રહી છે. તો આ તરફ કોંગ્રેસ દ્વારા પણ કોળી સમાજમાં ઓખળ ધરાવતા અવસર નાકિયાને ઉમેદવાર તરીકે જાહેર કરવામાં આવ્યા છે. ત્યારે આવતીકાલે યોજાનાર ચૂંટણી જંગને લઇને મતદારોમાં પણ ઉત્સાહ જોવા મળ્યો છે. 

આપને જણાવી દઇએ કે કેન્દ્રીય ચૂંટણીપંચ દ્વારા છેલ્લી બે ચૂંટણીથી મહિલા મતદાન મથકની નવી સિસ્ટમ અમલી કરવામાં આવેલ છે. જેમાં વિધાનસભા બેઠક દીઠ એક મહિલા મતદાન મથક રાખવામાં આવતું હતું અને તેમાં ફરજ બજાવનારા સ્ટાફ માટે ડ્રેસ કલર કોડ હતો. જેના બદલે આ પેટાચૂંટણી માટે બે મહિલા મતદાન મથકો રાખવામાં આવેલ છે.