ચૂંટણી / મતદાનના એક દિવસ પહેલા ગુજરાત રાજકારણના આવ્યાં મોટા સમાચાર

રાજકોટ: લોકસભાની ચૂંટણી પહેલા ગુજરાતની રાજનીતિમા મોટા સમાચાર સામે આવ્યા છે. ખોડલધામના પૂર્વ ટ્રસ્ટી અને કોંગ્રેસના નેતા હાર્દિક પટેલે રાજકોટમાં મુલાકાત કરી છે. રાજકોટના ભક્તિનગરમાં નરેશ પટેલની ઓફિસમાં હાર્દિક પટેલ અને નરેશ પટેલે મુલાકાત કરી હતી. બન્ને આગેવાનોએ શુભેચ્છા મુલાકાત કરી હોવાનુ જાણાવવામાં આવી રહ્યુ છે. 

મળતી માહિતી મુજબ હાર્દિક પટેલ અને નરેશ પટેલ વચ્ચે ગુપ્ત એજન્ડા ચાલી રહ્યો છે. અને નરેશ પટેલ દ્વારા હાર્દિક પટેલને આડકતરી રીતે સમર્થન આપવામાં આવે છે. જોકે નરેશ પટેલે હજુ સુધી રાજકીય સમર્થન અંગે કોઈ પ્રતિક્રિયા આપી નથી. બન્ને આગેવાનો વચ્ચે અલ્પેશ કથીરિયાને જેલ મુક્ત કરાવવા સહિતના મુદ્દાઓને લઈને ચર્ચા થઈ હતી.
 
નિકોલની સભામાં થયો હતો હોબાળો
કોંગ્રેસ દ્વારા અમદાવાદમાં નિકોલ ખાતે ગીતા પટેલના સમર્થનમાં જાહેરસભાનું આયોજન કરવામાં આવ્યુ હતુ. જેમાં હાર્દિક પટેલ અને ગીતા પટેલ સહિતના આગેવાનો ઉપસ્થિત રહ્યા હતા. જો કે હાર્દિક પટેલ સભામાં બોલવા ઉભો થયો તે પહેલા સભામાં હોબાળો થયો હતો. સભામાં તોડફોડ કરવામાં આવી હતી. ત્યારે પોલીસે વચ્ચે પડીને મામલો થાળે પાડ્યો હતો. હોબાળો કરનાર શખ્સોની અટકાયત કરી હતી.
 
મળતી માહિતી મુજબ આ સભામાં અલ્પેશ કથીરિયાના સમર્થકોએ હાર્દિકનો વિરોધ કર્યો હતો. જેમાં તેમણે અલ્પેશ કથીરિયાને છોડાવવાની માંગ કરી હતી. પરંતુ હાર્દિક દ્વારા ભાજપના લોકો અલ્પેશ કથીરિયાના પોસ્ટર લઇને આવ્યા હોવાનો આક્ષેપ કરવામાં આવ્યો છે.

કોંગ્રેસના સ્ટાર પ્રચારક છે હાર્દિક પટેલ
કોંગ્રેસમાં જોડાતાની સાથે જ તેનો સ્ટાર પ્રચારક બની ગયેલા હાર્દિક પટેલ માટે પાર્ટીએ હવે હેલિકોપ્ટર પછી હવે પ્લેનની પણ વ્યવસ્થા કરી આપવામાં આવી છે. અત્યાર સુધી ગાડીમાં ફરતો હાર્દિક હવે હેલિકોપ્ટરમાં ફરીને પ્રચાર કરવા લાગ્યો છે. લોકસભા ચૂંટણીના પ્રચારના હવે ગણતરીના દિવસો બાકી રહ્યા છે, ત્યારે હેલિકોપ્ટર તથા પ્લેન દ્વારા હાર્દિક ગુજરાતના ખૂણેખૂણે સફર કરીને સભા સંબોધી રહ્યો છે.