ઉલ્લેખનીય છે કે રાજ્યમાં વરસાદ ખેંચાતા ખેડૂતો ભારે ચિંતામાં મુકાઇ ગયા છે. જ્યારે હવામાન વિભાગ દ્વારા પણ ચાર-પાંચ દિવસ કોઇ વરસાદની શક્યતા નહીંવત હોવાની આગાહી કરવામાં આવી હતી. જેને લઇને જગતના તાતની ચિંતામાં મુશ્કેલીનો વધારો થયો હતો.
જ્યારે બીજી તરફ રાજ્યના ડેમોમાં પાણી ઘટી જતાં પીવાના પાણીને લઇને પણ લોકોમાં ચિંતા જોવા મળી રહી છે. ત્યારે જાણે રાજ્યમાં હવામાને પલટો લેતાં કેટલાંક શહેરોમાં વાદળછાયું વાતાવરણ જોવા મળી રહ્યું છે. જેમાં મળતાં અહેવાલ મુજબ રાજકોટ અને સુરતના કેટલાંક વિસ્તારમાં ઝરમર વરસાદ પણ પડ્યો છે. આમ રાજ્યમાં ફરી વરસાદી માહોલ સર્જાતા ખેડૂતોમાં ખુશીનો માહલો જોવા મળી રહ્યો છે.
રાજકોટના કેટલાંક વિસ્તારમાં ઝરમર વરસાદ, ખેડૂતોમાં ખૂશીનો માહોલ
રાજકોટમાં વહેલી સવારથી શહેરમાં વાદળછાયું વાતાવરણ છવાયું છે. શહેરના કેટલાક વિસ્તારોમાં વરસાદી છાંટા વરસ્યા છે. જો કે ઝરમર વરસાદ વરસતા ખેડૂતોમાં ખુશીનો માહોલ જોવા મળી રહ્યો છે. ઉલ્લેખનીય છે કે વરસાદ ખેંચાતા ખેડૂતો ચિંતામાં મુકાયા છે. રાજ્યમાં હાલમાં ખેડૂતો સારા વરસાદની રાહ જોઈ રહ્યા છે. વરસાદ ન આવતા વાવેલો પાક નિષ્ફળ જાય તેવી શક્યતા છે.
સુરતના વાતાવરણમાં પલટો, કેટલાંક વિસ્તારોમાં વરસાદી છાંટા
સુરતમાં વહેલી સવારથી વરસાદનું આગમન થયુ છે. વાદળછાયા વાતાવરણ વચ્ચે વરસાદ વરસી રહ્યો છે. શહેરના કેટલાક વિસ્તારોમાં વરસાદી છાંટા વરસ્યા છે. જેમાં નાનપુરા, મજુરા, આઠવાગેટ વિસ્તારમાં વરસાદ વરસ્યો છે. જોક ધીમીધારે વરસાદ આવતા પાકને લઇને ચિંતિત ખેડૂતોમાં જાણે ખુશીની લહેર જોવા મળી રહી છે.