રાજકોટની માસૂમ દીકરી 'અંબા' ને તીક્ષ્ણ હથિયારનાં 20 ઘા મારીને તરછોડી દેવામાં આવી હતી. ઇટલીના દંપતીએ આ દીકરીને દત્તક લીધી. નવી માતા કેટરીનાએ જે વાત કરી એણે લોકોની આંખોના ભીંજવી દીધી હતી.
રાજકોટની દીકરીને ઇટલીના દંપતીએ લીધી દત્તક
દીકરીને તરછોડી દેવામાં આવી હતી
પૂર્વ CM વિજય રૂપાણીના હસ્તે ઇટલીના દંપતીએ લીધી દત્તક
રાજકોટની એક ઘટનાએ આજે ગુજરાતવાસીઓના દિલ જીતી લીધા હતા.
ગુજરાતની એક દીકરી ‘અંબા’ને આજે દત્તક લેવા માટે ઈટાલીનો પરિવાર રાજકોટ આવી પહોંચ્યો છે. આજે આ દીકરીને પૂર્વ CM વિજય રૂપાણીના હસ્તે ઇટલીના દંપતીને દત્તક અપાઇ છે.
દંપતી ગૂંથર અને કેટરીનાનું બીજું દત્તક સંતાન
આ દીકરી અંબાને અગાઉ ત્રણ મહિના અમૃતા હોસ્પિટલમાં સારવાર આપવામાં આવી હતી અને હવે ઈટાલીના દંપતીએ તેને દત્તક લેતા તે તેઓનું બીજુ સંતાન બનશે. હવે બે વર્ષની દીકરી અંબા પણ ઈટાલી જશે. પૂર્વ મુખ્યમંત્રીના હાથે આ દીકરીને દત્તક આપવામાં આવી હતી. દંપતી ગુંથર અને કેટરીનાએ ભારતમાંથી આ બીજું બાળક દત્તક લીધું છે.
નિર્દયી રીતે તરછોડી દેવામાં આવી હતી
આ માસૂમ દીકરી અંબાને ફેબ્રુઆરી 2020માં રાજકોટની મહિકા અને ઠેબચડા ગામની વચ્ચે નિર્દયી રીતે તરછોડી દેવામાં આવી હતી.
‘અંબા’ તીક્ષ્ણ હથિયારના 20 ઘા મારેલી હાલતમાં લોહીલુહાણ મળી આવી હતી. ત્રણ મહિના બાદ હોસ્પિટલના બિછાને મોત સામે લડીને તેણે જીતી મેળવી હતી. એ વખતે કલેક્ટર, કમિશનરથી લઈને ખુદ તત્કાલીન CM વિજય રૂપાણીએ અંબાને નવજીવન મળે એ માટે ઈશ્વર સમક્ષ પ્રાર્થના કરી હતી. હવે દીકરી અંબાને આશરો મળ્યો છે.
દીકરીની નવી માં કેટરીનાએ દીલ જીત્યું
અંબાની ઇટાલિયન માતા કેટરિનાએ જણાવ્યું હતું કે, હું ઇટાલીની એક હોસ્પિટલમાં નર્સીંગનું કામ કરું છું.
ઇટાલીમાં સંયુક્ત પરિવાર સાથે રહેતા હોવાથી અને પ્રથમ બાળક દત્તક લીધાના ચાર વર્ષ બાદ ફરી બાળક દત્તક લેવાની ઈચ્છા થતા અમે અંબાને દત્તક લીધી છે. હવે એક વર્ષ સુધી હું મારી જોબ છોડી અંબાની કેર કરીશ.
તેમણે કહ્યું હતું કે મને અને મારા પતિનેને ભારત અને તેમના લોકોનો સ્વભાવ ખુબ પસંદ છે. અને એટલા માટે જ અમે બીજું બાળક પણ ભારતમાંથી દત્તક લેવા નિર્ણય કર્યો છે.