મણિનગરમાં 10 દિવસની બાળકીને ત્યજી દેવાના કિસ્સામાં પોલીસે એક મહિલા અને રીક્ષા ચાલકની ધરપકડ કરી. પોલીસે 200થી વધુ સીસીટીવી ફૂટેજ તપાસીને આરોપી સુધી પહોંચી હતી. આરોપી તો પકડાયા પરંતુ બાળકી કોની તે હજુ પણ રહસ્યમય.
મણિનગરમાં બાળકીને ત્યજી દેનાર ઝડપાયા
રાજસ્થાનની મહિલા અને રીક્ષા ચાલકની ધરપકડ
બાળકીને મંદિરના ઓટલે મૂકીને થયા હતા ફરાર
સીસીટીવી ફુટેજના આધારે પોલીસે કરી ધરપકડ
અમદાવાદના મણિનગરમાં જોગણી માતાજીના મંદિર 10 દિવસની નવજાત બાળકીને ત્યજી દેનાર ઝડપાયા. ફતેહવાડીમાં રહેતો રીક્ષા ચાલક મુસ્તફા અજમેરી અને રાજસ્થાનની મહિલા પ્રશ્નના પ્રજાપતિની ધરપકડ કરવામાં આવી. આ બન્ને આરોપી બાળકીએ મંદિરના ઓટલે મૂકીને ફરાર થઈ ગયા હતા. પોલીસની તપાસમાં સીસીટીવી ફુટેજમાં એક રીક્ષાની શંકાસ્પદ હિલચાલ જોવા મળી હતી. પોલીસે આ ફુટેજને લઇને જુદાજુદા વિસ્તારમાંથી 200થી વધુ સીસીટીવી ફૂટેજ તપાસ્યા. ફતેવાડીમાં રહેતા રિક્ષાચાલક મુસ્તફા અજમેરી સુધી પહોંચી. રીક્ષા ચાલકની પૂછપરછમાં બાળકને ત્યજી દેવાનો ભેદ ઉકેલાયો. આ બાળકને રાજસ્થાનની મહિલા લાવી હોવાનું ખુલતાં પોલીસે બંનેની ધરપકડ કરી પૂછપરછ શરૂ કરી.
મહિલા આરોપી પોલીસને જુદા જુદા નિવેદન આપી રહી છે
બાળકને ત્યજી દેવાના કેસમાં મહિલા આરોપી પોલીસને જુદા જુદા નિવેદન આપી રહી છે. આ 10 દિવસનું બાળક તેને સીટીએમ નજીક એક બસ સ્ટેન્ડ નજીકથી મળ્યું હોવાનું કહી રહી છે. બાળકને ત્યજી દેવાની સલાહ રીક્ષા ચાલક મુસ્તાફ આપી હોવાનો બચાવ કરી રહી છે. પરંતુ મહિલાના નિવેદન શંકાસ્પદ છે કારણ કે મહિલા 15 દિવસ પહેલા અમદાવાદ આવી હતી. પ્રથમ પતિ સાથે છૂટાછેડા થયા બાદ રાજસ્થાનમાં વિનોદ પ્રજાપતિ સાથે રહે છે. વિનોદ પરણિત હોવાનું તપાસમાં ખુલ્યું છે. આ મહિલાને બાળક રસ્તામાં મળ્યું હોવાનું સતત રટણ કરી રહી છે. પોલીસને શંકા છે કે આ મહિલા બાળકને ઉઠાવીને લાવી હોય અથવા તો હ્યુમન ટ્રાફિકિંગ સાથે જોડાયેલી હોઈ શકે.
મહિલાના મોબાઇલની કોલ ડિટેઇલ્સ અને લોકેશનના આધારે તપાસ હાથ ધરી
હાલમાં તો પોલીસે બન્ને આરોપીની વધુ પૂછપરછ શરૂ કરી છે. મણિનગર પોલીસને બાળકીને ત્યજી દેનાર આરોપીને પકડવામાં તો સફળતા મળી. પરંતુ બાળકીની ઓળખ હજુ રહસ્યમય છે. હાલમાં પોલીસે મહિલા આરોપીના મોબાઈલની કોલ ડિટેઇલ્સ અને લોકેશનના આધારે તપાસ શરૂ કરી છે.