નવી દિલ્હીઃ આઇપીએલની આગામી સિઝનની હરાજી આ મહિને કોલકાતામાં યોજાવાની છે. આના માટે બધી ટીમોએ પૂરતી તૈયારી કરી લીધી છે. એમાંય 2008માં આઇપીએલનો પ્રથમ ખિતાબ જીતનારી રાજસ્થાન રોયલ્સ લાંબા સમયથી પોતાના બીજા ખિતાબની રાહ જોઈ રહી છે. આ વખતે એવું લાગી રહ્યું છે કે રાજસ્થાને અન્ય ટીમોને જોરદાર ટક્કર આપવાનું નક્કી કરી લીધું છે, જેના કારણે તે પોતાની ટીમમાં મોટા ફેરફાર કરી રહી છે. આઇપીએલની હરાજી પહેલાં તેણે પોતાના 11 ખેલાડીને રિલીઝ કરી દીધા છે. રિલીઝ થનારા ખેલાડીઓમાં રાજસ્થાન ટીમના સૌથી મોંઘા ખેલાડી જયદેવ ઉનડકટનો પણ સમાવેશ થાય છે. આ ઉપરાંત આર્યમાન બિરલા, એશ્ટન ટર્નર, ઈશ સોઢી, લિયામ લિવિંગસ્ટોન, ઓશાને થોમસ, પ્રશાંત ચોપરા, રાહુલ ત્રિપાઠી, શુભમ રંજન, સ્ટુઅર્ટ બિન્ની અને સુધેસન પણ સામેલ છે.
આઇપીએલની હરાજી ડિસેમ્બરમાં કોલકાતામાં યોજાવાની છે
રાજસ્થાન રોયલ્સએ પહેલાં જ તેના 11 ખેલાડી રિલીઝ કરી દીધા
અફઘાનિસ્તાનના ત્રણ ખેલાડીને કરાયા આમંત્રિત
હવે રાજસ્થાન રોયલ્સની નજર કેટલાક એવા ખેલાડીને સામેલ કરવા પર છે, જેઓ કંઈક ચમત્કારી પ્રદર્શન કરી શકે. આ જ વાતને ધ્યાનમાં રાખીને રાજસ્થાન રોયલ્સે ટ્રાયલ માટે અફઘાનિસ્તાનના ત્રણ ખેલાડીનો આમંત્રણ મોકલ્યું છે, જેમાં એક 14 વર્ષીય ચાઇનામેન બોલર પણ સામેલ છે. રાજસ્થાન રોયલ્સની ખાસ નજર આ બોલર પર છે. અફઘાનિસ્તાનના એક પત્રકારે સોશિયલ મીડિયા પર આ વાતનો ખુલાસો કર્યો છે. રોયલ્સે અફઘાનિસ્તાનના યુવા ચાઇનામેન સ્પિનર નૂર અહમદ લકનવાલ સહિત નેશનલ ટીમના ખેલાડી નવીન ઉલ હક અને રહમનઉલ્લાહ ગુરબાજને ટ્રાયલ માટે આમંત્રિત કર્યા છે.
આ વર્ષે નૂર અહમદે અંડર-19 એશિયા કપમાં ભારત સામે ઘાતક બોલિંગ કરીને સનસનાટી મચાવી દીધી હતી. 14 વર્ષીય નૂરે ભારત સામે 10 ઓવરમાં 30 રન આપીને ચાર વિકેટ ઝડપી હતી. તે યૂથ ઇન્ટરનેશનલમાં ચાર વિકેટની ક્લબમાં સામેલ થનારો સૌથી નાની વયનો ખેલાડી છે. નૂરે આ મામલે શોએબને પણ પાછળ છોડી દીધો. નૂર અહમદે જ્યારે આ સિદ્ધિ હાંસલ કરી ત્યારે તેની ઉંમર માત્ર 14વર્ષ 289 દિવસની હતી અને 1996માં શોએબ મલિકે જ્યારે આ સિદ્ધિ હાંસલ કરી હતી ત્યારે તેની ઉંમર 14 વર્ષ 311 દિવસની હતી. શોએબે ઈંગ્લેન્ડ સામે યૂથ ટેસ્ટમાં 38 રન આપીને ચાર વિકેટ ઝડપી હતી.