રાજનીતિ / રાજસ્થાન ફોન ટેપિંગ મામલે આવ્યો નવો વળાંક, ગૃહ મંત્રાલયે કરી આ કાર્યવાહી

• રાજસ્થાન ફોન ટેપિંગકાંડમાં ગૃહમંત્રાલયની દખલગીરી
• ફોન ટેપિંગકાંડમાં ગૃહમંત્રાલયે માગ્યો રિપોર્ટઃ સૂત્ર
• રાજ્યના મુખ્ય સચિવ પાસેથી માગ્યો રિપોર્ટઃ સૂત્ર

સૂત્રો દ્વારા મળતી માહિતી અનુસાર, આ સમગ્ર મામલે ગૃહ મંત્રાલયે રાજસ્થાનના મુખ્ય સચિવ પાસેથી રિપોર્ટ માંગ્યો છે. ભાજપે આ પ્રાઇવસીનું હનન ગણાવ્યું હતું. કથિત ખરીદ-વેચાણની આ ઓડિયો ટેપ સામે આવ્યા બાદ રાજસ્થાન કોંગ્રેસ અને ભાજપ બન્ને આમને-સામને આવી ગયા છે. રાજસ્થાનમાં એસઓજી પણ આ મામલે ઝડપથી તપાસ કરી રહી છે.

રાજસ્થાનમાં ગેહલોત સરકાર તોડી પડવા અંગેની ટેપમાં વાતચીતઃ કોંગ્રેસ

કોંગ્રેસે આરોપ લગાવ્યો છે કે, ઑડિયોમાં રાજસ્થાનમાં ગેહલોત સરકાર તોડી પાડવા માટે સંજય જૈનની સાથે ભંવર લાલ શર્માની વાતચીત છે. કથિત વાતચીતમાં અંદાજીત 30 ધારાસભ્યોને લઇને છે જેમાં ભંવર લાલ શર્મા અને સંજય જૈન એકબીજા સાથે વાત કરી રહ્યા છે. આ ઓડિયો ક્લિપની તપાસ માટે એસઓજીની ટીમ માનેસર સ્થિત હોટલ પહોંચી હતી પરંતુ ત્યાં ભંવરલાલ શર્મા નથી મળ્યાં. મહત્વનું છે કે, ઓડિયો ક્લિપના મામલામાં અશોક સિંહ અને ભરત મલાણીએ અવાજનું સેમ્પલ આપવાનો ઇન્કાર કર્યો છે.

ભાજપે જણાવ્યું હતું કે, પ્રાઇવસીનું હનન

જે ટેપને લઇને કોંગ્રેસ ભાજપનો પર્દાફાશ કરવાનો દાવો રહી હતી, ભાજપે તેના પર જ સવાલ ઉઠાવ્યા હતા. ભાજપ પ્રવક્તા સંબિત પાત્રાએ કહ્યું હતું કે, રાજસ્થાન સરકાર સૌની પ્રાઇવસીનું હનન કરી રહી છે. જ્યારે રાજ્યમાં લોકો કોરોનાકાળમાં વેન્ટિલેટર માટે તરસી રહ્યા છે તો કોંગ્રેસ ધારાસભ્ય સ્વિમિંગ પૂલમાં સ્વિમિંગ કરી રહ્યા છે.