પરિણામ / રાજસ્થાન નગરનિગમ ચૂંટણીઃ વિધાનસભાની પરીક્ષા અગાઉ ભાજપને ફરી ઝટકોઃ કોંગ્રેસની એકતરફી ક્લીનસ્વીપ

આ 50 સ્થાનિક બેઠકોમાં 7 નગર પરિષદ અને 43 નગરપાલિકાની બેઠક છે. નગર પરિષદની 7 બેઠકોમાંથી 5 બેઠક કોંગ્રેસે જીતી છે જ્યારે ભાજપ માત્ર 1 બેઠક જીતી શકી છે, જ્યારે 1 બેઠક અપક્ષ ઉમેદવારના ખાતામાં આવી છે. 

જે 50 બેઠકના પરિણામ હજી સુધી સામે આવ્યા હતા તેમાં 28 પર પુરુષ ઉમેદવાર અને 22 પર  મહિલા ઉમેદવાર જીતી છે. સ્થાનિક સ્વરાજ્યની ચૂંટણીને રાજસ્થાન વિધાનસભાની પરીક્ષા તરીકે જોવામાં આવે છે. જેમાં કોંગ્રેસને એકતરફી જીત મળી છે. 
 

જો કે ચૂંટણી પરિણામથી ભાજપ પણ ઓછુ ખુશ નથી. રાજસ્થાનના રાજ્ય પ્રભારી અને  ભાજપના રાષ્ટ્રી મહામંત્રી અરુણસિંહના જણાવ્યાં અનુસાર કોંગ્રેસના કુશાસનથી જનતા પરેશાન છે અને જો રાજસ્થાનમાં આજે ચૂંટણી યોજાય તો ભાજપ 3/4 બહુમતિથી સરકાર બનાવશે. અરુણસિંહે એમ પણ કહ્યું કે પંચાયતી રાજ ચૂંટણીમાં ભાજપની શાનદાર જીતની દિલ્હી સુધી ચર્ચા છે અને ભાજપની જીતની રાષ્ટ્રીય નેતૃત્વ પણ પ્રસંશા કરી રહ્યું છે.

અરુણ સિંહે કહ્યું કે કોંગ્રેસ સંપૂર્ણ રીતે પરિવારવાદની પાર્ટી છે. હાલના સમયમાં સોનિયા ગાંધી છે, પહેલા રાહુલ ગાંધી હતા, ફરી સોનિયા ગાંધી આવ્યાં અને હવે ફરિ રાહુલ ગાંધી આવી જશે. બીજી તરફ ભાજપ એક એવી પાર્ટી છે, જે રાષ્ટ્રવાદની વિચારધારાને લઇને કાર્ય કરે છે. 
 

રાજસ્થાનમાં પંચાયતી ચૂંટણીમાં હાર પછી સ્થાનિક સ્વરાજની ચૂંટણીમાં કોંગ્રેસનો 'પંજા' એ મજબૂત પકડ જમાવી હતી. જ્યારે બીજી તરફ ભાજપને જોરદાર ઝટકો લાગ્યો હતો. શહેરી સ્થાનિકમાં યોજાયેલ ચૂંટણીમાં કોંગ્રેસ સૌથી વધારે વોર્ડમાં જીત મેળવવા સફળ રહી હતી. જ્યારે બીજા નંબર પર અપક્ષ ઉમેદવાર રહ્યાં હતા, જયારે ત્રીજા નંબર પર ભાજપ જોવા મળ્યું હતું. શહેરી વિસ્તાર આમ તો ભાજપની પરંપરાગત વોટબેંક માનવામાં આવે છે, તેમ છતાં પાર્ટી શહેરી ચૂંટણીમાં જીત મેળવી શકી નહીં. આમ ભાજપે પોતાના કબ્જા હેઠળ રહેલી 30 સ્થાનિક સ્વરાજમાં બહુમતિ ગુમાવી દીધી હતી.

ઉલ્લેખનીય છે કે રાજસ્થાનમાં 2015ના આ 50 સ્થાનિક સ્વરાજની ચૂંટણીમાં 34 શહેરમાં ભાજપ વિજય મેળવવામાં સફળ રહ્યું હતું, પરંતુ 5 વર્ષ પછી માત્ર 4 જગ્યાઓ પર જ પોતાની બુહમતિ પ્રાપ્ત કરી શક્યું હતું.

જો કે સૌથી આશ્ચર્યની વાત તો એ રહી કે પ્રદેશમાં 30 એવી સંસ્થા છે જ્યાં અપક્ષ મહત્વની ભૂમિકામાં છે. કોંગ્રેસની પાસે વિપક્ષમાં રહેતા આ 50માંથી 14 શહેરી સંસ્થાઓમાં અધ્યક્ષ હતા. હવે 16માં કોંગ્રેસને સ્પષ્ટ બહુમતિ મળી છે. જો કે કોંગ્રેસ પ્રદેશ અધ્યક્ષ 40 સ્થાનિક સંસ્થાઓમાં પોતાના અધ્યક્ષ બનાવાનો દાવો કરી રહ્યાં હતા.