વિવાદીત નિવેદન / કરવા ચોથ પર નિવેદન આપીને ભરાયા રાજસ્થાન સરકારના મંત્રી, BJPએ હાથોહાથ મુદ્દો ઉપાડી લીધો

• રાજસ્થાન સરકારના મંત્રીએ આપ્યું વિવાદીત નિવેદન
• ભાજપે લગાવ્યો મહિલાઓના અપમાનનો આરોપ
• કોંગ્રેસના મંત્રીએ વૈજ્ઞાનિક વિચારધારા તરફ વળવાની કહી હતી વાત

ભારતીય જનતા પાર્ટીએ શનિવારે રાજસ્થાનના મંત્રી ગોવિંદ રામ મેઘવાળ પર મહિલાઓનું અપમાન કરવાનો આરોપ લગાવ્યો છે. ભાજપે મેઘવાળ પર આરોપ લગાવ્યો છે જેમાં તેમણે કહ્યું હતું કે, આ દુર્ભાગ્યપૂર્ણ છે કે, ભારતમાં મહિલાઓ આજે પણ કરવાચોથ પર પોતાના પતિની લાંબી ઉંમરની દુઆ કરવા માટે ચાળણીમાંથી ચાંદ જુએ છે, જ્યારે ચીન અને અમેરિકા જેવા દેશોમાં મહિલાઓ વિજ્ઞાનની દુનિયામાં જીવે છે.  

શું કહ્યુ હતું મેઘવાળે

મેઘવાળે જયપુરમાં રાજસ્થાન ડિઝિફેસ્ટના સમાપન કાર્યક્રમમાં કહ્યું હતું કે, ચીન, અમેરિકામાં મહિલાઓ વિજ્ઞાનની દુનિયામાં જીવી રહી છે, પણ આ દુર્ભાગ્યપૂર્મ છે કે, આજે પણ આપણે ત્યાં કરવાચોથ પર મહિલાઓ ચાળણીમાં જોઈને પોતાના પતિ માટે લાંબી ઉંમરની કામના કરતી રહે છે, પણ પતિ ક્યારેય પોતાની પત્ની માટે લાંબી ઉંમરની પ્રાર્થના માટે ચાળણીમાં જોશે નહીં. મંત્રી મેઘવાળે કહ્યું કે, લોકો બીજાને અંધવિશ્વાસમાં ધકેલી રહ્યા છે, લોકો ધર્મ અને જાતિના નામ પર બીજાને લડાવી રહ્યા છે. 

મેઘવાળે આપી સ્પષ્ટતા

મેઘવાળે જ્યારે આ ટિપ્પણી કરી ત્યારે મુખ્યમંત્રી અશોક ગહલોત આયોજનમાં હાજર હતા. બાદમાં મંત્રીએ પત્રકારોને કહ્યું કે, તેઓ દેશમાં વૈજ્ઞાનિક પ્રવૃતિ અને શિક્ષણને પ્રોત્સાહન આપવાની વાત કરી રહ્યા છે. હું કરવાચોથની વિરુદ્ધમાં નથી, જે કોઈ પણ વ્યક્તિ આ પરંપરાનું પાલન કરવા માગે છે, તે કરી શકે છે. હુ વૈજ્ઞાનિક વિચારધારાને મહત્વ આપવાની વાત કરી રહ્યો હતો. 

ભાજપે કર્યા આકરા પ્રહાર

આના પર ભારતીય જનતા પાર્ટીના પ્રદેશ પ્રવક્તા અને ધારાસભ્ય રામલાલ શર્માએ મંત્રી પર પ્રહાર કરતા કહ્યું કે, મંત્રીને આ વાતની જાણકારી હોવી જોઈએ કે, કલ્પના ચાવલા અંતરિક્ષમાં જઈ ચુક્યા છે અને કેટલાય ભારતીય મહિલાઓ પાયલટ તરીકે આકાશમા ઉડાન ભરી રહી છે. તેમણે કહ્યુ કે, મંત્રીએ દેશની કરોડો મહિલાઓનુ અપમાન કર્યુ છે, તેમણે માફી માગવી જોઈએ અને નિવેદન પાછુ લેવુ જોઈએ. મુખ્યમંત્રીને પણ તેમના વિરુદ્ધ કાર્યવાહી કરવી જોઈએ. શર્માએ કહ્યું કે, ભારતીય મહિલા વ્યક્તિગત અને નોકરીના જીવનની વચ્ચે સંતુલન બનાવી રાખતા આ પરંપરાનું પાલન કરી રહી છે અને કરવા ચોથ પર પતિની લાંબી ઉંમરની કામના કરે છે.