મહારાષ્ટ્ર વિધાનસભા ચૂંટણી 2024 / પૂર્વ શિવસૈનિક જ ભાજપ-શિવસેનાનો ખેલ બગાડશે! ઠાકરે-ફડણવીસની મિત્રતા દાવ પર

મહારાષ્ટ્ર ચૂંટણીમાં સોમવાર એક મહત્વપૂર્ણ દિવસ છે. આ દિવસે નામાંકન પાછું ખેંચવાની છેલ્લી તારીખ છે. બંને મુખ્ય ગઠબંધનમાં મોટી સંખ્યામાં બળવાખોરો ચૂંટણી મેદાનમાં ઉતર્યા છે. જો તેઓ ઉમેદવારી પરત નહીં ખેંચે તો બંને ગઠબંધનની રમત બગડી શકે છે. આવી સ્થિતિમાં મુંબઈની 36 વિધાનસભા બેઠકો પણ ઘણી મહત્વની બની જાય છે. અહીં MNSએ ઓછામાં ઓછી 25 સીટો પર પોતાના ઉમેદવારો ઉભા રાખ્યા છે.

રાજ ઠાકરેની MNS મહાયુતિ સાથે બેઠકો વહેંચી શકી ન હતી, તેથી તેમણે મોટી સંખ્યામાં તેમના ઉમેદવારો ઉભા રાખ્યા છે. મહાગઠબંધનમાં મુંબંઇની વાત કરીએ તો મુંબઇમાં ભાજપ 17 સીટો પર અને એકનાથ શિંદેની શિવસેના 16 સીટો પર ચૂંટણી લડી રહી છે. તેમાંથી MNSએ ઓછામાં ઓછી 22 બેઠકો પર તેમની સામે ઉમેદવારો ઉભા રાખ્યા છે. જેમાંથી 12 ભાજપના ઉમેદવારો સામે અને 10 શિવસેના સામે છે. રસપ્રદ વાત એ છે કે થોડા મહિના પહેલા યોજાયેલી લોકસભાની ચૂંટણીમાં MNSએ એકપણ ઉમેદવાર ઉતાર્યો ન હતો. તેણે ખુલ્લેઆમ એનડીએ અને પીએમ નરેન્દ્ર મોદીને સમર્થન આપવાની વાત કરી હતી.

શું MNS વોટ કાપવાનું કામ કરશે?

આવી સ્થિતિમાં હવે અનુમાન લગાવવામાં આવી રહ્યું છે કે શું MNS મુંબઈ બેઠકો પર સત્તાધારી ગઠબંધનના મતો કાપવાનું કામ કરશે. મુંબઈની સીવડી બેઠક એવી છે જ્યાં મહાયુતિએ પોતાનો ઉમેદવાર આપ્યો નથી. અહીંથી MNS ઉમેદવારો મેદાનમાં છે. આ રીતે મહાયુતિએ મુંબઈમાં મનસેને એક સીટ આપી છે પરંતુ તે તેનાથી સંતુષ્ટ નથી.

આવી સ્થિતિમાં અનેક સીટો પર વિવાદ વધી ગયો છે. મુંબઈની માહિમ અને વરલી સીટ પર વિવાદ વધુ ઘેરો બન્યો છે. MNS ચીફ રાજ ઠાકરેના પુત્ર અમિત ઠાકરે પોતે માહિમથી ચૂંટણી મેદાનમાં છે. તેમની સામે શિવસેનાના ઉમેદવાર સદા સર્વાંકર છે. જેથી અહીં ત્રિકોણીય જંગ જામશે. એ જ રીતે, વરલીમાં, MNS ઉમેદવાર સંદીપ દેશપાંડે શિવસેનાના ઉદ્ધવ જૂથના આદિત્ય ઠાકરે અને શિવસેના શિંદે જૂથના મિલિંદ દેવરાને સખત ટક્કર આપી રહ્યા છે.

જો કે MNSએ શહેરની મોટાભાગની બેઠકો પર તેના ઉમેદવારો ઉભા રાખ્યા છે, પરંતુ તેણે ભાજપના કેટલાક મોટા નેતાઓ સામે ઉમેદવારો ઉભા રાખ્યા નથી. જેમાં કોલાબાથી વિધાનસભા અધ્યક્ષ રાહુલ નાર્વેકર, બાંદ્રા પશ્ચિમથી મુંબઈ ભાજપના પ્રમુખ આશિષ શેલાર, મુલુંડથી મિહિર કોટેચાના નામ સામેલ છે. હવે જોવાનું એ રહે છે કે સોમવારે મનસેના ઉમેદવારો પોતાના નામ પાછા ખેંચે છે કે નહીં. જો તેઓ તેમના નામ પાછા નહીં ખેંચે તો તેઓ ભાજપ-શિવસેના ગઠબંધનને નુકસાન પહોંચાડશે. મુંબઈમાં કેટલીક સીટો પર MNSની સારી પકડ છે. આવી સ્થિતિમાં, સંપૂર્ણપણે દ્વિમુખી ચૂંટણીમાં, MNS મહાયુતિની રમત બગાડી શકે છે.

બધાજ સમાચાર અને અપડેટ્સ મેળવવા માટે પ્લેસ્ટોર/ એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ