બોલિવૂડ અભિનેત્રી શિલ્પા શેટ્ટીના પતિ અને જાણીતા બિઝનેસમેન રાજ કુંદ્રાનું નામ પોનોગ્રાફી કેસમાં સામે આવ્યું છે. પોલીસે તેને 23 જુલાઈ સુધી કસ્ટડીમાં મોકલ્યો છે.
રાજ કુંદ્રાનું નામ પોનોગ્રાફી કેસમાં સામે આવ્યું છે
પોલીસે તેને 23 જુલાઈ સુધી કસ્ટડીમાં મોકલ્યો છે
હાલ શિલ્પા શેટ્ટીની વિરુદ્ધ કોઈ પુરાવા નથી
આ મામલો ફેબ્રુઆરીમાં સામે આવ્યો હતો. ઘણાં મહિનાઓ સુધી બધાં પુરાવા એકઠાં કર્યા બાદ રાજ કુંદ્રાની પોલીસે ધરપકડ કરી. મંગળવારે આ મામલામાં આરોપી રાજ કુંદ્રાને મુંબઈની સેશન્સ કોર્ટમાં રજૂ કરવામાં આવ્યો હતો. જ્યાં કોર્ટે ક્રાઈમ બ્રાન્ચની માંગ સ્વીકારી અને આરોપી કુંદ્રાને પોલીસ કસ્ટડીમાં મોકલી દીધો છે. તેને મુંબઈની ભાયખલા જેલમાં શિફ્ટ કરવામાં આવ્યો છે. આ મામલો સામે આવ્યા બાદ એવા સવાલો ઊભા થઈ રહ્યા છે કે શું આ કેસમાં શિલ્પા શેટ્ટીની કોઈ ભૂમિકા છે? આ સવાલના જવાબ આપીને પોલીસે આ રહસ્ય પરથી પર્દાફાશ કરી દીધો છે.
જોઈન્ટ સીપીએ ખોલ્યું રહસ્ય
ફેબ્રુઆરી 2021થી જુલાઈની વચ્ચે આ મામલાને ઉકેલવા માટે પોલીસે ઘણું હોમવર્ક કર્યું. ત્યારબાદ પોલીસનો સકંજો રાજ કુંદ્રા સુધી પહોંચ્યો. 6 મહિના સુધી કેસની ઊંડાણપૂર્વક તપાસ કરવામાં આવી. પૂરતા પુરાવા એકત્ર કર્યા, ત્યારબાદ રાજ કુંદ્રાની પોલીસે ધરપકડ કરી. મંગળવારે મુંબઈ પોલીસના જોઈન્ટ કમિશ્નર મિલિન્દ ભરામ્બેએ પ્રેસ કોન્ફરન્સ કરીને આમામલાની જાણકારી મીડિયાને આપી. જોઈન્ટ સીપીએ જણાવ્યું કે, કેવી રીતે આ ધંધામાં લોકો કામ કરતા હતા. સાથે જ તેમણે આ કેસમાં શિલ્પા શેટ્ટીની ભૂમિકાને લઈ પણ સ્પષ્ટતા કરી.
શિલ્પા શેટ્ટીની વિરુદ્ધ કોઈ પુરાવા નથી
મુંબઈ પોલીસે જણાવ્યું કે, શિલ્પા શેટ્ટીની આ કેસમાં ભૂમિકા હોવાના હજુ સુધી કોઈ પુરાવા મળ્યા નથી. અમે તપાસ કરી રહ્યાં છીએ. અમે પીડિતોને ક્રાઇમ બ્રાન્ચનો સંપર્ક કરીને પોતાની વાત રજૂ કરવા વિનંતી કરીએ છીએ. અમે જરૂરી કાર્યવાહી કરીશું.
પુરાવાના આધારે થઈ રાજની ધરપકડ
જોઇન્ટ સીપીએ જણાવ્યું કે, આ મામલામાં ઉમેશ કામત જેવા નિર્માતાઓની ધરપકડ કરવામાં આવી છે, જે રાજ કુન્દ્રાના ઈન્ડિયા ઓપરેશન્સની દેખરેખ રાખતા હતા. હોટશોટ્સ એપનું કામકાજ વિયાન કંપનીના માધ્યમથી થતું હતું. દરોડા દરમિયાન અમને પુરાવા મળ્યા છે, જેના આધાર રાજ કુન્દ્રાની ધરપકડ કરવામાં આવી છે.
તમને જણાવી દઈએ કે, રાયન થાર્પની મુંબઈની નજીક નેરલથી મંગળવારે ધરપકડ કરવામાં આવી હતી. ત્યારબાદ બંનેને કોર્ટમાં રજૂ કરવામાં આવ્યા. કોર્ટે રાજ અને રાયનને 23 જુલાઈ સુધી પોલીસ કસ્ટડીમાં મોકલી આપ્યા છે.