ઉથલ પાથલ ? / ગુજરાત-પંજાબ બાદ હવે આ રાજ્યમાં રાજકીય ભૂકંપ સર્જાવાના એંધાણ, સરકારના આ મંત્રી દિલ્હી જવા રવાના

• ગુજરાત બાદ હવે છત્તીસગઢમાં રાજકીય ભૂકંપ સર્જાવાના એંધાણ
• સરકારના સ્વાસ્થ્ય પ્રધાન ટીએસ સિંહદેવ દિલ્હી જવા રવાના
• સિંહદેવે રાજકીય અટકળો પર લગાવ્યું પૂર્ણ વિરામ, આપ્યું આ કારણ

છત્તીસગઢના રાજકીય વર્તુળોમાં રાજકીય માહોલ તેજ

ટી એસ સિંહદેવના દિલ્હીના કાર્યક્રમથી પ્રદેશના રાજકીય વર્તુળોમાં ચર્ચાનો માહોલ તેજ બન્યો. જોકે, તમામ રાજકીય અટકળો વચ્ચે મંત્રી ટીએસ સિંહદેવે કહ્યું કે તેઓ બહેનના જન્મ દિવસમાં સામેલ થવા માટે દિલ્હી જઇ રહ્યાં છે. આ તેમનો કોઈ રાજકીય પ્રવાસ નથી. છત્તીસગઢમાં મુખ્યપ્રધાનની ખુરશીને લઇને કોંગ્રેસમાં અંદરખાને ચાલતો વિખવાદ સૌ કોઈ જાણે છે. ગયા મહિને મુખ્યપ્રધાન ભૂપેશ બધેલ, પાર્ટીના પ્રદેશ અધ્યક્ષ પીએલ પુનિયા અને ટીએસ સિંહ દેવની દિલ્હીમાં રાહુલ ગાંધીની સાથે મેરેથોન બેઠક થઇ હતી. જેમાં અઢી વર્ષવાળાં ફોર્મ્યુલા પર ચર્ચા કરવામાં આવી છે. જોકે, કોઈ પણ વ્યક્તિએ હજુ સુધી આ અંગે સ્પષ્ટતા કરી નથી. પરંતુ પાર્ટીની અંદર આ અંગે ચર્ચાનું બજાર ખૂબ ગરમ રહ્યુ હતુ.
 

સિંહદેવે પરિવર્તન અંગે આપ્યું હતુ મોટું નિવેદન

ત્યારબાદ દિલ્હીથી પરત આવેલા મંત્રી ટીએસ સિંહદેવે મોટું નિવેદન આપતા કહ્યું હતુ કે, તેમણે જીવનમાં એક જ વસ્તુ સ્થિરતા તરીકે જોઈ છે અને તે પરિવર્તન છે. સિંહદેવે કહ્યું કે, હાઈકમાન્ડે દરેક બાબતોને ધ્યાનમાં લીધી છે અને તેમણે પોતાનો નિર્ણય સુરક્ષિત રાખ્યો છે. તેમણે કહ્યું કે, હાઈકમાન્ડ સાથે ખુલ્લા મને વાતચીત થઇ છે અને ટૂંક સમયમાં આ અંગે તેઓ નિર્ણય લેશે.

છત્તીસગઢમાં ચર્ચિત અઢી-અઢી વર્ષની ફોર્મ્યુલા

ઉલ્લેખનીય છે કે, અત્યારે છત્તીસગઢ રાજ્યમાં અઢી-અઢી વર્ષના ફોર્મ્યુલા હેઠળ મુખ્યમંત્રી બદલવાની ચર્ચા ભારે થઇ રહી છે. ગત 24 ઓગષ્ટે દિલ્હીમાં થયેલી બેઠકમાં છત્તીસગઢમાં ત્રણેય નેતાઓની સાથે પાર્ટીના વરિષ્ઠ નેતા કેસી વેણુગોપાલ પણ હાજર રહ્યાં હતા. ત્યારબાદ પંજાબમાં અમરિન્દર સિંહે મુખ્યમંત્રી પદેથી રાજીનામું આપ્યાં બાદ છત્તીસગઢમાં રાજકીય ભૂકંપ આવ્યો છે. તો હવે છત્તીસગઢના રાજકીય પરિદ્રશ્ય અને હાઈકમાન્ડના નિર્ણય પર લોકોનું ધ્યાન કેન્દ્રીત થયુ છે.